Loma 13
13
Kabemani ana kaliva yadi vehimeya kana'itave'avina.
1 #
Ta 3:1
Tu nuwanuwaku kabemani ana kaliva fa'idiya ganalukahihi. Yaubada badi kabemani koniselo tovehimeya tulina tulina gisedi. Keke tamo hakwadi tauna yana nuwenuweya yana abavehimeya gidayemu, au Yaubada kaliva abavehimeya giveledi. Medema fa'ina moya'aida gilubodada be yada tovehimeya bonadi kana'abina. 2Yaubada yada tovehimeya gisedi fa'ina, gaveyao kabemani yadi vehimeya hikilowena, medema kaliva yadi wa'abavehimeya Yaubada gisedi-ma hivekwageyedi. Ada badi hidede amine hihuluva-ma adi matahiwadi taudiyao hikovana. 3#1Fi 2:13-14Fa'ina badi hihuluva yamumuna keke yadi tovehimeya agaidiya hinamatauta, au badi hihuluva koyona hinamatauta. Ka'i mene o nuwanuwa ya tovehimeya againe keke unamatauta? Au unahuluva yamumuna be bana ginahawaveyamumuye. 4Wa'ita, bana Yaubada yana tofaisewa be higa ami veluga fa'ina. Atu ka'i koyona wanafaisewana, au bana againe wanamatauta fa'ina abavehimeya keke gida'abi-kawowoni. Au anafaiweya matahiwadi ginavelemi. Bana'e Yaubada yana tofaisewa be higa yana ila'a guwana tovehimeyai-nadi nimane tokoyona hinanuhagana. 5Medema fa'ina gilubodami be yami tovehimeya bonadi wana'abina. E, bonadi wana'abina tu keke matahiwadi ana matautagaga fa'ina, au bona'abi gilubodami ma nuwamiya wa'ayaunena fa'ina, bonadi wana'abina.
6Kadu'e hidema fa'ina yami takesi wanaseusena. Badi yami tovehimeya adi vehimeya tulina tulina hi'ita'itave'avina againe Yaubada yana faisewa hififaisewana fa'ina, takesi yaudi ana toveya yami takesi wanaseusena. 7#Md 22:21Ada au kabemani ana kaliva koniselo tovehimeya tulina tulina gava vehimeya fa'ina hi'ela medemi wanaveledi. Ka'i takesi tulina tulina digo, takesi wanaveledi. Ka'i ve'amohimohina digo, wanave'amohimohinedi. Ka'i egana ana kailakata digo, adi egana wanakilakahina.
Keliso yana yewa'ela giluveda'ufo fa'ina,
nuwakabubu againe wanamiyami.
8 #
Md 22:39-40
Ami ketowai wanamadufatana be ginahavaina. Tu ami ketowai sa'eyana ma keke ana abalauyabu higa tova moya'aina wanave'ahawahawahega. Fa'ina hai kaliva tobohiyana fa'ina ginahawahawahega, medema Yaubada yana vehimeya Mosese awane gilakayemu-ma gi'ita'itave'avina. 9#Yem 20:13-17Tuwai-mo'ena Mosese Yaubada yana vehimeya teni gi'etoladina hidede amine. Keke una'udo keke unaluve'alika keke unakai'afu keke una'italauvadiga. Hida vehimeyai-dina kadu vehimeya velugadi matatabudi adi nuwanuwa vehimeya sa'eyana lakahina hinagene hidadauda, higa tauni unuwakabubuye amine tobohiyamomo unanuwakabubuyedi. 10#1Ko 13:5Wa'ita hai kaliva tobohiyana ginanuwakabubuyena, medema keke tobohiyana ginakivekoyoni. Medema fa'ina ka'i tobohiyadeyao kananuwakabubuyedi, au Yaubada yana vehimeya kadu yana hawata matatabudi ka'itave'avi-'owodi.
11Kadu'e meda tobohiyamiyao fa'idiya wanahawahawahega, fa'ina gava aituha againe wamimiyami ma wahalamanena. Boi Yesu Keliso againe kamidivetumagana ana toveya kanuwanuwa vaita yana yewa'ela ana tova giluveda'ufo. Mena aituhai-nadi kabisona ginalakayemu. E, ada Tokibababala yana yewa'ela ana tova giluveda'ufo-mo'a. Medema fa'ina aimo keke wanadauda. Au kaliva ahe hidauda be hi'enoviladi amine omi wanamidi be wanafaisewa. 12#Ef 6:11Kabisona bogi ginahavaina, kabisona mala ginalauna. Au uyuyu ana dewa againe kana'ilova be mahalina ana giyo kana'abina. 13#Ef 5:18Kanahuluhuluva hagihagina mahalina ana kaliva gilubodadi amine. Auwe fati ana gakahikahi kwavakwavana kadu vekwavakwava gufa laulaugina ana yu-fa'ila fa'ina. Auwe udo kadu dewa yamayamadadana. Auwe ve'amunumunuga kadu ga'uma'uma. 14#Ga 5:16Atu yada Kaiwabu Yesu Keliso againe wanavaigau. Ada dibumi koyona ana nuwanuwa ita'italuvadigadi wanaki'ilovedi be keke agaidiya wanahawahegemi.
© 2003, Wycliffe Bible Translators, Inc. All rights reserved.
