Nnwẹr s'Osenga 23
23
Nnyina s'aponga-kpaara p'ator-otor ọttạra ikwosi
1“Afhạra k'nákpaak akpaanga. Ubyibyanạng káttạra abe nttẹnsẹ kw'afhạra.
2“Ọsaabh kátwạn asi udik kw'nạn otora. Okpe kw'abe nttẹnsẹ k'osobhchọhm, ọsaabh k'asaana atima afhạra abhạkhẹ iponga. 3Ukpukpora k'ichen kárạbh, abe-ẹ k'nnạm asi afhạra k'okpe kw'obe iponga sẹ.
4“De ase ẹbhaam, ọbạra ode ẹnyạnyaang ch'ọwawunanạng kwọ ch'etten eden, ọbaan bẹ́, avạkha chẹ akkena oyeni. 5De ase ẹnyạnyaang ch'ọwawunanạng kwọ etto ẹtọhkha achẹ, chẹ káseng arik; ọbaan bẹ́, akkaana chẹ oseng k'oyeni.
6“Iponga s'ijibhi ukpukpora kávạkha abhạkhẹ k'esobh. 7Ọnạng udik kábọhma. Ọnạng kw'mbọhk sẹ iwur-uwur ọttạra kw'ọkpaakhẹ udik ọkka káfhọ, khiri ọnạng kw'iponga ipyibhi ọbọhk mạ́ntte. 8Ngwu kachi o, khiri ngwu n'ikpa ọnạng achen bẹ́, nạngẹ udik ọkka ose, ibạra ivạkha itọhnga s'ọnạng kw'otor-otor ibhạkhẹ.
9“Abạnga ukhikhennạng irem kánạng o. Abạnga asong oche ma kw'ikhikhennạng ẹmma ikpira, s'uwa abạnga kk'akhikhennạng adia k'Ijip.
Nnyina s'ẹyọngkwokha-kpe
10“Abạnga atubh iwonu k'icho isajạnẹ, abạnga abạra aphya ekpo p'abạnga atubhu. 11Okhenka, ottong icho isenọfa, abạnga atte isisek ọbọhk itạm, abạnga ọttọhk vạnọ-vạnọ ma kási, fidede f'omeni ma m'ode uchiattọhk ọnạng akpukpora p'arukhu bạnga abẹ. Mkpaten m'ibạra ichi ekpo py'abẹ atạk arik. Abạnga m'asi ukhira ngwọ ọttạra iwonu s'abạnga s'agrep, ọttạra s'oliv.
12“Abạnga asi ọtọhm k'iwu isajạnẹ, okhenka, ottong iwu isenọfa abạnga ọtọhm kási, ọfha mmaam sabạnga, ọttạra nnyạnyaang sabạnga ikwokha ọyọhng; ọttạra bẹ́, abira p'n'asi itọhm anạngẹ bạnga, ọttạra akhikhennạng, abạra annemi ifor.
13“Abạnga atạkha okpe asi idik nna phyibh s'kk'bạnga mkpaakha. Abạnga ache p'akha káyeri; tte ọnạng nạngẹ ache p'akha mbọ bhạbhaang ọbhaang kạbạnga k'ẹmma.
Nnobha ntaan s'icho
14“Nden nttaan k'icho kwidede, abạnga m'asi erobha ch'ottennebh anạng-m.
15“Abạnga asi Erobha ch'Brẹd kw'abẹ nạn yist nágia, anạng-m. K'iwu isenọfa, abạnga m'achi brẹd kw'abẹ nạn yis nágia, koche kw'ntọhnọ bạnga. Abạnga asi erobha njọ k'okpe kw'ọbaan bẹ́, abạnga asi, k'ophye kw'Abib, ukwuru bẹ́, ma ophye nwọ wọ kw'uwa abạnga abin k'Ijip.
“Ọnạng wạnọ-wạnọ nạngẹ abọhk-kpakpa utim ukwu obe-m k'ititikha o.
16“Abạnga m'asi Erobha ch'Iphya ọttạra acheden-chidwuk py'ekpo p'abạnga atubhu k'iwonu sabạnga.
“Abạnga m'asi Erobha njọ ch'iphya s'ikpong nnạm k'icho, k'okpe kw'abạnga kk'iphya s'iwonu sabạnga asia.
17“Nden nttaan k'icho, ajunung phyi-phyibh m'ayin Aro Ọvaar Ubinọkpaabyi k'ititikha.
18“Abạnga khaam isẹ s'ibin k'ẹjafọhnọ kánạng, ọttạra ọttọhk f'abẹ age yist.
“Abạnga iyaak s'nnạnga saam s'erobhawu káchok tạrr iwu echobha.
19“Abạnga atima acheden-chidwuk pyabạnga py'ede ẹkka-pẹ p'abạnga aphya k'iwonu sabạnga, akwu k'ọchọhm kw'Ọvaar Ubinọkpaabyi kw'ode Ubinọkpaabyi kwạbạnga.
“Abạnga abasi p'ivu kátima awọhn uvunwa.
Oseng-eden kw'Ubinọkpaabyi m'uchi bạnga eden
20“Kkeri e, amma m'ntọhm oseng-eden kwaam uchi bạnga eden, ọfha okkeri bạnga s'abạnga m'asenga k'eden tạrr abạnga akpira k'ibyi nnọ s'kk'ndia. 21Abạnga akhọhm-ẹ itọhng, abạra asạkha echo anạng-ẹ. Abạnga khẹ udik kákhaanga o, khiri idik-kaanga chabạnga múbina ọnạng e, ukwuru bẹ́, eche chaam ining abẹ ma. 22De abạnga atạk okpe akhọhmọ itọhng anạng-ẹ k'idik s'm'ọkpaak, abạnga abạra asi udik kwidede kw'mkpaakhẹ, amma m'nde ọwawunanạng kw'awawunanạng pabạnga, m'mbạra nnengi ifor saam k'anạng p'nạn bạnga abẹ nábua. 23Oseng-eden kwaam m'uchi bạnga eden, m'utima bạnga ọnwa k'isek s'Amọr, ọttạra aHet, ọttạra aPẹriz, ọttạra aKenaan, ọttạra aHiv, ọttạra aJẹbus. M'dimi bẹ phyi-phyibh. 24Abạnga echo kátwunga anạng akha pabẹ, abạnga pyẹ kákpobha. Abạnga usisi kwabẹ kábạra ator. Abạnga avọhkhọ akha mbọ pyabẹ, abhạkhẹ atwukh-utwukhu. 25Abạnga akpobha amma Ọvaar Ubinọkpaabyi, kw'nde Ubinọkpaabyi kwabạnga. Amma m'ndo uchiattọhk fabạnga, ọttạra asi pabạnga. Amma m'nnengi ikhạmana k'ikhaana sabạnga mmạrẹ, 26ikwanạng wạnọ-wạnọ kw'ifhạr m'iyin, kw'm'ọbạra ode ujidim k'isek sabạnga kóde. Amma m'nnạng bạnga akpen p'adum-udum.
27“Amma m'ntọhm ojora faam uchi bạnga eden, mbạra nge ẹkhạma ch'irim bạnga abẹ k'dạmadạma. M'nsi awawunanạng pabạnga arạbh bẹ́ phyibh. 28M'ntọhm agbạrandwạng achi bạnga eden ẹta ikhubh aHiv, ọttạra aKenaan, ọttạra aHet k'abạnga k'ititikha. 29Amma anạng mbọ k'cho gwạnọ mạ́nkubh, deja, isisek nnọ m'ide bẹ́ khạraang, mkpaten m'ikwu isaabh iyọhnga bạnga. 30Amma m'nkubh bẹ sạsạkhẹ-sạsạkhẹ tạrr ukpira k'okpe kw'abạnga kk'asaabha k'oche kw'abạnga m'atạkha isisek nnọ.
31“Amma m'nge nnem sabạnga tạma k'Ẹraanga-khora tạrr ukpira k'Ẹraanga-diden ch'aPhilistiya, abạra atạma k'ibyi s'owor tạrr ukpira k'ọraanga kw'aYuphrates. M'ntte anạng p'arukhu ma isisek nnọ ọbọhk nnạng bạnga, abạnga akhubh bẹ atwukhọ ororo. 32Abạnga echekha kátạkha anạng mbọ abẹ, ọttạra ikha sabẹ. 33Abạnga bẹ ọbọhk kátte aruk k'isisek sabạnga, deja, abẹ m'asi bạnga asi ikhọngkwuru-dik k'akhaam k'ititikha, ukwuru bẹ́, k'udik ọkka, ekpobha ch'akha pabẹ m'ede ibyibyia ẹnạng abạnga ma.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Nnwẹr s'Osenga 23: mfn-x-os
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
©️2025 West Africa Christian Mission