Loma 16
16
Folo yana lukafoi tovetumagana tulina tulina
agaidiya giyakahina.
1Tobohiyakweyao, nuwanuwaku wanahalamanena nouda Fibi kwamayoku hagihagina. Bana tovetumagana adi yo'o agaidiya Senikeliya againe givetonagona. 2Au mene Loma againe ginayemu-yo wanavega'aulena vaita bana noumi Kaiwabu yana yo'o agaidiya omi yana kaliva mahamahalimiyao gilubodami amine. Kadu gava leme againe nuwanuwana wanavelugana, medema wanavelena, fa'ina iya givelugaku kadu kaliva vevine moya'aidi givelugadi.
3 #
Af 18:2,26 Yaku nuwakabubu Filisila wamoganedi Akwila buye, badi Yesu Keliso yana tofaisewa anafaiweya kadu iya'eku. 4Badi yawaidi hihawahegena be iya fa'ikuya kabisona hina'alika. Nuwaku givesiule agaidiya. Keke iya'ekugaga, au tovetumagana adi yo'o moya'aidi badi keke miYuda tu yo'o tulidiyao kalivai-dina badi agaidiya buye nuwadi givesiule. 5#1Ko 16:19Yaku nuwakabubu to'ekelesiya badi adi'iselu yadi manuweya hivagavaga'auta-ma agaidiya. Yaku nuwakabubu tobohiyanuwaku Efinito againe, bana Esiya ana fafali kalivana nagona Keliso againe gimidivetumagana.
6Yaku nuwakabubu bana Meli againe, bana omi hinafamiya gifaisewa toyogina. 7Yaku nuwakabubu Adulonaiko kadu Yuniyasi agaidiya, badi yaku yo'o kalivadi boi iya badi buye deliya amiyami. Kadu badi kaliva hagihagidiyao afositolo matadiya ada badi Keliso againe himidihawahegedi tu iya muliya.
8Yaku nuwakabubu Amifiliyato againe, bana tobohiyanuwaku Kaiwabu yana yo'o agaidiya. 9Yaku nuwakabubu Ebano againe, bana Keliso yana tofaisewa anafaiweya kadu ime'eyao. Kadu yaku nuwakabubu tobohiyanuwaku Sitakeso againe. 10Yaku nuwakabubu Afelesi againe, bana kaliva ka'italuveluveni-yo yana hawahega Keliso againe au toyogina ka'itana. Yaku nuwakabubu Alisitobulo yana yo'o kalivai-dina agaidiya.
11Yaku nuwakabubu Helodiyona againe bana yaku yo'o kalivana. Yaku nuwakabubu Nasiso yana yo'o gaveyao Kaiwabu againe himiyave'avina-ma kalivai-dina agaidiya.
12Yaku nuwakabubu Telaifina kadu Telaifosa agaidiya, badi vevine-dina Kaiwabu fa'ine hififaisewa toyogina. Yaku nuwakabubu nouku hagihagina Fesisi againe, bana kadu kwamayoku sa'eyana Kaiwabu fa'ine gifaisewa toyogina. 13#Mk 15:21Yaku nuwakabubu Lufasi againe, bana kalivai-nadi Kaiwabu ana tovetumagana hagihagi-mo'ena. Kadu yaku nuwakabubu Lufasi hinana agaidiya, badi kadu iya hihawavenatuneku.
14Yaku nuwakabubu Asinikelito, Filegoni, Hemesa, Fateloba, Hemasa agaidiya kadu tobohiyadeyao badi kalivai-dina buye himimiyami-ma agaidiya. 15Yaku nuwakabubu Filologo kadu Yuliya agaidiya, kadu Neleyo nouna buye'i agaidiya, ada Olimufa kadu Yaubada yana kaliva yana vevine moya'aidi badi buye himimiyami-ma agaidiya.
16 #
1Ko 16:20; 1Fi 5:14 Taumiyao wanave'alulusiule againe tobohiyamiyao wana'atulauhidi be higa yami nuwanuwa hawahawahegana wanaseyemaunena. Keliso ana tovetumagana adi yo'o tulina tulina hilukafoi agaimiya.
Folo yana kivetuvetunu kadu sa'eyana gilukahihiyena.
17 #
Ta 3:9-10
Tu tobohiyakweyao ganagahevagadonemi be badi vehawala tulina hihawavelevelemi-ma agaidiya wana'itave'avimi. Badi yadi vehawala keke vehawala Yesu Keliso yana kaliva gimidivehawalemi-ma amine, ada againe vekwageya agaimiya hivesilakahina kadu yami vetumagana hikivekoyona. Badi kalivai-dina wanamiyavehailedi. 18#Fl 3:19; 2Fi 2:3Gaveyao medede amine hivehawala, medema keke yada Kaiwabu Keliso againe hidahawahegedi, au taudiyao wowodi ana nuwanuwa ita'italuvadigana agaidiya hihawahegedi. Yadi gahe digadigagina kadu yadi bonayafayafa againe kaliva fanifanidiyao hinuwa'abiyedi. 19#Lo 1:8Tu omi'iyao ma moya'aidi yami dibumuhiga Kaiwabu Keliso ana vehawala againe valeyami hinogalina. Hidema fa'ina omi fa'imiya gavemwamwala-mo'a. Atu nuwanuwaku dewa hagihagina againe wananuwahuya tu dewa koyona wanavekwavekwavena.
20Bana Yaubada aseniwalova giveleveleda-ma Setani yana faiwala ginamadudabana be omi wanavagatagona. Yada Kaiwabu Yesu yana nuwadogeya wanamiyami.
Tovetumagana Folo buye himiyami-ma yadi lukafoi.
21 #
Af 16:1-2
Tu Timoti gilukafoiyemi, bana Yesu Keliso yana tofaisewa anafaiweya kadu iya'eku. Kadu Lusiyo ada Yesoni ada Sosifato hilukafoiyemi, badi yaku yo'o kalivadi.
22Iya Tetiyo hida leta Folo fa'ine ga'etoladina-ma yaku lukafoi Kaiwabu ana eganeya.
23 #
1Ko 1:14
Kadu Gaiyasi gilukafoiyemi, bana yana manuweya iya Folo gamimiyami, ada tovetumagana adi yo'o matatabudi bana againe hivagavaga'auta-ma kalivai-nadi. Elasito bana mani koniselo hiyaudi be bana gi'itave'avina-ma kalivai-nadi kadu tobohiyada Kwato yadi lukafoi agaimiya.
[ 24Yada Kaiwabu Yesu Keliso yana nuwadogeya moya'aimi wanamiyami. Ehe hidedemi.]
Yaubada ana kailakata.
25-26 #
Kl 1:25-26
Tu Yaubada ana egana kanakilakahina. Bana anafaiweya ginafaiwalavelemi be Venuwa'ata Yamumuna Yesu Keliso fa'ine galulumamalena-ma ana nuwanuwa amine wanahuluhuluva. Mena Venuwa'atai-nadi ma Yaubada yana vevai sevasevauyana gihawavemogatalena-ma ana nuwanuwa amine. Tuwai-lokalokana aituha a gavaiyehi kahegehegedi-ma agaidiya Yaubada yana vevai sevasevauyana Yesu Keliso fa'ine keke gidahawavemogataleni tu tova adamoya kabu'avane giyemu. E, Yaubada Tomiya-vagata givehimeya be bonana ana to'awatalatalaina yadi etoladi againe yana vevai sevasevauyana hihawavemogatalena, be higa yo'o matatabudi kalivai-dina Yaubada againe hinavetumagana be bonana hina'abina. 27#1Ti 1:17E, Yaubada Bana anakaibe Tonuwahuya-mo'a ma ana egana kanakilakahina ada Yesu Keliso yana faisewa fa'ina yana kaiwabu ginaduva-vagata tova inaga inaga keke ana abalauyabu. Ehe hidedemi.
(Iya Folo bonaku)
© 2003, Wycliffe Bible Translators, Inc. All rights reserved.
