Yohane 14
14
Yesu yuyo inzila ya ukughenda kwa Baba
1“Mleke kughanzika mna imimoyo yenu, mwomtoghola Imlungu, pfipfila mnitoghole na nene. 2Mng'anda mwa Aba wangu mna pfiheleto pfingi, ing'awile si pfipfo baye ning'awalongele, mana noghenda kuwaandalila hanu henu. 3Na ning'aghenda, na kuwaandalila hanu henu, nitsowoyila nimsoleni, ili ahala hanikala nene, na mwemwe mkale baho. 4Na akula kwanighenda, inzila mwemwe mwuimanya.” 5Tomasi kamghutsa, “Ghwemtwatsa, twetwe ng'atumanyile baye kwani kwaughenda, lelo inzila tuimanyatse?”
6Yesu kamwidika, “Nene na inzila, na ukweli, na ugima. Haduhu munu iyodaha kughenda kwa Baba bila kubitila kuna nene. 7Tsamng'animanyile nene, pfipfila mng'ammanyile Aba wangu; na kulawa sambi mwommanya na mmwona.”
8Filipi kamlongela, “Ghwemtwatsa, utulanguse Baba, acho chicho chatumbama.”
9Yesu kamlongela, “Filipi, nene nikala namwe matsuwa mengi, ghweghwe ung'ali ng'una unimanye baye? Imunu wowose iyambonile nene kamwona Baba. Lelo hebari ghweghwe ulonga, 'Tulanguse Baba?’ 10Apfi ghweghwe ng'utoghola baye ka nene namghati mwa Baba, naye Baba kamghati mwangu? Tsimbuli tsanilonga si tsangu baye,” ila Baba iyokala mghati mwangu kosang'ana tsing'onde tsake. 11Mnitoghole haniwalongela nene namghati mwa Baba naye Baba kamghati mwangu. Ana ng'amlitoghola alyo, togholani kwa ajili ya tsisang'ano tsenyegho. 12Nowalongela kweli ghendo, imunu iyonitoghola nene tsisang'ano tsanitenda nene, yeye naye katsotsitenda, kuya katsotenda hata pfinu pfikulu kubita apfino, kwaapfila nene noghenda kwa Aba wangu. 13Namwe mng'alomba chochose kwa litaghwa lyangu nitsowatendelani, ili Aba yatunitsighwe kubitila Imwana. 14Hamtsonilomba chinu chochose kwa litaghwa lyangu, nene nitsowatendelani.
Yesu kolonga katsowaghalila Iloho Yelile
15“Mwemwe mng'anikunda, mtsoghakinda ghamalaghitso ghangu. 16Na nene nitsomlomba Aba, naye katsomwing'ani Mwapfila yungi, iyatsokala namwe ghamatsuwa ghose ing'aghohupa. 17Ayo Iloho wa kweli, ayula iwanu wa isi ng'awodaha baye ukumbokela kwaapfila ng'awomwona baye, wala ng'awomtanga baye. Lekeni mwemwe mwomtanga, kwaapfila kokala namwe, naye katsakuwa mghati mwenu.
18“Sitsowaleka mwawachuwa baye, nakutsa kuna mwemwe. 19Bado chipindi chidodo ichikutsa iwanu wa isi ng'awatsombona keli baye, lekeni mwemwe mtsombona; kwaapfila nene nokala mgima, pfipfila namwe mtsokala wagima. 20Mna litsuwa alyo mtsomanya nene namghati mwa Aba wangu, namwe mwamghati mwangu, na nene namghati mwenu.
21“Imunu ayula iyobokela ghamalaghitso ghangu na kughatenda, ayo yuyo iyonikunda. Naye iyonikunda nene Aba wangu katsomkunda, pfipfila na nene nitsomkunda na nitsebonesa kuna yeye.” 22Yuda, si Yuda Iskarioti baye, kaghutsa, “Ghwemtwatsa, hebali ubama kwibonesa kuna twetwe tuliyeka na si kwa iwanu wa isi yose baye?” 23Yesu kamwidika, “Imunu yang'anikunda nene katsoghatenda ghamalangulitso ghangu, na Aba wangu katsomkunda; kuya nene na Aba wangu tutsomtsila na kukala naye. 24Munu wowose ing'ayonikunda nene ng'oghatenda baye ghamalangulitso ghangu; na ghamalangulitso ghamhulika si ghangu baye, ila gholawa kwa Aba iyanitumile.
25“Aghano nimlongelani haning'ali nikala namwe. 26Lekeni ayo Imshauri, Iloho Yelile, Baba iyatsomghala kwa litaghwa lyangu, katsowalangulitsa mmanye ipfinu pfose, na kuwatenda mkumbuke chila chinu chaniwalongele.
27“Nowalekela amani, amani yangu noweng'a; na nene siweng'a kama isi pfaitendagha baye. Mleke kughanzika mmoyo mwenu, wala mleke kuwa na wogha. 28Tsamhulika haniwalongele, ‘Nakuka, kuya nitsowatsila.’ Tsamng'anikundile mng'adeng'elele nene ukughenda kwa Baba, kwaapfila Baba mkulu kubita nene. 29Lelo niwalongela ng'ana ghalawile, ili haghatsolawila mdahe ukutoghola. 30Nene sitsolonga keli namwe mbuli nyingi baye, kwaapfila imkulu wa iisi aino kakutsa, naye kahela chinu kuna nene, 31Lekeni iwanu wa isi wamanye ka nene nomkunda Baba, na kama apfila Aba wangu pfayanilaghitse pfipfo pfanitenda.
Haya, mwinuke tukeni.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yohane 14: LBV
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Pioneer Bible Translators and The Word For The World
Laghano Lya Sambi Kwe Iwanu Wose ಬಗ್ಗೆ ಇನ್ನಷ್ಟು ತಿಳಿಯಿರಿ
