Къанун 15

15
Налъулазда тӀасалъугьунеб сон
1Щибаб анкьго соналдасан нуж налъулазда тӀасалъугьине ккола. 2Гьеб гьадин гьабе: биччанте жиндирго халкъалъул чиясе къарзалъе щиб букӀаниги жо кьурав чияс, гьеб тӀасалъугьун тезе; БЕТӀЕРГЬАНАСУЛ амру бугелъул гьедин гьабеян, тӀокӀалъ гьеб налъи нахъе тӀалаб гьабизе бегьуларо. 3Чияр халкъазул чагӀазухъа налъи тӀалаб гьабизе бегьула, амма дурго халкъалъул чиясе, ай гӀизраиласе кьураб налъуда тӀаса лъугьа. 4Мискинал чагӀи рукӀине кколаро нужеда гьоркьор, Щайгурелъул БЕТӀЕРГЬАН Аллагьас кьолеб бугеб ракьалда БЕТӀЕРГЬАНАС гьарзаяб магӀишат кьезе бугелъул нужее. 5Амма гьедин букӀина, БЕТӀЕРГЬАН Аллагьасухъ гӀинги тӀамуни, жакъа дица кьурал Аллагьасул амрабиги мухӀканго тӀуразаруни. 6Гьебмехалъ БЕТӀЕРГЬАН Аллагьас кӀудияб баракат лъела нужеда ва гӀемерал халкъазе къарзалъе кьезеги рес букӀина нужер. Нужецайин абуни, киданиги налъи гьабизе ккеларо. Нужеца гӀемерал халкъазда тӀад кверщел гьабила, амма нужеда тӀад лъицаниги кверщел гьабиларо.
7БЕТӀЕРГЬАН Аллагьас кьураб ракьалда, нужер шагьаразул цоялда, дур гӀагарлъиялъул щивниги чи мискинлъани, дурго ургъелги гьабун вукӀинчӀого, мискиназда квер чӀвалевлъун вукӀа. 8Гьезие къваригӀарабщинабги сахаватго ва гъираялда кье къарзалъе. 9Квешаб пикру рекӀелъе биччаге – анкьабилеб, ай налъулазда тӀаса лъугьунеб сон тӀаде гӀунтӀулеб бугилан, рокьукъго валагьун, мискинлъарав чи нахъ чӀваге. Цинги гьес БЕТӀЕРГЬАНАСДЕ гӀарз бахъила, мунги мунагьалъукье ккела. 10Квер гӀатӀидго, рекӀелъ ццинги кквечӀого кье гьесие къарзалъе кьолеб жо. Гьеле гьедин гьабуралъухъин БЕТӀЕРГЬАН Аллагьас дуца гьабулебщиналъеги квербакъизе бугеб. 11Мискинал чагӀи ракьалдаса кидаго лъугӀизе гьечӀо, гьединлъидал дица дуда тӀадкъалеб буго – кидаго квер гӀатӀидавлъун вукӀа дурго гӀагарал гӀизраилаздехунги, цогидав кинав вукӀаниги мискин-пакъирасдехунги.
Лагъзал эркен гьари
(Тархъ. 21:2-6)
12Дур халкъцояз, ай жугьутӀаз (бихьинчи яги чӀужугӀадан батӀалъи гьечӀо) жалго дуе лагъзаллъун ричани ва анлъго соналъ дуе хӀалтӀани, анкьабилеб соналъ дуца гьел тархъан гьаризе ккола. 13Амма тархъан гьавулелъул чӀового виччаге гьединав чи! 14Сахаватго кье гьесие дурго рехъалъа, тӀорщалидаса ва чагъиралдаса бутӀа: БЕТӀЕРГЬАН Аллагьас дуе кьурабщиналдаса бутӀа гьесиеги кье. 15Дуда кӀочонге мунгоги Мисриялда лагълъун вукӀаравлъи ва дур БЕТӀЕРГЬАН Аллагьас мун гьениса хвасар гьавуравлъи. Гьединлъидалин жакъа дица дуде гьаб амру гьабулеб бугеб.
16Амма лагъас абуни нахъе ине бокьун гьечӀин, щайгурелъул мунги дур хъизан-къайги бокьун, дур бакӀалда лъикӀ бугин жиндиеян, 17гьебмехалъ нуцӀида аскӀовги чӀезавун, гӀебуялъ гьесул гӀин борлъе, гьеб гӀебу нуцӀида къалеб хӀалалъ. Гьеб букӀина гьев гӀумруялъго дур лагълъун хутӀулев вукӀиналъул гӀужлъун, гьебго гьабе гъаравашалъеги.
18Амма лагъ эркен гьавизе кканин абун, дур ццин бахъунге, гьев анлъго соналъ дуда цеве хӀалтӀун вугелъул, ккун вачарав хӀалтӀухъанасе кьолелдаса кӀиго нухалъ дагьаб харжалъухъ. Цинги БЕТӀЕРГЬАН Аллагьасги гьабулебщиналъулъ квербакъила дуе.
ГӀи-боцӀул тӀоцебесеб къинлъи
19Дурго гӀи-боцӀиялдаса щибаб тӀоцебе гьабураб бихьинаб хӀайван БЕТӀЕРГЬАН Аллагьасе батӀа гьабе. ТӀоцебе гьабураб баси хӀалтӀизабуге, тӀоцебе гьабураб куйдул квасги къунцӀуге. 20Гьезул гьан щибаб соналъ дуцаги дур хъизан-лъималазги, БЕТӀЕРГЬАН Аллагьасда цебе, Гьес тӀаса бищараб мукъадасаб бакӀалда кваназе ккола. 21Амма гьединаб хӀайваналъе кинабгӀаги жагъаллъи ккани – рекълъун, беццлъун, ялъуни цоги кинаб букӀаниги гӀузру ккун – гьеб БЕТӀЕРГЬАН Аллагьасе къурбаналъе хъвезе бегьуларо. 22Дурго шагьаралда хъвезеги хъун, кванай гьеб. Хъубасги вацӀцӀадасги кваназе бегьула гьелъул гьан, ритӀучӀалъул яги жайраналъул гьан кваназе бегьулеб гӀадин. 23Амма гьелъул би квание хӀалтӀизабуге. Гьеб лъим гӀадин ракьалде гӀодобе тӀе.

ಪ್ರಸ್ತುತ ಆಯ್ಕೆ ಮಾಡಲಾಗಿದೆ:

Къанун 15: АварАК

ಹೈಲೈಟ್ ಮಾಡಿ

ಹಂಚಿಕೊಳ್ಳಿ

ಕಾಪಿ

None

ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ