Къанун 13
13
1Дуда гьоркьов авараг ялъуни хӀикматал макьаби рихьулев чи вахъани, ва гьес цо пуланаб жо ккезе бугин ялъуни цо гӀаламат лъугьине бугин цебеккунго бицани, 2ва гьес бицараб жо хӀакъикъаталдаги ккани, гьес абизе бегьула: „РачӀа цогидал, нужеда лъаларел аллагьзабазда нахъ рилълъине ва гьезие хъулухъ гьабизе“, – ян. 3Гьев чиясухъ гӀин тӀамизе бегьуларо, щайгурелъул БЕТӀЕРГЬАН Аллагьас гьедин хӀал бихьизе буго нужер, Гьев нужее ракӀ-ракӀалъ хирияв вугищали балагьизе. 4Нужерго БЕТӀЕРГЬАН Аллагьасда нахъ рилълъа, Гьесукьа хӀинкъа ва Гьесие гьабе тӀагӀат-гӀибадат; Гьесул амраби тӀуразаре ва Гьесухъ гӀенекке; Гьесие хъулухъ гьабе ва Гьесие мутӀигӀго хьваде! 5Гьединав аварагги макьаби рихьулев чиги чӀвазе ккола, Мисриялдаса нуж нахъе рачарав ва лагълъиялдаса нуж эркен гьарурав БЕТӀЕРГЬАН Аллагьасул нухдаса нуж къосинаризе лъугьаралъухъ. Гьединаб квешлъи нужеда гьоркьоб тоге, нахъе хъаме гьеб!
6Дур вац, вас, яс, яги дур йокьулей лъади, ялъуни лъикӀав гьудул балъгого мун цогидал аллагьзабазде цӀазе лъугьани ва гьез абуни: „Рилълъа цогидал аллагьзабазе хъулухъ гьабизе“, – ян (я дуда, я дур умумузда лъалел рукӀинчӀел аллагьзабазе, 7сверухълъиялъул гӀагардаса яги рикӀкӀадаса, кинал ратаниги дунялалъул халкъазул аллагьзабазе), 8гьединав чиясда тӀад рекъоге, гьесухъ гӀинцин тӀамуге! Гьединав чиясда барахщуге ва гьев чи вахчуге. 9Гьев чара гьечӀого чӀвай! ТӀоцебесеб гамачӀ дуца речӀчӀизе ккола, дуда хадуб – хутӀараб халкъалъги. 10ГанчӀица чӀвай гьев – Мисриялдаса, нужерго лагълъиялдаса нуж эркен гьарурав БЕТӀЕРГЬАН Аллагьасул нухдаса нуж къосинаризе хӀал бихьаралъухъ! 11ГӀизраилазул тӀолабго халкъалда гьеб рагӀидал, гьел хӀинкъила – тӀокӀалъ нужеда гьоркьоб лъицаниги гьединаб ишги гьабиларо.
12Дуда рагӀани БЕТӀЕРГЬАН Аллагьас нужее кьурал шагьаразул цоялда 13хӀалихьатал чагӀи раккун ругин ва гьез, нужеда цереккун рихьа-рагӀичӀел, чияр аллагьзабазе тӀагӀат-гӀибадат гьабизе цогидал гӀадамалги цӀалел ругин, 14дуца рагӀа-ракьанде щун цӀех-рех гьабизе ккола гьеб ишалъул. Гьеб битӀараб жо батани, ва хӀакъикъаталдаги нужеда гьоркьоб гьединаб махӀцараб иш гьабун батани, 15шагьаралъул киналго чагӀи чара гьечӀого чӀвазе ккола. ТӀолабго шагьарги, гьениб бугебщинабги, гӀи-боцӀигун цадахъ херем гьабизе ккола; хвалчаца чӀвай киналго! 16Гьениб батарабщинаб бечелъиги шагьаралъул майданалде бакӀаре ва тӀолабго шагьаргун цадахъ бухӀе, нужерго БЕТӀЕРГЬАН Аллагьасе кьолеб цӀадул къурбан хӀисабалда. Гьеб шагьар чӀунтелазул гохӀлъун хутӀизе ккола абадиялъего ва тӀокӀалъ гьеб цӀи гьабун базе бегьуларо. 17Херем гьабураб жоялде нужеца квер бегьизе бегьуларо! Гьебмехалъ БЕТӀЕРГЬАНАСУЛ ццин нахъ буссина, нужеда гурхӀила ва рахӀму-цӀоб лъела, нужер умумузе кьураб рагӀуда рекъон, нужее гӀемерал наслабиги кьела. 18Гьедин букӀина нужеца БЕТӀЕРГЬАН Аллагьасухъ гӀин тӀамуни, жакъа дица нужее загьир гьарурал Гьесул киналго амраби тӀуразаруни ва БЕТӀЕРГЬАН Аллагьасе бокьулеб къагӀидаялъ хьвадани.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Къанун 13: АварАК
ಹೈಲೈಟ್ ಮಾಡಿ
ಹಂಚಿಕೊಳ್ಳಿ
ಕಾಪಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© Институт перевода Библии, 2005-2023