Loma 14
14
Keke tobohiyamiyao a'a o kevakeva o aiyeta tabu
ana itave'avina fa'ina wana'itanuwenuwedi.
1 #
Lo 15:7
Tu tobohiyakweyao, badi Kaiwabu Yesu Keliso againe hivetumagana tu nuwadi aimo keke gidamahali-mo'eni ma fa'idiya ganalukahihi. Ka'i kaliva sa'eyana Yesu Keliso againe gihawahegena tu keke gidavetumaganadona amine o keke wanakiloweni au yami ekelesiya agaidiya wanavega'aulena, ada gavadi gavadi fa'ina givevenuwanauna, medema fa'ina keke wanavekwageyeni. 2Wa'ita, tovetumagana tufoidi hinuwanuwa vaita Yaubada gaitoma moya'aina gihawahegena be adifaiweya hina'au'ana, tu tufoidi Yesu Keliso ana vetumagana againe nuwadi keke gidamahali-mo'eni ma kevakeva fa'ina adi hawata hisena be a'agaga hi'au'ana. 3Gaveyao hinuwanuwa vaita Yaubada gaitoma moya'aina gihawahegena fa'ina hi'a'a-kawokawowo, medema keke gidalubodadi be tovetumagana hikudave'ove'o'owana-ma hina'itatagodi. Meda gaveyao hinuwanuwafani vaita Yaubada hawata tulina tulina gidaseni fa'ina hikudave'ove'o'owana, medema keke gidalubodadi be tovetumagana hi'a'a-kawokawowo ma hinahawavekoyoyedi. Fa'ina Yaubada to'a-kawokawowo kadu tokudave'o'owana yana yo'ogaga agaidiya ahe givega'auledi. 4#Md 7:1O vaita hakwadi yo mali kaliva ana agetoga yana faisewa ka'i hagihagina o ka'i koyona unalagani? Au bana agetoga ka'i gifaisewa yamumuna o ka'i koyona ma ana tovehimeya anakaibe ginalagana. Ada tovetumagana makewa yana vetumagana againe ginamidi toyogina, fa'ina ana Tovehimeya ginafaiwalavelena be ginamidi toyogina.
5Kadu'e wa'ita, tovetumagana tufoidi aiyeta sa'eyana fa'ina hinagahe hinagayo, “Hida hima aiyeta lakahina.” Tu tovetumagana tufoidi hinuwanuwa vaita aiyeta moya'aina Yaubada yana tova. Au gilubodana be kaliva sa'eyana sa'eyana gavaimi anafaiweya gidanuwanuwa-ma tauna tauna ginavehimeya. 6Hai kaliva sa'eyana ginagahe ginagayo, “Hida hima aiyeta lakahina,” medema nuwanuwana Kaiwabu ana egana ginakilakahina. Hai kaliva gi'a'a-kawokawowo, medema ginuwanuwa vaita Yaubada gaitoma moya'aina gihawahegena ada Bana againe givesivesiule-yo gi'au'a fa'ina Kaiwabu ana egana gikilakahina. Ada hai kaliva kevakeva o a'a tufona keke gida'u'ani, medema Yaubada againe givesivesiule-yo Kaiwabu ana egana gikilakahina. Medema fa'ina auwe awalava. 7-8#1Te 5:10; Fl 1:21Keke tamo hakwadi agaideya tauna yana miyami o tauna yana alika gidavehimeyeni. Ka'i wayawaida kanamiyami, au yada Kaiwabu againe kahawahawahegeda. Meda ka'i kana'alika, au yada Kaiwabu againe kahawahegeda. E, ka'i wayawaida kamimiyami o ka'i kana'alika, au ide Kaiwabu yana abavehimeya.
Keliso anakaibe yada dewa fa'ina ginalagada.
9Hidema ana inuba Keliso gi'alika be gimididi-havagi, higa Bana'e ide tovetumagana gaveyao hi'alika kadu gaveyao aimo wayawaida kamimiyami-ma ginavehimeyeda. 10#Af 17:31; 2Ko 5:10Bana Keliso ide tovetumagana moya'aida ada Tovehimeya. Mene o uvetovehimeya-yo tobohiya yana huluva ulagana? O vaita hakwadi yo tobohiya u'ita'itatagoni? Aimo tova mulina moya'aida Yaubada matane kanamidi be higa yada huluva fa'ina ginalagada. 11#Ais 45:23; Fl 2:10-11Meda aimo Yaubada yana laufata ana tova fa'ina Veyao Tuwaina ana buki gigahe gigayo,
Iya Kaiwabu gagahe. Iya Tomiya-vagata fa'ina,
yaku gahe velemo'ena. Kaliva moya'aidi Iya agaikuya
hina'ibo'ula-mo'a hinagayo, O'eni velemona Yaubada.
12 #
1Fi 4:5
Au hidede amine kahalamanena aimo ide sa'eyana sa'eyana Yaubada ada Tovehimeya matane kanayemu be yada dewa fa'ina Bana againe kanavenuwa'ata.
Tobohiyamiyao keke koyona againe wanavebe'udi.
13Tu Yaubada ada Tovehimeya fa'ina, tobohiyadeyao yadi dewa fa'ina keke kanalagadi vaita ide adi tovehimeya. Au taumiyao nuwamiya wanavehimeyemi hidede amine wanagayo, “Ka'i tobohiyaku yaku dewa gina'ita-yo nuwanuwa koyodi agaidiya ginalowoga o ka'i koyona againe ginabe'u, au dewai-nadi fa'ina ganahawataku.” 14#Af 10:15Wa'ita, iya Kaiwabu Yesu buye ave'atutamo'aima-ma kalivai-kuna ganuwave'avina higa vaita keke tamo a'a digo a'a koyona, ka'i kevakeva digo kevakeva koyona. Atu ka'i tamo hakwadi ginanuwanuwa vaita a'a sa'eyana o kevakeva sa'eyana koyona, au bana fa'ine gaitomai-nadi gikoyo be keke gina'u'ani. 15#1Ko 8:11-12Ka'i a'a o kevakeva sa'eyana vaita hawahawatana tobohiya matane ma una'ana be tobohiya gina'ita-yo kadu bana gina'ana tu muliya ase'asena gina'akolukoluna vaita ana hawata gidayawelini-yo vita ginanuhagana digo, mena ya dewa fa'ina aimo keke udanuwanuwa hagihagina tobohiya againe, au nuwana ukivevitana. Unogali, bana kalivai-nadi fa'ine Keliso gi'alika. Auwe, ya'a againe keke tobohiya koyona againe unavebe'uni be agolaufofola ginanuhagana. 16Taumiyao wana'itave'avimi be gava dewa gava dewa fa'ina omi wagahe wagayo, “Hidema dewa hagihagina,” medema mali kaliva hina'itani-yo keke hinahawavekoyoyeni. 17Ide Yaubada yana itave'avina againe kamimiyami be ase'asedeya givehivehimeya-ma ada vehimeya inubana keke a'a o ka'i bwai ana hawata. Medema gaitoma kabi'ona. Au gaitoma lakahina ma dewa yegayegana, aseniwalova, vemwamwala Alu'aluwa Mahalina againe give'inuba-ma gaitomai-dina. 18Ada gaveyao hidede amine Keliso againe hihawahawahegedi, medema Yaubada nuwana hikiveyamumuna kadu kaliva yadi hawaveyamumu hivaina.
19 #
Lo 12:18
Tu yaku nuwanuwa dobona hidede amine. Mena dewai-dina Alu'aluwa Mahalina againe hive'inuba-ma gaitoma lakahina fa'ina, gilubodada be gavadi gavadi kukuya kanasive'auyena kadu yada vetumagana againe kanave'aveluveluga, medema kanahuluhuluvina. 20Keke a'a o kevakeva vaita hawahawatana ana'a againe Yaubada yana faisewa tobohiyamiyao ase'asediya wanayawelini. Yaubada a'a kevakeva matatabuna gihawahegena, atu keke gidalubodami be a'a o kevakeva sa'eyana wana'ani-yo tobohiyami koyona againe wanavebe'uni. 21#1Ko 8:13Gavadi gilubodami? Me ka'i gava kevakeva o gava oine againe o ka'i gavadi gavadi againe tobohiyami koyona againe wanavebe'una, au gilubodami be medema gaitomai-dina fa'idiya wanahawatami.
22Hidema fa'ina kevakeva o oine o ka'i tabu tulina tulina gavaimi wanuwanuwa-ma omi'iyao tu Yaubada buye wanalukahihiyena. Keke mali tovetumagana agaidiya yami nuwanuwa wanahawavemogataleni. Hai kaliva tauna matane ginahuluva hagihagina tu muliya ana ayauna dewai-nadi fa'ina kadu hagihagina, medema yana vemwamwala gavatubuga! 23Atu hai kaliva a'a o kevakeva sa'eyana ana'a fa'ina ginuwa'amalakibo, Yaubada medema kalivai-nadi gihawavekoyoyena fa'ina yana'a keke vetumagana againe gidave'inuba. Ada gava dewa kahuluvina-ma keke vetumagana againe gidave'inuba, medema dewa koyona.
© 2003, Wycliffe Bible Translators, Inc. All rights reserved.
