Nnwẹr s'Osenga 25
25
Nnạnga s'ibyirukhasẹ s'Ubinọkpaabyi usi
1Ọvaar Ubinọkpaabyi obeni Mosẹs bẹ́, 2“Kpaak anạng p'Israẹl bẹ́, ọnạng-ọnạng okken-m ẹnạnga. M'atạkha ẹnạnga njọ k'ọnạng kwidede kw'utwu-ẹ k'ettem bẹ́, ọnạng-m ẹnạnga. 3Nnạnga s'm'atạkha kabẹ k'mbọhk ide: gol, ọttạra silva, ọttạra brons, 4ọttạra ndikhi s'ide blu, ọttạra s'ikhoru ichicho, ọttạra s'ikhoru isisẹ, ọttara ndikhi iyokhasẹ ikkasẹ, ọttạra avu-phyạbha, 5ọttạra atenkpa p'arạkhạmaan-dim sabẹ afokhu asi-khora, ọttạra atenkpa akkapẹ p'mvu, ọttạra mkpaakha s'akasiya; 6ọttạra ana p'oliv p'attukkạng, ọttạra ekpo p'abẹ n'atima asi ana p'abẹ n'abyenga anạng k'echo, ọttạra insẹns; 7ọttạra ata p'oniks, ọttạra ata akkapẹ adwạkh-ọdwạk p'abẹ n'akpạna k'ẹphọd#25.7 ẹphọd ede inọhma-khuma s'ọfọhn-ẹja, s'ikhaam abọhk-khuma p'aren k'nkkaang, ọttạra udikhikpa, ọttạra ata akkapẹ p'abẹ atim adokha mbọhk sẹ k'nkkaang., ọttạra ẹvạrakpa ch'ittemmạma.
8“Tte abẹ asi irukhabyi s'awurada anạng-m, ọfha osenga ma, nnukh bẹ abẹ. 9Si ibyirukhasẹ nna, ọttạra ekpo pyidede p'm'atima asi asẹ inyạnẹ, ide obengana k'ukhira kw'nkọkh-ọ.
Ikwukwur s'Echekha
10“Tte abẹ atima mkpaakha s'akasiya asi ikwukwur s'adum pẹ ade ntwạkhọ nttaan ọmaana akpamma sọnajobh, ẹkpa chẹ ede ntwạkhọ mfa ọmaana akpamma attaan, ebe chẹ ede ntwạkhọ mfa ọmaana akpamma attaan. 11Tima gol ọkkọkka fhạrọ sẹ k'ẹtaanga ọttạra k'iyaan, abạra atima gol afhạrọ ammakpabem pẹ abaabha. 12Tima gol rạbha ariringi annebung ge k'ntwạkhọ nnebung s'ikwukwur nnọ, ẹfa k'ukhubha gwạnọ, ẹfa k'ukhubha ngwọkha. 13Tima mkpaakha s'akasiya si nsemachi, atima gol afhạrọ sẹ. 14Ge nsemachi nnọ k'ariringi p'abem p'ikwukwur nnọ, p'abẹ m'avạkha adira sẹ. 15Nsemachi nnọ m'ininga ma ariringi p'ikwukwur nnọ; abạnga sẹ kárạbha. 16Tạkha atakpa p'nnyina nnọ s'm'nnạng-ọ, yikha ma Ikwukwur nnọ s'Echekha.
17“Bạra tima gol ọkkọkka rạbha ikwukwurkpa ch'ephyokhu. Adum pẹ m'ade ntwạkhọ nttaan ọmaana akpamma sọnajobh, ẹkpa chẹ m'ede ntwạkhọ mfa ọmaana akpamma attaan. 18M'atima gol adwuk achẹrubim afa abera k'ikpicho kw'ikwukwurkpa njọ. 19Chẹrub wạnọ m'uninga k'echo jạnẹ, nwọkha uninga k'echo njọkha. Si achẹrubim mbọ ọttạra ikwukwurkpa njọ agbạkha ayok, k'ncho mfa s'ikwukwur nnọ. 20Tte achẹrubim mbọ akhaama abạbaang p'm'ẹmmaama k'ẹrang ibubha ikwukwurkpa s'ikwukwur nnọ. Tte achẹrubim mbọ akkeri ayok ititikha, tte apyẹ ekkeri k'ikwukwurkpa njọ. 21Tạkha ikwukwurkpa njọ khubha k'ẹrạng-ẹrạng kw'Ikwukwur s'Echekha, atạkha nnyina s'm'nnạng-ọ age ma ẹtaanga. 22Ma ẹrạng-ẹrạng kw'ikwukwurkpa njọ, ọttạra k'ottemkwẹ kw'achẹrubim mbọ p'aning k'ẹrạng-ẹrạng kw'Ikwukwur s'Echekha nnọ, wọ m'nkebh-ọ, mbạra nnạng-ọ nnyina phyi-phyibh s'm'anạng anạng p'Israẹl.
Okpokkro kw'brẹd kw'Ubinọkpaabyi
23“Tima mkpaakha s'akasiya si okpokkro kw'adum pẹ ade ntwạkhọ nttaan, ẹkpa chẹ ede ẹtwạkhọ jạnẹ ọmaana akpamma asajạnẹ, ebe chẹ ede ntwạkhọ mfa ọttạra akpamma attaan. 24Tima gol ọkkọkka fhạrọ wẹ, abạra atima gol adokha ammakpa pẹ abaabha. 25M'abạra asi ammakpabem p'ẹkpa ebenga masẹ ẹbọhkpattem, atima gol afhạrọ pyẹ. 26Tima gol si ariringi annebung p'okpokkro nwọ, akpạna pyẹ ma nnwyạnga nnebung s'okpokkạro nwọ, k'mfhok nnọ sẹ nnebung. 27Ariringi mbọ m'aninga abaanga ma ammakpabem p'ikwukwur nnọ, p'm'avạkha nsemachi sabẹ m'atima adira okpokkro nwọ. 28Tima mkpaakha s'akasiya asi nsemachi nnọ, atima gol afhạrọ sẹ, ọfha abẹ n'atima adira okpokkro nwọ. 29Tima gol ọkkọkka asi agbang-gbang, ọttạra nsengakpa, ọttạra akkọbh, ọttạra akpobhu-mbọhk p'abạnga m'atima asi nnạnga ibyengasẹ. 30Nạna brẹd kw'awurada ma okpokkro nwọ k'ititikha saam k'okpe kwidede.
Itukkạng-chi
31“Dwuk gol ọkkọkka atima asi itukkạng-chi. Ẹyạr chẹ, ọttạra abọhkha, ọttạra akkọbh, ọttạra agbo, ọttạra ayoyo pyẹ m'ade ichi njọ jạnẹ. 32Abọhkha asajạne m'atọhnga k'ọkhaan-ọkhaan kw'itukkạng-chi, attaan m'aninga k'ukhubha gwạnọ, attaan aninga k'ukhubha ngwọkha. 33Akkọbh attaan p'ade masẹ ayoyo p'almọn, ọttạra agbo, ọttạra ayoyo, m'aninga k'ẹbọhkha jạnẹ, attaan aninga k'ẹbọhkha ẹdwạkh-ọdwạk, abạra ade ukhira ngwọ gwạnọ ọttạra abọhkha mbọ asajạnẹ phyibh p'avạk k'itukkạng-chi njọ. 34Itukkạng-chi njọ m'ẹkhaama akkọbh annebung p'ade masẹ ayoyo p'almọn ọttạra agbo, ọttạra ayoyo. 35Ogbo wạnọ m'uninga k'isekh-isek kw'abọhkha-gbạkha p'acheden atọhnga ma itukkạng-chi njọ, ogbo kw'ottong afa m'ọbạra uninga k'isekh-isek kw'abọhkha-gbạkha p'attong afa, ottong agbo attaan m'uninga k'isekhisek kw'abọhkha-gbạkha p'attong attaan. Phyi-phyibh m'ode abọhkha asajạnẹ. 36Agbo ọttạra abọhkha mbọ phyibh m'ade ichi njọ jạnẹ, ọttạra ma itukkạng-chi njọ ch'abẹ atim gol ọkkọkka adwuk.
37“Ma o, si atukkạng asenọfa, anạna pyẹ ma itukkạng-chi njọ, ọfha apyẹ ẹnna k'ottemkwẹ kw'ititikha sẹ. 38Tima gol ọkkọkka dwuk afamgba, ọttạra nsengakpa s'ekpon kkikkibhi. 39Tima gol ọkkọkka si itukkạng-chi ch'adọbh pẹ ade talẹn wạnọ, ọttạra ekpo phyi-phyibh py'ẹttạr ma. 40Songa bẹ́ m'asi ọttọhk fidede obengana k'oche kw'nkọkh-ọ k'okpecho o.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Nnwẹr s'Osenga 25: mfn-x-os
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
©️2025 West Africa Christian Mission