ROM 12
12
धार्मिक प्रथा नडपीच्चेद — 12:1—15:13
कोत्ताद जीवनक्रम
1दिनिचांग आक्का तम्मुळ्ळालाला परमेश्वर दयाद ध्यानाम तिशी निन मिक विनंती शेस्तान की, मीर मी शरीरलु पवित्र इंगा जिवंत यज्ञ आंका परमेश्वरकी समर्पित शेयना; इद्दे परमेश्वरदी सेवा शेशेद खरेम मार्ग उंडाद. 2इंगा इ दुन्यामलोन मंदी लेका काकुंडा पण मी मनुद पुर्णपणे रुपांतर का निंडा; आंटे परमेश्वरदी शिंगार इंगा वानकी आवडाशेद परिपुर्ण इच्छा येम उंडाद आदी मीर गुरतु फट्टाला.
आत्मिक दानदी बरोबर उपयोग
3येनटीक की निन नाक इच्चीने कृपा इचांग, निन मी दिंटल्योन्केल प्रत्येक मनशीक इल्ला शपतान की, स्वतान मी योग्यता काना जास्त समजायाकुंडा, पण प्रत्येक मनशीक यल्ला परमेश्वर विश्वास फंची इच्चीनाड, दान लेका स्वतान नम्र समजायना. 4येनटीक की यल्ला मना शरीरला शेंगेम अवयवलु उंडाय इंगा आन्नी अवयवलाद फनी वक्काटे लेद, 5आल्ले मनाम शेंगेम मंदी उंडी ख्रिस्तला वगा फय उंडाम; इंगा मनाम वगामेगारी अवयवलु उंडाम. 6पण परमेश्वर मनाक इच्चीने कृपालेका मनाक वेगवेगळा कृपादानलु उंडाय; जर आदी परमेश्वरदी भविष्यवाणी शप्पेद उंटे तर विश्वासदी परिणामलेका मनाम भविष्यवाणी शेयाला; 7सेवा उंटे, तर सेवा शेशेदेंक तैयार उंडाला; यवाड शिक्षण इस्ताड वाड शिक्षण इच्चेदेंक, 8उपदेश इच्चेतोड उपदेश इच्चेदेंक तैयार उंडाला; यवाड दान इस्ताड वाड मोकळा मनता इयाला; यवाड पुढारीपण शेस्ताड वाड आनंदता शेयाला, यवाड दया शेस्ताड वाड खुशीता दया शेयाला.
ख्रिस्ती जिवनक्रमदी नियम
9प्रेम निष्कपट उंडाला. वाईटकेल धुराम उंडा, शिंगार शेस्का उंडा. 10वगामेगार मिंदा परिवार लेका प्रेम शेयना इंगा स्वता काना जास्त इंगोगोरदी आदर शेयना, 11फनी शेशेदेंक आळशी कावांदे, पुर्ण मनता प्रभुनदी सेवा शेशेतोर कांडा. 12आशाला आनंद शेशेतोर, संकटला दम्मु फेटेतोर इंगा प्रार्थना शेस्केन उंडेतोर कांडा, 13परमेश्वर मंदी गरज इचांग मदत शेयना, अतिथी-सत्कार शेशेदेंक तैयार उंडना.
14यवार मिद छळ शेस्तार वारकी आशिर्वाद इंडा; आशिर्वादे इंडा, श्राप इयाकुंडा. 15आनंद शेशेतोर जताक आनंद शेयना इंगा येडशेटोर जताक येडना. 16वगामेगार जताक वगामन कांडा, घमंडी कावांदे गरजवंत मंदीद मदत शेयना, स्वतान बुद्धिमान समजायाकुंडा. 17वाईट बद्दल यवारदी वाईट शेयाकुंडा. आंता मंदी इचांग येम शिंगार उंडाद आदी शेशेद प्रयत्न शेयना. 18आय्यी शकास्ते तर आंता मंदी जताक शांतीता निलना. 19हे ना प्रिय मंदी, मीर स्वता बदला तिस्कुनाकुंडा, परमेश्वरनी मिद बदला तिस्कुना निंडा, येनटीक की पवित्र शास्त्रला इल्ला राशीनेद उंडाद की, “बदला तिस्कुनेद नाद फनी उंडाद, बदला निन तिस्कुन्यान, इल्ला परमेश्वर आंटाड.”#अनुवाद 32:35.
20पण नी शत्रुक आकाल आइंटे तर वानकी तिनेदेंक इ;
वानकी दुपाक आइंटे तर वानकी तागेदेंक इ;
येनटीक की इल्ला शेशी नु वान शिग्गुना केडप्याव.#नीतिसुत्र 25:21-22.
21वाईटता हारायाक; पण शिंगारता वाईटनी झिकाय.
