لاوئلی‌لر 2
2
تاخیل تقدئمی
1کئمسه ربّه تاخیل تقدئمی گتئرسه، تقدئمی نارین اون اولسون، اوستونه ده یاغ تؤکوب، کوندور قویسون. 2اونو هارون نسلئندن گلن کاهئنلره گتئرسئن. کاهئن بئر اوووج نارین اونلا یاغ و کوندورون هامیسینی گؤتوروب، قوربانگاهدا خاطئره تقدئمی اولاراق توستوله‌دئب یاندیرسین؛ بو ربّه خوش عطئر اوچون، اودلا تقدئم اولونان قورباندیر. 3تاخیل تقدئمئنئن قالان حئصّه‌سی هارونلا اؤولادلارینا عایید اولسون. بو حئصّه رب اوچون اودلا اولونان تقدئملردن لاپ موقدّسی‌دئر.
4تندئرده پئشئرئلمئش تاخیل تقدئمی گتئرنده، یاغلا قاتیشمیش نارین اوندان دوزَ‌لمئش مایاسیز فطئرلر، یا دا اوستونه یاغ سورتولموش مایاسیز کولچه‌لر تقدئم ات.
5اگر تقدئمئن ساجدا پئشمئش تاخیل تقدئمی‌دئر، گرک نارین اوندان، مایاسیز و یاغلا قاتیشمیش اولسون. 6اونو تئکه-تئکه اده‌جکسن و اوستونه یاغ تؤکه‌جکسن. بو، تاخیل تقدئمی‌دئر.
7اگر تقدئمئن تاوادا پئشَن تاخیل تقدئمی‌دئر، او گرک نارین اون و یاغلا حاضیرلانسین.
8بو شیلرله حاضیرلانان تاخیل تقدئمئنی ربّئن یانینا گتئرنده، او گرک کاهئنه ورئلسئن و کاهئن تقدئمی قوربانگاها آپارسین. 9کاهئن بو تاخیل تقدئمئندن، خاطئره تقدئمی اولان اون پایی گؤتوروب، اونو قوربانگاهدا توستوله‌دئب یاندیرسین؛ بو ربّه خوش عطئر اوچون، اودلا تقدئم اولونان قورباندیر. 10تاخیل تقدئمئنئن قالان حئصّه‌سی هارونلا اؤولادلارینا عایید اولسون. بو حئصّه اودلا ربّه اولونان تقدئملردن لاپ موقدّسی‌دئر.
11ربّه گتئردئیئن هچ بئر تاخیل تقدئمی، مایالی خمئردن حاضیرلانماسین. ترکئبئنده مایا و یا بال اولان تقدئم رب اوچون گتئرئلسئن. توستوله‌دئلئب یاندیریلماسین. 12محصولون ائلک ثمرئنی ائلک محصول تقدئملری اولاراق ربّه گتئرئن. آمّا خوشا گلن عطئر کئمی قوربانگاهدا تقدئم اولونماسین. 13تاخیل تقدئملرئنئن هر بئرئنی دوزلا؛ بله‌جه تارینین عهدئنئن دوزونو تاخیل تقدئمئندن قییما؛ بوتون تقدئملرئنی دوزلا.
14اگر سن ربّه نوباریندان تاخیل تقدئمئنی گتئرئرسن، اوندا تزه تاخیل باشلارینی اوددا قوووروب، یارماسینی نوبار تاخیل تقدئمی اوچون تقدئم ات. 15اونون اوستونه یاغ تؤک، کوندور قوی. بو، تاخیل تقدئمی‌دئر. 16کاهئن بئر آز یارمانی یاغی ائله گؤتوروب، بوتون کوندورو ائله اونون خاطئره تقدئمئنی توستوله‌دئب یاندیرسین؛ بو ربّه خوش عطئر اوچون، اودلا تقدئم اولونان قورباندیر.
© Elam Ministries 2013. All rights reserved.
