Loma 15
15
Keliso mali kaliva yadi yamumu fa'ina gihawahegena amine
meda omi wanahuluva.
1Ide gaveyao kavetumaganadona, gilubodada be badi tovetumagana Yesu Keliso ana vetumagana againe nuwadi aimo keke gidamahali-mo'eni ma kanavelugadi. Gavadi ide nuwanuwada ma keke kananuwenuweni. 2#Lo 14:19; 1Ko 10:24Gilubodada be ide sa'eyana sa'eyana gavadi tobohiyada nuwanuwana be yana yamumu fa'ina ma kananuwenuwena, higa vaita yana vetumagana againe kanakivetoyogina. 3#Sam 69:9Wa'ita, Keliso gavadi Tauna nuwanuwana ma keke gidanuwenuweni. Meda Veyao Tuwaina ana buki gigahe vaita Keliso Yaubada againe gidagahe gidagayo,
Kaliva O hi'ihawadamane tu yadi hawadamana Iya agaikuya gilakayemu.
Au hidede amine Keliso keke Tauna yana nuwanuwa gidanuwenuweni, au ihawadamana againe gihawahegena. 4#1Ko 10:11Gahe moya'aina tuwai-mo'ena Yaubada yana kaliva Veyao Tuwaina ana bukiya hi'etoladina-ma ide ada kivetuvetunu fa'ina hi'etoladina, be higa yada wa'atuvefa'ila kadu yada wa'asevatu Yaubada yana bukiya give'inuba-ma againe Yaubada buye kanakaiwabu ana tova kanalulubodena fa'ina.
5-6Ada au gave'o'olemi be Yaubada atuvefa'ila be asevatu giveleveleda-ma yami nuwanuwa sa'eyana ginavelemi. Seyaseya'aine wananuwanuwa tu Yesu Keliso tavagine wananauna be higa moya'aimi nuwami sa'eyana agomi sa'eyana Yaubada Bana yada Kaiwabu Yesu Keliso Tamana ma ana egana wanakilakahina.
Keliso keke miYudagaga au yo'o tulidiyao buye'i
adi Tokibababala.
7Kadu'e ganagahe. Keliso givega'aulemi amine meda omi buye wanave'avegavega'aula be higa Yaubada ana egana wanakilakahina fa'ina. 8#Af 3:25-26Wa'ita, Keliso gihobu'ela ada miYuda yama yo'o fa'imeya givetofaisewa higa vaita kanahalamanena Yaubada yana gahe au velemo'ena. Tuwai-mo'ena Yaubada bwanenemeyao kikaiwabudiyao agaidiya ime bwanenediyao ama ihagihagi fa'ina giwonadabadaba, ada au Keliso gihobu'ela be higa Yaubada gavaimi giwonadabadaba medemi ginalakayemu velemo'ena. 9#Sam 18:49Gihobu'ela be higa kadu yo'o tulidiyao kalivai-dina Yaubada yana hinekalikali fa'ina ana egana hinakilakahina. Meda Veyao Tuwaina ana buki gigahe vaita Keliso gidagahe gidagayo,
Hidema fa'ina yo'o tulidiyao hinafadiya
O ganahawadavadava,
kadu a egana ganakweliye-davadavana.
10 #
2Veh 32:43
Kadu gahe sa'eyana ma gigayo,
Omi yo'o tulimiyao kalivai-mina
badi Yaubada yana yo'o miYuda
buye wanavemwamwala.
11 #
Sam 117:1
Kadu gahe sa'eyana ma gigayo,
Omi yo'o tulimiyao moya'aimi
Kaiwabu wanadavadavana.
Omi fafali moya'aina kalivai-mina
Bana'e wanakweli-davadavana.
12 #
Ais 11:10
Kadu Yaubada bonana ana to'awatalatalaina Aiseya Yesu fa'ine gigaheye-vagahina gigayo,
Bana Devida tamana ana egana Yese
yana yo'o agaidiya kaliva ginatubuyemu.
Yaubada kalivai-nadi ginakilakahina
be yo'o tulidiyao ginavehimeyedi,
ada adi leme fa'ina Bana againe hinaluluve'avina.
Hidedemi Aiseya Yaubada yana wonadabadaba giyakahina.
13 #
Lo 14:17
Ada Yaubada wonadabadaba ide giveleda be againe adafaiweya kanaluluve'avina. Bana againe gave'o'ola be omi wanavetumaganadona yo vemwamwala kadu aseniwalova lakahina againe ginavemagami be higa Alu'aluwa Mahalina yana faiwaleya yami luluve'avina againe wanawahivemavemauga.
Folo Keliso loseyanina yo'o tulidiyao agaidiya.
14Siule tobohiyakweyao Loma againe, iya tauku ganuwave'avina vaita omi nuwanuwa hagihagidi agaidiya wamaga kadu Yesu ana vetumagana againe wanuwahuya-mo'a ada amifaiweya buye wanave'akivetuvetunu. 15-16#Lo 1:5Atu hida leta againe nuwanuwa tufoidi fa'idiya galumatamata-mo'emi higa vaita nuwami ganatalafolena. Hidede amine galumatamatami, fa'ina Yaubada yana nuwadoga againe aku vehimeya giveleku be Yesu Keliso yana tofaisewa yo'o tulidiyao kalivai-dina agaidiya giseku. Iya abaveyao ana tofaisewa amine gafififaisewa be Yaubada yana Venuwa'ata Yamumuna galulumamalena. Abaveyao ana tofaisewa yomuyomu Yaubada matane hi'ali'aliyedi amine, meda iya yo'o tulidiyao kalivai-dina Yaubada againe ga'ali'aliyedi, higa vaita badi kalivai-dina Yaubada nuwana hinakiveyamumuna ada Alu'aluwa Mahalina yana faisewa againe mahamahalidiyao hinamiyami.
17Tobohiyakweyao, Yesu Keliso gifaiwalaveleku fa'ina yaku faisewa Yaubada fa'ine gimadu ada medema fa'ina gagakahikahiku. 18-19#2Ko 3:5; Af 19:11-12E, keke ganawowomumu, au yaku faisewa fa'ina ganagahe-mo'emi. Tu keke yaku faiwala ganakilakahini. Au gavadi gavadi Keliso gifaiwalaveleku yo gafaisewana, medema ganalukahihiyena. Bana yana faiwala againe yo'o tulidiyao kalivai-dina ganuwa'abiyedi be Yaubada bonana hivenogalena. Yaku laumamala kadu yaku gugai agaidiya, abaveyaulowoga kadu aituha fifiwalana agaidiya, ada Alu'aluwa Mahalina yana faiwaleya Yaubada againe ganuwa'abiyedi. E, melala tulina tulina agaidiya Yelusalema be gina Ililikumu ana fafaliya ganunuwaliliuga Venuwa'ata Yamumuna Yesu Keliso fa'ine galumamalena be melalai-dina galuyabudi. 20#2Ko 10:15-16Tova moya'aina yaku nuwanuwa sa'eyanaga hidede amine. Gava melala gava melala agaidiya Keliso keke hidahalamaneni, medede againe nuwanuwaku lakahina Venuwa'ata Yamumuna Keliso fa'ine ganalulumamalena, be higa keke mali tolaumamala yadi faisewa ganaluvefofoni. 21#Ais 52:15Au nuwanuwaku Veyao Tuwaina ana buki gigahe amine ganahuluva gigayo,
Gaveyao keke tamo hakwadi Bana fa'ine gidavenuwa'atadi, medema hina'itahalamanena.
Ada gaveyao Bana valeyana keke hidanogalini,
medema Bana fa'ine nuwadi ginamahalina.
Au mena gahe amine kaliva yauyoga agaidiya galulumamala.
Folo melala tohiye givevaiyedi, Yelusalema Loma Sifeni.
22Tu nuwanuwaku kaliva Yesu keliso valeyana keke hidanogalini-ma agaidiya ganalulumamala fa'ina, tova moya'aina yaku ela omi miLoma agaimiya givita. 23-24#Af 19:21Atu tova hidevama hida fafali moya'aidi galuyabudi, ada malamala a gavaiyehi nuwanuwaku agaimiya gana'ela gana'itami fa'ina, gavevai be Sifeni ana fafaliya ganana againe omi agaimiya gananuve'abaga. Ganuwave'avina vaita yaku wavemwamwala iya omi buye kanamiyami-yo yakuna Sifeni againe yami veluga buye wana'atuhegeku. 25Tu tova adamoya Yelusalema againe gananauna be Yaubada yana kaliva yana vevine medede againe himimiyami-ma velekawowo adi veluga fa'ina gananauwena. 26#2Ko 8:1-2, 9:2Fa'ina tovetumagana adi yo'o Masedoniya kadu Akaiya adi fafali agaidiya yadi velekawowo badi Yaubada yana kaliva yana vevine Yelusalema againe ma yadi koyokoyo fa'idiya yadi wa'asehawahega hisena. 27Yadi wa'asehawahega hisena, ada makewa gilubodadi be mena miYuda koyokoyoi-dina hidavelugadi. Wa'ita, ide miYuda kana Yesu Keliso bonana yo'o tulidiyao kalivai-dina agaidiya kalumamalena. Ide yada laumamala againe badi keke miYuda ma alu'aluwadi yana eda kayauna be Yesu againe adi kibababala hinanuhagana fa'ina, gilubodadi be yadi mani againe ide miYuda yada koyokoyo wowodi hidanuwakabubuyena. 28Ada au hida faisewa ganaluyabuna, higa velekawowo matatabuna tovetumagana badi fa'idiya hisena-ma agaidiya ganavele-'owodi yo ganana Sifeni againe, ada yakuna againe agaimiya gananuve'abaga. 29#Lo 1:11Ada omi agaimiya gana'ela amine gahalamanena gana'ela be Keliso yana ihagihagi ganayemaunena be moya'aida velugai-nadi againe kanamaga.
30 #
Kl 4:3; 2Te 3:1-2 Tu tobohiyakweyao, Yesu Keliso yada Kaiwabu ana eganeya kadu Alu'aluwa Mahalina nuwanuwa hawahawahegana giveleda fa'ina ganagahevagadonemi be yami wa'atuvefa'ila wanave'o'oleku toyogina. 31Wanave'o'ola be Yaubada badi todibutoyoga Yudiya ana fafaliya himimiyami-ma agaidiya ginalugolegoleku. Kadu wanave'o'ola be Yaubada yana kaliva yana vevine Yelusalema againe himimiyami-ma velekawowo adi veluga fa'ina ganayemaunena ana toveya, keke hinakiloweni au yadi wanuwayamumu hinavaina. 32Ka'i hidedemi ginalakayemu be Yaubada ginahawahegeku amine o akufaiweya yaku wavemwamwala agaimiya ganalakayemu be buye kanamiyami-yo aku ayauna hagihagina gananuhagana. Au hidedemi wanave'o'oleku. 33Yaubada aseniwalova giveleveleda-ma agaimiya ginamiyami. Ehe hidedemi.
© 2003, Wycliffe Bible Translators, Inc. All rights reserved.
