Ekesote 28
28
Kofu o le pule faisakilifisio
1Fakafeofi mai kiate koe lou taokete ko Alone, mo ona vosa, ti ke vaei kese latou mei fanau a Iselaele, o ke fakanofo latou ke gaoi kiate au i le gaoi fakapelepitelo : Ko Alone mo ona vosa ko Natape, mo Apiu, mo Eleasale, mo Itamale.
2E ke fai loa ki lou taokete ko Alone, ni kofu tapu, ke fakamailoga ai lona aliki, ti ke kofu ki ai i lana gaoi. 3E ke masau loa kia latou fuli ala e poto, latou ala kua kau soli ki ai se laumalie leia kua apele i le poto ; ti e lotou fai loa a kofu o Alone ki lona fakanofo mo le fai o lana gaoi fakapelepitelo. 4Ti ko nei loa a kofu ala e lotou fai loa : ko se peketolale, mo se efote, mo se taupulupulu, mo se kofu fakateuteu, mo se pala, ti mo se kie nonoa. E lotou fai loa ni kofu tapu ki lou taokete ko Alone, mo ona vosa, o tupu ke lotou fai kiate au le gaoi fakapelepitelo. 5E lotou too loa ni filo aulo, mo ni filo usi, mo ni filo kula fakapouli, mo ni filo kula malie, ti mo ni filo tea makeke.
Le efote
6E lotou fai loa le efote ki le filo aulo, mo le filo usi, mo le filo kula fakapouli, mo le filo kula malie, ti mo le filo tea makeke. 7E ke fai loa i ai ni fakamailoga fakateuteu e lua i tuauma, ti ke fakapipiki loa laua ki kapa o le efote ; e lotou sosoko loa o fakatasi. 8E toe fai loa le va nonoa ofaipe le efote ki le aulo, mo le filo usi, mo le filo kula fakapouli, mo le filo kula malie, ti mo le filo tea makeke. 9E ke too loa ni fatu e lua ko le onise, ti e ke togi loa i ai a igoa o vosa o Iselaele : 10Ko igoa e ono i le tasi a fatu, ti ko igoa e ono i le lua o fatu, o mulimuli ki lolatou tupu. 11E ke togi loa i fatu e lua a igoa o vosa o Iselaele, ofaipe le togi o fatu mo mama ; ti ke fakamaumau loa laua ki le aulo. 12E ke fakapipiki loa a fatu ana e lua ki tuauma e lua o le efote, ke fakamanatu ai a vosa o Iselaele ; ti e amo loa e Alone olatou igoa i ona tuauma i mua o le Eteleno, ofaipe se tausi alofa. 13E ke fai loa ni tuiaga aulo, 14mo ni tini aulo mea e lua, ala e ke fili loa ofaipe ni maea ; ti ke fakapipiki loa a tini ki tuiaga aulo.
Le peketolale
15E ke fai loa le peketolale o le fakamaau, ko se gaoi fakateuteu a ia ; e ke fai loa a ia ofaipe le efote, ki le aulo, mo le filo usi, mo le filo kula fakapouli, mo le filo kula malie, ti mo le filo tea makeke. 16E tatau loa ona tapa e fa ti e lolua loa a ia ; ko lona loa ko le saga e tasi, ti ko lona laulasi ko le saga e tasi. 17E ke teuteui loa a ia ki ni atu fatu e fa : ko le uluaki atu, ko le saletuane, mo le topasi ti mo le emelote ; 18Ko le lua atu : ko le kelenate, mo le safile ti mo le taimane, 19Ko le tolu atu, ko le iasinita, mo le akate ti mo le ametisite, 20Ko le fa atu, ko le kilisolite, mo le onise ti mo le sasepe. Ko fatu ana e fakapipiki loa ki olatou fakamauaga aulo. 21Ko fatu loa e kau agafulu tupu lua o mulimuli ki igoa o vosa o Iselaele. E togi loa a fatu ana ko ni fakamailoga, ko le fa fatu fai mo lona igoa i igoa o famili e kau agafulu tupu lua o Iselaele. 22E ke fai loa i le peketolale, ni tini aulo mea o fili fakamaea. 23E ke fai loa i le peketolale ni fa mama aulo e lua, ti e ke fakapipiki loa a mama ana e lua ki potupotu e lua o le peketolale ; 24E ke fakaulu loa a tini aulo e lua i loto o fa kavei aulo e lua, ala i potupotu e lua o le peketolale ; 25Ti e ke fakagato loa mei mua a tini e lua o nonoa ki tuauma fakateuteu e lua o le efote. 26E ke toe fai loa ni kavei aulo e lua, o ke fakapipiki loa laua ki potupotu e lua o le peketolale, i le tapatapa leia e lave ki le efote i loto. 27Ti e ke toe fai loa mo ni iki ake kavei aulo e lua, o fakapiki ki tapatapa e lua o tuauma fakateuteu o le efote, i mua, i le sokoga, i aluga o le kie nonoa o le efote. 28E ke nonoa loa le peketolale i ona kavei ki kavei o le efote, ki se ga maea usi, o tupu ke piki le peketolale i aluga o le nonoa o le efote ti ke aua na toe mavae a ia mei le efote. 29Ka ulu loa Alone ki le sagatualio, e amo loa e ia i lona loto a igoa o vosa o Iselaele, ala kua togi i le peketolale o le fakamaau, o tupu ke taupau tuumau lolatou tausi alofa i mua o le Eteleno.
Le ulimi mo le tumimi
30Ti e ke fakapipiki loa ki le peketolale o le fakamaau le ulimi mo le tumini, ti e la pipiki loa i le loto o Alone, mo ka ulu loa a ia ki mua o le Eteleno. Ti e amo tuumau loa e Alone i lona loto le fakamaau o fanau a Iselaele, mo ka tuu loa a ia i mua o le Eteleno.
Le kofu usi
31E ke fai loa le kofu katoa o le efote ki le kie usi. 32E ke tuku loa i loto malie se mavaa ki le ulu ; ti e ke fai loa se fakamakeke o le ua talie ke aua na masae le kofu. 33E ke fakapikipiki loa ki le lalo vae o le kofu ni fuai kelenati usi, mo kula fakapouli, mo kula malie, o fakavasa latou ki ni ga pele aulo liliki : 34ko le ga pele aulo mo le fa kelenati, ti ga pele aulo ti fa kelenati, i le lalo vae katoa o le kofu. 35E tui loa e Alone le kofu lena o fai le gaoi fakapelepitelo : ka ulu loa a ia ki le sagatualio i mua o le Eteleno, peka mavae loa a ia mei ai, e logo loa ki le tagi o pele ti e leaise mate loa Alone.
Le palaa o le maokioki
36E ke fai loa se palaa ki le aulo mea, ti e ke togi loa i ai ofaipe le togi o se mama : Ko le Maokioki ki le Eteleno. 37E ke sai loa a ia ki le puloga ki se ga maea usi, i mua o le puloga. 38E tuu loa a ia i le lae o Alone, ti e amo loa e Alone a sala o fanau a Iselaele mo ka lotou momoli alatou moliga tapu i mua o le Eteleno, ti e tali loa e le Eteleno a fanau a Iselaele.
Kofu o tagata faisakilifisio
39E ke fai loa le kofu loloa ki le kie tea makeke ; e ke fai loa mo se puloga ki le kie tea makeke, ti e ke fai loa mo se kie nonoa fakateuteu.
40E ke fai loa ki vosa o Alone ni kofu loloa, ti e ke fai loa ni olatou nonoa fakateuteu, ti e ke fai loa ni olatou puloga, o tupu ke fakamailoga ai lolatou aliki ti ke lotou teu ki ai. 41E ke tui loa a teu ana ki lou taokete ko Alone, ti mo ona vosa. E ke liligi loa le lolo tapu ki olatou ulu, ti e ke fakatapui loa latou, ti e ke vaei kese loa latou, ti e lotou nofo loa o gaoi kiate au i le gaoi fakapelepitelo. 42E ke fai loa kia latou ni vavae loto ki le kie tea makeke, ke uufi ai lolatou telefua ; e ifo loa a vavae loto mei le sulugalava o kaku ki tega. 43E tui loa e Alone mo ona vosa a vavae loto ana, mo ka lotou ulu loa ki le falela, peka e lotou fakafeofi loa ki le aletale, o fai a gaoi i le sagatualio. Ti e leaise lotou sala loa, ti e leaise lotou mamate loa. Ko se lao lena ke tuu mau kia Alone mo lona sakoga i ona muli.
© Société Biblique de Genève, 2000-2020
