لاوئلی‌لر 1
1
یاندیرما قوربانی
1رب موسانی چاغیریب حوضور چادیریندان اونا بله ددی: 2«ائسرایئل اؤولادلارینا دانیشیب اونلارا بله دِه: ”سئزدن هر کس اؤز حیوانلاریندان ربّه قوربان گتئرنده، قوربانلیغینیزی گرک قویون-کچئدن، یا دا مال-حیواندان گتئرسئن.
3اگر یاندیرما قوربانی قویون-کچئدندئر، گرک عیبسئز اِرکَک بئر حیوان اولسون. قوربانی گرک حوضور چادیرینین گئرئشئنده تقدئم اتسئن کی، ربّئن حوضوروندا مقبول اولسون. 4او آدام گرک اَلئنی یاندیرما قوربانینین باشینا قویسون کی، قوربان، اونون حاقّیندا کفّاره کئمی قبول اولونسون. 5او، گامیشی ربّئن حوضوروندا کَسسئن. هارون نسلئندن اولان کاهئنلر، گرک قانی تقدئم ادئب، او قوربانگاهین هر طرفئنه سَپسئنلر کی، حوضور چادیرینین گئرئشی یانیندادیر. 6سونرا او آدام یاندیرما قوربانینین دَرئسئنی سویوب، قوربانی تئکه-تئکه دوغراسین. 7کاهئن هارونون اؤولادلاری قوربانگاهدا اود قالاییب، اوستونه اودون قویسونلار. 8سونرا هارون نسلئندن اولان کاهئنلر، بو تئکه‌لرله گامیش بالاسینین باشینی و پئیئنی قوربانگاهین اودونلاری ائله قالانان اود اوستونه دوزسونلر. 9لاکئن قوربانین ائچ‌آلات و آیاقلارینی او آدام سو ائله یوسون. کاهئن بونلارین هامیسینی قوربانگاهدا توستوله‌دئب، یاندیرما قوربانی یاندیرسین؛ بو ربّه خوش عطئر اوچون، اودلا تقدئم اولونان قورباندیر.
10آمّا اگر اونون یاندیرما قوربانی قویون-کچئدندئر، گرک عیبسئز اِرکَک حیوانی گتئرسئن. 11اونو قوربانگاهین شئمال طرفئنده، ربّئن حوضوروندا کَسسئن؛ هارون نسلئندن اولان کاهئنلر حیوانین قانینی قوربانگاهین هر طرفئنه سَپسئنلر. 12سونرا او آدام حیوانی، باشی و پئیی ائله بئرلئکده، تئکه-تئکه دوغراسین؛ کاهئن ده قوربانی قوربانگاهین اودونلاری ائله قالانان اود اوستونه دوزسون. 13آمّا ائچ‌آلاتی و آیاقلارینی او آدام سو ائله یوسون. کاهئن بونلارین هامیسینی تقدئم اتسئن و قوربانگاهدا توستوله‌دئب یاندیرسین. بو، یاندیرما قوربانی‌دیر؛ بو ربّه خوش عطئر اوچون، اودلا تقدئم اولونان قورباندیر.
14آمّا اگر اونون ربّه یاندیرما قوربانی، قوشدان عئبارتدئر، او زامان قوربانی قومرولاردان یا دا گؤیرچئنلردن گتئرمه‌لی‌دئر. 15کاهئن اونو قوربانگاها گتئرسئن، بوینونو اوزوب، باشینی قوربانگاهدا توستوله‌دئب یاندیرسین؛ اونون قانی گرک قوربانگاهین یان طرفئندن آخیدیلسین. 16کاهئن قوشون چئنه‌دانینی فضله‌لری ائله چیخاردیب، قوربانگاهین شرق طرفئنه، کوللویه آتسین. 17سونرا قوشو قانادلاریندان پارچالاسین، آمّا ائکی یره بؤلمه‌سئن. بوندان سونرا کاهئن قوشو قوربانگاهدا اودونلا قالانان اود اوستونده توستوله‌دئب یاندیرسین؛ بو ربّه خوش عطئر اوچون، اودلا تقدئم اولونان قورباندیر.
© Elam Ministries 2013. All rights reserved.
