Ekesote 29
29
Fakatapu o tagata faisakilifisio
1Ko leinei le nea leia e ke fai loa ke fakatapui ai latou, o tupu ke lotou gaoi kiate au i le gaoi fakapelepitelo. Too se pipi tagata muli mo ni ovi tagata e lua lee mele. 2Fai ki se falina fulumeto ni pane sala fakatupu, mo ni kato sala fakatupu kua lusi ki le lolo, ti mo ni fakapaku sala fakatupu kua takai ki le lolo. 3E ke fafao loa latou ki se kete, ti e ke ave loa latou ki le sagatualio, mo le pipi tagata muli ti mo ni ovi tagata e lua.
4E ke taki loa Alone mo ona vosa ki le matapa ulu o le falela, ti e ke fakamaanu loa latou ki se vai. 5E ke too loa a kofu tapu, o ke fakatui loa kia Alone le kofu loloa, mo le kofu o le efote mo le peketolale, ti e ke nonoa loa kiate ia le nonoa fakateuteu ke taofi ai le efote. 6E ke teki loa le puloga ki lona ulu, ti e ke sai loa le pala o le maokioki ki le puloga. 7E ke too loa le lolo tapu, ti e ke liligi loa se lolo ki lona ulu, ti e ke pani loa a ia. 8E ke fakafeofi mai loa ona vosa kiate koe, ti e ke fakatui loa kia latou a kofu loloa tetea. 9E ke toi loa se kilii pipi kia Alone mo ona vosa, ti e ke fakapiki loa a puloga tea ki ulu o vosa o Alone. E lotou maua loa le gaoi fakapelepitelo, ti ko se lao lena ke tuu mau ki tautupu mo tautupu. Ti e ke fakanofo loa Alone mo ona vosa ke tagata faisakilifisio.
10E ke aumai loa le pipi tagata muli ki mua o le falela tapu, ti e teki loa e Alone mo ona vosa olatou lima ki le ulu o le pipi tagata. 11E ke tamate loa le pipi tagata i mua o le Eteleno, i le mua matapa o le falela tapu. 12E ke too loa se toto i le toto o le pipi tagata, ti e ke takai loa ki ai a tala o le aletale ki lou maikao, ti e ke liligi loa le toto katoa leia na toe ki lalo o le aletale. 13E ke too loa le gako loto o tootooga, mo le magai ate lasi, mo fa ifiifi e lua, ti mo le gako leia e kofu ia a ifiifi, ti e ke tutu loa a nea fuli ana i le aletale. 14Kae e ke tutu loa i le afi, i le fafo o le nofolaga, le tino o le pipi, mo lona kili, ti mo ona vava : ko se sakilifisio lena ki le agasala.
15E ke too loa se ovi e tasi o ovi tagata e lua, ti e teki loa e Alone mo ona vosa olatou lima ki le ulu o le ovi tagata. 16E ke tamate loa le ovi tagata ; e ke too loa lona toto, ti e ke liligi loa a ia i aluga o le aletale i lona tafatafa katoa. 17E ke tuutuu loa le ovi tagata, ti ke fakamea loa ona vava mo ona vae, ala e ke teki loa ki aluga o inati mo le fa ulu. 18E ke tutu loa le ovi tagata katoa i le aletale ; ko se failaulau lena ki le Eteleno, ko se sakilifisio leia e tutu e le afi, ti e manogi malie a ia ki le Eteleno.
19E ke too loa leia ake a ovi tagata, ti e teki loa e Alone mo ona vosa olatou lima ki le ulu o le ovi tagata. 20E ke tamate loa le ovi tagata ; ti e ke too loa se toto i lona toto, ti e ke takai loa ki ai le potu aluga o le taliga atamai o Alone mo taliga o ona vosa, ti e ke takai loa ki le toto a maikao matua o olatou lima atamai mo le maikao matua o olatou vae atamai, ti e ke liligi loa le toe o le toto ki aluga o le aletale i le tafatafa katoa. 21E ke too loa se toto i le toto leia e tuku i aluga o le aletale ti mo se lolo tapu, ti e ke afusi loa ki ai Alone mo ona kofu, ti mo ona vosa mo olatou kofu. E ke fakatapui loa i ai Alone mo ona kofu, ti mo ona vosa mo olatou kofu. 22E ke too loa le gako o le ovi tagata, mo le siku, mo le gako loto leia e kofu ia a tootooga, mo le magai ate lasi, mo ifiifi e lua, mo le gako leia e kofu ai, ti mo le alaga mua atamai, talie ko se ovi tagata a ia o le fakatapu ; 23E ke too loa i le kete pane sala fakatupu, leia e tuku i mua o le Eteleno, se fa pane e tasi, mo se fa kato e tasi na lusi ki le lolo, ti mo se fa fakapaku e tasi. 24E ke teki loa a nea fuli ana ki lima o Alone mo lima o ona vosa, ti e ke liliaki loa latou ki leia fetuu mo leia fetuu i mua o le Eteleno. 25E ke too loa a nea ana i olatou lima, ti e ke tutu loa latou i le aletale, i aluga o le failaulau ; ko se sakilifisio tutu katoa a ia e le afi i mua o le Eteleno, ti e manogi malie a ia ki le Eteleno.
Nea kai a le kau faisakilifisio
26E ke too loa le fatafata o le ovi tagata, leia na momoli ki le fakatapu o Alone, ti e ke liliaki loa a ia ki leia fetuu mo leia fetuu i mua o le Eteleno : ko lou vaega loa lena. 27E ke fakatapui loa le fatafata mo le alaga mua o le ovi tagata, leia na fakaaoga ki le fakanofo o Alone mo ona vosa, io, le fatafata i lau liliaki a ia ki leia fetuu mo leia fetuu, mo le alaga mua i lau siki a ia ki aluga. 28E tuu loa a ia ko se lao ke tuku sosolo i tautupu mo tautupu i fanau a Iselaele : E soli loa a inati ana kia Alone mo ona vosa, i manu fuli ala e momoli mai kiate au e fanau a Iselaele i alatou sakilifisio fakafetai.
29Ka mate loa Alone, ti e tuku loa ona teu tapu ki ona vosa. E lotou tui loa a teu ana i le aso leia e fakatapui ai loa latou mo fakanofo ai loa latou ki le gaoi fakapelepitelo. 30E tui loa a kofu ana i aso e fitu e leia i ona vosa e fetogi ia loa a ia i le gaoi fakapelepitelo, leia e ulu loa ki le falela tapu o fai le gaoi i le potu taputapu.
31E ke too loa le ovi tagata o le fakatapu, ti e ke fakamoso loa le kanofi i se ganea tapu. 32E kai loa e Alone mo ona vosa le kanofi o le ovi tagata, ti mo le fa pane leia e tuku i le kete, i le uluaga o le falela tapu. 33Ti e lotou kai loa a nea ana, ala na fai ki ai le fakamalie, o tupu ke fakatapui ai mo fakanofo ai latou ki le gaoi fakapelepitelo. E leaise kai loa se tasi kese ki nea ana, talie ko nea tapu latou. 34Kapau e toe loa se kanoi manu mo se pane ki le usu, ti e ke tutu loa a ia i le afi ; e leaise kai loa a ia, talie ko le nea tapu a ia.
35E ke fai loa kia Alone mo ona vosa o mulimuli ki fakatotonu fuli ala na kau tuku atu kiate koe. E ke fai loa i aso e fitu lolatou fakatapu. 36E ke momoli loa i aso taki tasi se pipi tagata ki le sakilifisio fakamolemole o agasala ; e ke fakamea loa le aletale ki le sakilifisio lena, ti e ke pani lolo loa a ia ke fakatapui. 37E ke fai loa le tootooga lena i aso ana e fitu ; e liliu loa le aletale o maokioki, ti e maokioki loa a nea fuli e lave loa ki ai.
Le failaulau lee gato
38Ko leinei le nea leia e ke momoli loa i le aletale : ko ni akeno e lua e fetuu taki tasi, i aso taki tasi, o tuumau. 39E ke momoli loa se tasi akeno i le usu, ti ko le tasi akeno i le afiafi. 40E ke momoli fakatasi loa mo le uluaki akeno se falina mea, ko le vaega kau agafulu e tasi o le efa, leia kua lusi ki se liti lolo olive tuki e tasi vaelua, ti mo se vino, ko le liti e tasi vaelua. 41E ke momoli loa le lua o akeno i le afiafi, mo se moliga magiti ti mo se vino ofaipe leia i le usu ; ko se sakilifisio tutu a ia e le afi, ti e manogi malie a ia ki le Eteleno. 42Ko lena loa le failaulau leia e tonu ke fai tuumau e okoutou sakoga i mua o le uluaga o le falela tapu, i mua o le Eteleno : ko le ganea lena e kau felavei ai loa mo koutou ti e kau masau ai loa kiate koe. 43E kau felavei loa i ai mo fanau a Iselaele, ti e maokioki loa le ganea lena o tupu ko loku kololia. 44E kau fakatapui loa le falela mo le aletale ; ti e kau fakatapui loa Alone mo ona vosa, o tupu ke lotou gaoi kiate au i le gaoi fakapelepitelo. 45E kau nofo loa i loto malie o fanau a Iselaele, ti e kau liliu loa ko lolatou Atua. 46E lotou iloa loa ko au ko le Eteleno, ko lolatou Atua, leia na fakamavae ia latou i le fenua o Esipito, o tupu ke kau nofo i loto malie o latou. Ko au ko le Eteleno, ko lolatou Atua.
© Société Biblique de Genève, 2000-2020
