PAIMBA 7
7
Panyomba waʼa ntadulako
7:1-89
1Ri karoonya nawangu i Musa Kema i mPue, Kema setu sangkani pai waʼa mparewanya nadonco pai naulaka pai lana upacara pura-puranya. Ewanceʼe seʼe napampowia lampaʼani pai waʼa mparewanya. 2Ungka lairia waʼa ntadulako nto Isaraeli inceʼemo waʼa ntadulako lemba anu mawianaka paimba to Isaraeli, 3mampanyombaka ri suara i mPue aono geroba sangkani pai sampuyu pai radua japi: radua tadulako manjuyu sambaʼa geroba, sambaʼa-sambaʼa tadulako mawai sambaʼa japi. Nepa napanyombaka ntau seʼe. 4Ndatoʼo i mPue ri Musa, 5“Tarimamo waʼa mpombai setu da ndapangaʼulaya Kemaku; pepombaikamo pura-puranya ri waʼa nto Lewi silulu pai tetala ntau seʼe.” 6Inceʼe painaka waʼa geroba pai japi setu nawaika i Musa waʼa nto Lewi. 7Geroba radua pai japi aopo nawaika waʼa ntau i Geresoni. 8Aopo geroba pai uayu japi nawaika waʼa ntau i Merari, silulu pai tetala anu nawianaka ntau seʼe anu natadulakoni i Tamari ana i tadu mpanyomba Haruni. 9Paikanya waʼa ntau i Kehati bareʼe marata tila geroba pai japi ungka ri Musa, maka waʼa mparewa magali anu mewali kinoyo ntau seʼe, sangaya-ngaya da ndapasaʼa.
10Waʼa ntadulako mangkeni panyomba da ndapaposusaka upacara pangadonco lampaʼani. Butu tikalimo tau seʼe da mangkeni pombai ntau seʼe ri suara lampaʼani. 11Ndatoʼo i mPue ri Musa, “Toʼokamo tau seʼe, sandeme-sandeme ri raya anu sampuyu pai radua ndeme sambaʼa ungka ri oyo waʼa ntadulako sangaya-ngaya da mampanyombaka panyombanya tila upacara pangadonco lampaʼani.”
12-83Sambaʼa-sambaʼa da mangkeni panyombanya malulu suncunya seʼi:
| Eo | Lemba | Tadulako |
|---|---|---|
| Ka-1 | Yahuda | Nahaso ana i Aminada |
| Ka-2 | Isakari | Netaneeli ana i Juari |
| Ka-3 | Sebulo | Eliabi ana i Heloni |
| Ka-4 | Rube | Elisuri ana i Ncedeuri |
| Ka-5 | Simeo | Selumieli ana i Ncurisadai |
| Ka-6 | Gati | Eliyasa ana i Rehueli |
| Ka-7 | Eparai | Elisama ana i Amihu |
| Ka-8 | Manase | Gamalieli ana i Pedasuri |
| Ka-9 | Benyami | Abidani ana i Gideoni |
| Ka-10 | Daa | Ahieseri ana i Amisadai |
| Ka-11 | Asere | Pagieli ana i Okarani |
| Ka-12 | Natali | Ahira ana i Enani |
Siwia-wia anu napanyombaka ntau seʼe, inceʼemo: sambaʼa tabo salaka anu kaneenya 1,5 kilo pai sambaʼa loya salaka anu kaneenya 800 garami, malulu podasi anu ndapake ri Kema i mPue. Tabo pai loya setu da ndabanganika buke-buke pai tarigu anu ndagaloka lana motaʼa panyomba pangkoni. Reʼe woʼu sambaʼa tabo wuyawa anu kaneenya 110 garami banganinya dupa; sambaʼa japi laki anu mangurapa, sambaʼa bimba laki pai sambaʼa ana bimba anu santaʼu tinuwunya da mewali panyomba anu ndaʼombasi, ewanceʼe seʼe sambaʼa mbula laki tila mpanyomba ngkabareʼenya ndakitanaka salaa; radua japi, alima bimba laki, alima mbula laki pai alima bimba anu tinuwunya santaʼu tila mpanyomba ngkasimadago.
84-88Panyomba tila mpadonco lampaʼani anu nakeni sampuyu pai radua tadulako setu poromunya pura-pura:
– sampuyu pai radua tabo salaka pai sampuyu pai radua loya salaka anu kaneenya pura-pura 27,6 kilo
– sampuyu pai radua tabo wuyawa anu kaneenya 1,32 kilo, pura-pura buke pai dupa
– sampuyu pai radua japi laki, sampuyu pai radua bimba laki pai sampuyu pai radua ana bimba anu santaʼu tinuwunya, sangkani-ngkani pai panyomba anu motaʼa pangkoni anu mampatikali panyomba anu da ndaʼombasi
– sampuyu pai radua mbula tila mpanyomba ngkabareʼenya ndakitanaka salaa, ruampuyu pai aopo japi laki, onompuyu bimba laki, pai onompuyu mbula, onompuyu ana bimba anu tinuwunya santaʼu tila mpanyomba ngkasimadago.
89Ane mesua i Musa ri raya Kema i mPue da mompau pai i Pue, da nadonge oni nganga i mPue anu mompau ri siʼa ungka ri wawo tutu Peti mPojanji ri oyo radua turuki kerubio.
@LAI 2000