Къанун 14
14
Хъубабги бацӀцӀадабги
(Лев. 11:1-23)
1Нуж руго БЕТӀЕРГЬАН Аллагьасул лъимал. Гьединлъидал, хваразда хадуб магӀу гьабулелъул, черхалда ругъналги лъоге надалда тӀасахун расги кӀкӀваге. 2БЕТӀЕРГЬАН Аллагьасул хирияб халкълъидал нуж. Дунялалъул киналго халкъазда гьоркьоса БЕТӀЕРГЬАНАС тӀаса рищана нуж, Жиндирго хасаб ирс хӀисабалда.
3Кинаб букӀаниги хъубаб жо кванаге. 4Гьале нужее хӀалалаб рухӀчӀаголъи: чӀегӀербоцӀи, гӀи-цӀани, 5ритӀучӀал, жайранал, багӀнасал, чаницӀани, антилопаби ва гӀалхул куйдул. 6Нужеца кваназе бегьула щинкӀилги кӀикӀвекьаб, чӀамун лагӀги рехулеб бокьараб хӀайваналъул гьан. 7Амма варанидул, гӀанкӀил ва даманалъул гьан нужеца кванаге, щайгурелъул гьез чӀамун лагӀ реханиги, гьезул кӀикӀвекьал щанкӀлал гьечӀелъул, гьединлъидал гьел нужее хъубаллъун ккола. 8Болъоналъул гьанги кванаге: гьелъул кӀикӀвекьарал щанкӀлал руго, амма гьелъ чӀамун лагӀ рехуларо – гьеб нужее хӀарамаб буго. Гьелъул гьанги кванаге гьелъул балканалдаги квер хъваге.
9Лъадалъ рукӀунел жалазда гьоркьоса нужеца кваназе бегьула гъатахараб хъалги лъедолеб ччугӀил квачӀги бугеб рухӀчӀаголъи. 10Амма гъатахараб хъалги лъедолеб ччугӀил квачӀги гьечӀеб ралъдал яги гӀурул рухӀчӀаголъи кванаге, гьеб нужее хӀарамаб буго.
11Бокьараб бацӀцӀадаб хӀанчӀил гьанги кваназе бегьула нужеца. 12Амма нужеца кваназе бегьуларо: цӀум, хъвек, хъергъу, 13канюк, хъарчигъа, лучнузул кинабниги тайпа, 14гъудузул кинабниги тайпа, 15варанихӀинчӀ, беццаруз, ралъдахӀинчӀ, хъарчигъабазул кинабниги тайпа, 16кетуруз, хьуцӀихӀинчӀ, хъахӀаб беццаруз, 17пеликан, сип, чудук, 18хьуцӀичӀороло, хьуцӀихъазазул кинабгӀаги тайпа, гьудгьуд ва гӀункӀкӀхӀинчӀ.
19Боржинеги боржунеб, гьединго ункъго хӀатӀида ракьалдасанги шурулеб кинабниги гӀиси-бикъинаб рухӀчӀаголъи нужее хъубаблъун ккола – гьеб кваназе бегьуларо. 20Амма бокьараб бацӀцӀадаб хӀинчӀ нужеца кваназе бегьула.
21Хвараб ялъуни жанавараз чӀвараб хӀайваналъул гьан кванаге. Гьеб кье ялъуни биче нужеда гьоркьор чӀел гьабурал чияр халкъазул чагӀазе – гьез кваназе бегьула гьеб. Амма нуж руго БЕТӀЕРГЬАН Аллагьас хира гьабураб Гьесул халкъ.
БурутӀ белъинабуге гьелъул эбелалъул рахьдалъ.
АнцӀил бутӀа
22Щибаб соналъ дурго ах-хуралдасан щвараб жоялъул анцӀил бутӀа батӀа гьабе. 23БЕТӀЕРГЬАН Аллагьасда цебе, Гьес тӀаса бищараб Мукъадасаб бакӀалда кваназе ккола дуца бугӀа-ролъул, цӀибахъараб чагъиралъул ва зайтуналъул нахул анцӀил бутӀаги рехъадул щибаб тӀоцебесеб къинлъиялъул гьанги. Гьедин гьабизе ккола БЕТӀЕРГЬАН Аллагьасул кидагосеб хӀурмат-адабалде мун ругьунлъун вукӀине. 24Амма гьеб бакӀ дудаса цӀакъго рикӀкӀада бугони, БЕТӀЕРГЬАН Аллагьас дуе кьураб хӀалухъеналъул анцӀил бутӀа гьенибе босизе ресги батичӀони (БЕТӀЕРГЬАН Аллагьас тӀаса бищараб Мукъадасаб бакӀ дудаса цӀакъго рикӀкӀада букӀиналъ), 25кинабго анцӀил бутӀа гӀарцухъ хисе ва гьеб гӀарацги босун а БЕТӀЕРГЬАН Аллагьас тӀаса бищараб бакӀалде. 26Гьениб гьеб гӀарцухъ дуего бокьараб босе: хъвезе жалги, чагъирги, чӀагӀаги ва цоги щиб бокьаниги. Ва БЕТӀЕРГЬАН Аллагьасда цебе дурго хъизан-лъималгун цадахъ рохалил квана-гьекъей гӀуцӀе. 27Нужеда гӀагарлъухъ гӀумру гьабулел левиталги кӀочонге, гьезие ракьазул бутӀаги магӀишатги гьечӀелъул, нужее бугеб гӀадин.
28Щибаб лъабабилеб лъагӀалил ахиралда, гьеб соналъ бачӀараб тӀолабго хӀалухъеналъул анцӀил бутӀаги шагьаралъул кавабахъе, нахърател лъолеб бакӀалде босе. 29Гьеб букӀина левитазеги (нужеда лъалелъул нужер гӀадинаб ирсги мал-мулкги гьезул гьечӀеблъи), нужеда гьоркьоб гӀумру гьабулел чияр халкъазул чагӀазеги, бесдалазеги, къоролзабазеги. Риччанте гьелги гӀорцӀизегӀан кваназе! Гьебмехалъ БЕТӀЕРГЬАН Аллагьас дуца гьабулебщиналда баракат лъела.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Къанун 14: АварАК
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© Институт перевода Библии, 2005-2023