Yohane 13
13
Yesu kowanawisha ghamaghulu wanafunzi wake
1Tsa ichihungo cha Pasaka ng'ana chipfike baye, Yesu kamanya saa yake ya ukuka kulawa isi aino na kughenda kwa Aba wake ipfika, naye tsakawakunda ng'ani iwanu wake iwali muisi, na kawakunda pfikomkom ghendo. 2Hawang'ali wakuja ichijo cha nemihe, Ibilisi, kamwingila Yuda, imwana wa Simoni Isikarioti mna ghumoyo ghwake, yambiduke Yesu. 3Yesu kamanya kama Aba keka ukulu wose mna ghamoko ghake, na ka kalawila kwa Imlungu na kakuya kwa Imlungu. 4Apfo kenuka hana ichijo, keka hambali ghamagwanda ghake, kasola tambala keyoha mchuno. 5Kuya kaghela matsi mna libeseni, kandusa kuwanawisha ghamaghulu wanafunzi wake, na kuwabaghusa kwa litambala lyayeyohile mchuno.
6Hayapfikile kwa Simoni Petiri, ayo kamghutsa, “Ghwemtwatsa, ghweghwe ghendo uninawishe ghamaghulu nene?”
7Yesu kamwidika'kalonga, “Chanitenda, sambi ghweghwe ng'uchimanya baye, lekeni kutsochimanya hambele.”
8Petiri kalonga, “Mbe, ng'utsoninawisha baye ghendo ghamaghulu ghangu!”
Yesu kamwidika, “Ana sikunawishe ng'utsakuwa na undughu na nene baye.”
9Baho Simoni Petiri kamwidika, “Ghwemtwatsa, ana ni pfipfo, uleke kuninawisha ghamaghulu ghangu ghaliyeka, ila uninawishe hamwe na ghamoko ghangu na litwi lyangu!”
10Yesu kedika, “Imunu yoghile kobamighwa yanawe ghamaghulu ghaliyeka, kwa apfila ayo kela ilukuli lwose. Mwemwe mwela, ila si wose baye.” 11Kalonga apfo, “Si mwemwe wose imwelile baye”, kwaapfila tsakamanya munu wachi iyoghenda kumbiduka hambele.
12Hayamalitse ukuwanawisha ghamaghulu ghawo, kapfala keli ghamagwanda ghake, kakala hanu hake, kawaghutsa, “Apfi, mghamanya agho ghaniwatendele?” 13“Mwonikema nene “Mlangulitsi” na “Imtwatsa”, mwotenda ghoya, kwaapfila apfo pfipfo pfanili. 14Lelo, kama nene yanili Imtwatsa na Mlangulitsi, niwanawisha mwemwe ghamaghulu, namwe mwobamighwa pfipfila mwinawishe ghamaghulu, chila munu yamnawishe miyaghe. 15Nimlangusani ichinu cha ukutenda, namwe mtende pfipfo pfaniwatendele mwemwe. 16Nowalongelani kweli ghendo, imtumwa si mkulu kubita imtwatsa wake, wala imsenga si mkulu kubita ayula iyamtumile. 17Lelo kwa apfila mwopfimanya ipfinu apfino, mtsobweda ka mwopfitenda.
18“Siwalonga mwemwe wose baye, nowamanya awala yaniwasaghule. Lekeni leka Ghamaandiko ighelile ghatimile, igholonga, ‘Imunu yanikuja naye ichijo kanyinulila ichisegheyu chake.’
19“Nowalongela aghano sambi ng'ana ghalawile, ili haghatsolawila mdahe ukutoghola ka ‘Nene nayuyo.’ 20Nowalongelani kweli ghendo, wowose iyombokela imunu yanimtuma konibokela nene, na wowose iyonibokela nene kombokela ayula iyanitumile.”
Yesu kotabili imunu iyatsombiduka
(Mat 26:20-25; Malk 14:17-21; Luk 22:21-23)
21Yesu hayamalitse ukulonga apfo, kaghanzika ng'ani mna iloho yake, kalonga, “Nowalongela kweli ghendo, yumwe mna mwemwe katsonibiduka!”
22Wanafunzi wake welolesa, lekeni ng'awamanyile baye yang'ali yomlonga nani. 23Mwanafunzi yumwe, iyakundeighwe na Yesu, tsakakala habehi naye. 24Simoni Petiri kampfinyighitsa na kulonga, “Mghutse, yomlonga nani.”
25Baho imwanafunzi ayo kaseghela habehi ghendo na Yesu, kamghutsa, “Gwemtwatsa, umlonga nani?”
26Yesu kamwidika, “Imunu ayula yanimwing'a ichihande cha ichighate chanitsunika mwibakuli, ayo yuyo.” Kuya kasola ichihande cha ichighate, katsunika, kamwing'a Yuda, imwana wa Simoni Iskarioti. 27Bahala Yuda hayabokele ichihande cha ichighate, Setani kamwingila. Kuya Yesu kamlongela, “Chaubama kutenda, tenda himahima, uleke kukawa!” 28Lekeni mna awala iwang'ali wakuja ichijo hamwe naye, haduhu hata mnu yumwe iyamanyile hebali Yesu tsayamlongele apfo. 29Kwaapfila Yuda tsakakala mkindamkoba ghwa isendi, wangi wapfikitsa Yesu kamlongela yaghende kughula ipfinu ipfibamighwa mna Ichihungo, au ukuweng'a chinu iwahingwa. 30Bahala Yuda hayabokele ichihande cha ichighate, kalawa kunze. Tsaikala nechilo.
Laghitso lya sambi
31Yuda hayokile, Yesu kalonga, “Lelo katunyighwa Imwana wa Adamu, na mghati mwake Imlungu naye katunyighwa. 32Ka Imlungu katunyighwa mghati mwa Imwana, Imlungu naye katsomtunya Imwana mghati mwake imwenyegho, na katsomtunya hima ghendo. 33Wanangu, ning'ali namwe kwa chipindi chidodo. Mtsonibama, lekeni kama pfaniwalongele Wayahudi, nowalongela na mwemwe, ‘Kwanighenda ng'amdaha kutsa baye.’ 34Lelo noweng'a laghitso lya sambi, Mwikunde. Ka pfaniwakundile nene, namwe mwikunde pfipfo. 35Mng'atenda apfo, iwanu wose watsomanya ka mwemwe mwa wanafunzi wangu, hamwitsekunda mwemwe kwa mwemwe.”
Yesu kotabili Petiri pfayatsomhunduka
(Mat 26:31-35; Malk 14:27-31; Luk 22:31-34)
36Simoni Petiri kamghutsa, “Ghwemtwatsa, ughenda kwani?”
Yesu kamwidika, “Kwanighenda ng'udaha baye sambi kuniwinza, lekeni kutsoniwinza hambele.”
37Petiri kamghutsa, “Ghwemtwatsa, heule sidaha kukuwinza sambi? Nene hata ugima wangu nitsoulapfa kwa ajili yako!”
38Yesu kamwidika, “Ghweghwe kodaha kundapfila nene ugima wako? Nokulongela kweli ghendo, ng'ana ijogholo yeke, ghweghwe kutsonibela mala ndatu!
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Yohane 13: LBV
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Pioneer Bible Translators and The Word For The World
Laghano Lya Sambi Kwe Iwanu Wose ಬಗ್ಗೆ ಇನ್ನಷ್ಟು ತಿಳಿಯಿರಿ
