PAIMBA 6
6
Padika kono tau nasiri
6:1-21
1-2Ndapokau i mPue i Musa da mamparata padika seʼi ri waʼa nto Isaraeli. Sambaʼa-sambaʼa tuama bara weʼa anu anu montanga da mampepombaika katuwunya tila pamporiokoi i Pue, 3-4#Luk. 1:15 bareʼe maya mainu ue anggoro bara panginu anu mampakayangu. Bareʼe maya nainu panginu anu ndapowia ungka ri wua anggoro bara ungka ri wua ngkaju anu ntaninya. Bareʼe maya nakoni wua anggoro anu nepa ndapupu bara anu mangaumo, pai bara nunjaa ntano anu ungka ri woto anggoro; wukunya bara yoyonya, bareʼe maya nakoni.
5Sangkasae mpontanganya bareʼe maya ndagunci bara ndakou wuyuanya. Wuyuanya pai janggonya da napapaliumo naka rate. Siʼa tesoʼo ri pontanganya rantani rata ri eo ngkapusa mpontanga setu ri Pue. 6-7Wuyuanya setu mewali tanda kasiʼanya ndapatani gala i mPue. Sangkasae napalinjaki pontanganya setu, bara maya naonusi koronya; bareʼe maya mantimosuki wata ngkoro ntau mate, mau bara watangkoro mpapanya, inenya bara kasangkomponya. 8Sangkasae siʼa mewali tau nasiri, siʼa tau ndapatani gala i mPue.
9Ane wuyua ntau nasiri anu roo ndapatani gala i mPue mewali karika ua tingkarasaka mantimosuki wata ngkoro ntau mate, da nalantu papitu ndeme kasaenya; roo setu da nakou wuyuanya pai janggonya ane tuama nepa da magali siʼa. 10Ri kaʼuayu ndemenya da nakeni radua tonci putiʼa bara tokuku ri tadu mpanyomba ri suara dampo wombo ngKema i mPue. 11Sambaʼa tonci setu da napanyombaka i ntadu mpanyomba tila ngkabareʼenya ndakitanaka salaanya, pai anu sambaʼa woʼu da ndaʼombasi mampakagali muni siʼa. Montepuʼu sandeme setu da napatuwu muni wuyuanya tila mpanyomba ri Pue, 12pai madawoʼuni pampepombaikanya koronya ewa sambaʼa tau nasiri. Tempo anu liumo bareʼemo ndaimba maka siʼa nalempomo ngkarika. Pai da ndapanyombaka sambaʼa ana bimba anu nepa santaʼu tinuwunya, mewali panyomba poncawani rugi.
13 #
Pwn. 21:23-24
Ane liumo tempo mpontanganya da nawianakamo panyomba ewaseʼi: Tau setu da ndapoyunu ri tambale ngKema i mPue, 14da mangkenika i Pue tatogo pinatuwu anu bereʼe posarinya; sambaʼa ana bimba laki anu santaʼu tinuwunya da napanyombaka mewali panyomba anu ndaʼombasi, pai sambaʼa ana bimba tina anu santaʼu tinuwunya da mewali panyomba tila ngkabareʼenya ndakitanaka salaa, pai sambaʼa bimba laki tila mpanyomba ngkasimadago. 15Pai sangaya-ngaya da napanyombaka woʼu sabingka roti anu bareʼe ndaragi, roti anu maliogu da ndagaloka lana saitu, pai roti anu mapipi da ndaulaka lana saitu. Pai banya podo inceʼe, maka da napanyombaka woʼu panyomba pangkoni pai panginu.
16Pura-pura setu da nakeni i ntadu mpanyomba ri suara i mPue, nepa da napanyombaka panyomba ngkabareʼenya ndakitanaka salaa pai panyomba anu ndaʼombasi. 17Sangkani-ngkani pai roti sabingka setu, da napanyombaka ri Pue bimba laki setu ewa panyomba ngkasimadago. Ewanceʼe seʼe da napanyombaka ri Pue panyomba anu motaʼa pangkoni pai panginu.
18Tau nasiri setu da mangkou wuyuanya ri suara dampo mbombo Kema i mPue, pai da natendeka ri apu ri sindara ndapaʼombasi panyomba ngkasimadago setu.
19Roo setu, ane mananamo paʼa bimba laki setu da nadika ri bimba sangkani pai roti maliogu saogu, sangkomba roti mapipi nepa napapakekenika i ntadu mpanyomba tau nasiri setu. 20Roo setu i tadu mpanyomba da mampetujuka ri Pue pangkoni setu, mewali sambaʼa pombai anu ndapatani tila i mPue; inceʼemo santila anu magali da tila i ntadu mpanyomba, ndaranganika paʼa bimba laki pai dadanya anu lawi da tila ntadu mpanyomba silulu pai padika. Ane roo setu, tau nasiri mayamo mainu anggoro.
21Inceʼemo podede mpadika anu da nalulu ntau anu nasiri; paikanya ane sambaʼa nasiri anu majanji panyomba meruu ungka ri anu ndapakanoto ri padika mpontanga, sangaya-ngaya da nabangani pojanjinya setu.
Pau mpopadonco i ntadu mpanyomba
6:22-27
22-23Ndapokau i mPue i Musa da mangantoʼoka i Haruni pai waʼa ananya, ri tempo da mpangadonconya to Isaraeli da natoʼo ntau seʼe pau anu ewaseʼi:
24Mbolimo i Pue da mangadonco pai da mamporewu komi.
25Mbolimo i Pue da madago raya pai da pande mporaya ri komi.
26Mbolimo i Pue da mampotowe komi pai damaika komi kalindo ndaya.
27Pai ndatoʼo woʼu i mPue, “Ane natoʼo ntau seʼe toʼoku ndapopadoncoka to Isaraeli, yaku da mangadonco tau seʼe.”
@LAI 2000