Nnwẹr s'Osenga 24
24
Ẹyaakha ch'echekha
1Ma wọ, Ọvaar Ubinọkpaabyi obeni Mosẹs bẹ́, “Tima Aarọn, ọttạra Nadab, ọttạra Abihu, ọttạra adecho arạbh attaan ukuma jobh p'Israẹl akwu. Abạnga aninga edenibhir akpobh-m. 2Mosẹs mạnkkeni wọ m'osenga ọgbaara Ọvaar Ubinọkpaabyi. Ayok mbọkha nạngẹ fạfor-afor. Ọnạng wạnọ-wạnọ nạngẹ Mosẹs abẹ ọttạra uvura okpecho o.”
3Masẹ Mosẹs ofon ọta ọkpaak anạng p'Israẹl idik nnọ phyibh s'Ọvaar Ubinọkpaabyi ọkpaakhẹ, ọttạra nnyina sẹ, abẹ abhina okpe gwạnọ bẹ́, “M'ansi udik kwidede usi kw'Ọvaar Ubinọkpaabyi kk'obena e.” 4Ma wọ, Mosẹs n'ọkkẹrẹ udik kwidede kw'Ọvaar Ubinọkpaabyi kk'ọkpaakha.
Ubina k'ekpekpebha, usi ijabyi k'okpecho-rin, ọbạra ọtạkha mkpommachi s'ata jobh-kamfa ofo, s'iter mfonamma jobh-kamfa s'Israẹl.
5Ma wọ, Mosẹs ọtọhmọ adikkobh p'Israẹl bẹ́, abẹ ata anạng Ọvaar Ubinọkpaabyi nnạnga ikkạmasẹ, abẹ abạra atima abhaamva afọhnọ ẹja ch'ẹnạnga ch'ẹgbạkha anạng Ọvaar Ubinọkpaabyi. 6Mosẹs ọtạk isẹ nnọ rạnẹ oge k'agbangbang, ọtạkha nnọkha owobhu k'ijabyi. 7Ma wọ, ọtạk Nnwẹr s'Echekha oyeri ọnạng anạng p'Israẹl. Abẹ abhina bẹ́, “M'ansi udik kwidede usi kw'Ọvaar Ubinọkpaabyi kk'obena e. M'ansạkha echo ọsạkha annạng-ẹ e.”
8Ma wọ, Mosẹs ọtạk isẹ nnọ owobhu anạng mbọ. Oben bẹ́, “Maa wọ ode isẹ s'echekha ch'Ọvaar Ubinọkpaabyi kk'bạnga abẹ ọkhaama, otor k'idik nna phyibh.”
9Ma wọ, Mosẹs ọttạra Aarọn, ọttạra Nadab, ọttạra Abihu, ọttạra adecho arạbh attaan ukuma jobh p'Israẹl afon, 10ata ase Ubinọkpaabyi kw'Israẹl. Ibyi s'ọbyạrẹ mfhok ide masẹ ọgbarẹ kw'abẹ atim ata p'saphiya asi, s'ittaanẹ masẹ ọrạngkpakpa. 11Okhenka, Ubinọkpaabyi adecho mbọ p'Israẹl ipyibha núsia. Abẹ ase Ubinọkpaabyi, abẹ achi, abạra agwo.
12Ma wọ, Ọvaar Ubinọkpaabyi n'obeni Mosẹs bẹ́, “Ọma vura kwu k'okpecho, aninga ma. M'nnạng-ọ atakpa p'kk'nnyina ọttạra ntọhna nkkẹra, s'm'akpebhi bẹ.” 13Ma o, Mosẹs ọttạra Joshua kw'n'otor-ẹ ọtọhm, afona. Mosẹs uvura k'okpecho kw'Ubinọkpaabyi. 14Mosẹs oben adecho mbọ bẹ́, “Abạnga aninga maa atik, tạrr amkpa nnạm. Aarọn ọttạra Hur m'aninga bạnga abẹ maa. Ọnạng kwidede kw'ọkhaam udik oyok abẹ, tte okhebha bẹ.”
15Masẹ Mosẹs uvur k'okpecho nwọ, ebona ẹfhạrọ wẹ. 16Abạrada p'Ọvaar Ubinọkpaabyi asạkha ma okpecho okpecho kw'Sinai. Ebona njọ ẹfhạrọ okpecho k'iwu isajạnẹ. Ottonga iwu isenọfa, Ọvaar Ubinọkpaabyi oyeri Mosẹs k'ebona ẹtaanga. 17K'achen p'anạng p'Israẹl, abạrada p'Ọvaar Ubinọkpaabyi k'okpecho k'ẹrong, ade masẹ ekpon ẹkkạmọ ọttọhk tạrr apfẹ udimi. 18Ma wọ, Mosẹs ọnwa k'ebona njọ ẹtaanga masẹ uvur k'okpecho. Wa uning ma iwu arạbh afa, ọttạra nnunguwu arạbh afa.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Nnwẹr s'Osenga 24: mfn-x-os
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
©️2025 West Africa Christian Mission