Biă 4
4
1Plai Môsê bơjah glaĭ: «Ai-ñu, gơñu bĭ ngư̆ kâo dăp bĭ hmĭ tui hiăp kâo thâo wŏ,#An Biă 3:18. gơñu ti laĭ, “Yêhôwa bĭ pơƀôh br̂ơi ih ƀôh ñu ôh.”» 2Jr̂ŏng nŭn Yêhôwa kơña Môsê: «Mơ̆ng ngan ih nŭn, nŏ yĕt ih djă?» Ñu til glaĭ: «Gai jr̂a.» 3Yêhôwa laĭ: «Br̂ơi ih glŏm nao ñu pơ kơnah wŏ!» Nŭn Môsê glŏm nao gai jr̂a pơ kơnah, jr̂ŏng nŭn gai jr̂a jr̂ŏng hĕ alua, nŭn Môsê tă đuĕ mơ̆ng alua nŭn. 4Nŭn Yêhôwa pơhiăp hr̂ŏm Môsê: «Br̂ơi ih mă nao ku ñu wŏ!» Nŭn Môsê mă nao, jr̂ŏng nŭn alua jr̂ŏng glaĭ hĕ gai jr̂a mơ̆ng ngan ñu. 5«Buă ne yơh, čiăng gơñu ngư̆ laĭ, kâo pơƀôh br̂ơi ih ƀôh kâo dơdi, kâo yơh Yêhôwa Yang môt ơi don gơñu, Yang Abrahăm, Yang Isă, dăp Yang Yakô̆p.»
6Yêhôwa pơhiăp hr̂ŏm Môsê dŏng, ñu laĭ: «Br̂ơi ih čr̂ŏ ngan ih đah-lăm ao, uh mơ̆ng daboh ih wŏ.» Nŭn ñu uh hĕ ngan mơ̆ng daboh. Tơl ñu suă glaĭ, ñu ƀôh ngan ñu bĭ hiam ôh, tĭt-tr̂ĭt pôh hla ti plel. 7Jr̂ŏng nŭn Yêhôwa pơhiăp laĭ: «Br̂ơi ih uh ngan mơ̆ng daboh ih ha wŏt dŏng.» Nŭn ñu uh hĕ ngan mơ̆ng daboh. Tơl ñu suă glaĭ ngan, ñu ƀôh ngan ñu hiam glaĭ hla ti klĭ ñu hađăp. 8Nŭn Yêhôwa pơhiăp laĭ: «Jơ̆ laĭ gơñu bĭ ngư̆ ih, dăp bĭ hăt tô̆ mơ̆ng buă myang mơsêh ih ngă ti sa nŭn ôh, nŭn buă myang mơsêh dơdơi ne gơñu ti ngư̆ yơh. 9Jơ̆ laĭ gơñu bĭ ngư̆ buă myang mơsêh dua tô̆ ne, dăp bĭ hmĭ tui boh hiăp ih ôh, nŭn br̂ơi ih tuah tô̆ ia kr̂ong Nil, tuh ngŏ kơnah čĭ, jr̂ŏng nŭn ia ih tuah tô̆ mơ̆ng ia kr̂ong nŭn ti jr̂ŏng dr̂ah mơ̆ng kơnah.»
10Plai Môsê til glaĭ pơ Yêhôwa: «Ơ Khua Yang, pap br̂ơi kâo wŏ, kâo bĭ djơ̆ mơnuih lơgơi pơhiăp ôh, tô̆ mơ̆ng ahlâo dih khă tơl pơ r̂ơi ih pơhiăp hr̂ŏm kâo hlŭn ih ne, yua kâo mơnuih găng bah glah tơtŏ.» 11Jr̂ŏng nŭn Yêhôwa pơhiăp hr̂ŏm ñu: «Lơi bơjr̂ŏng bah mơnuih? Lơi ngă br̂ơi r̂ăng kơmlo lơ tr̂ĭl, thâo ƀôh lơ bôm? Hiư̆m, bĭ djơ̆ kâo Yêhôwa ôh? 12Nêne nao wŏ, kâo ti dŏ mơ̆ng amăng bah ih, dăp pơto br̂ơi klơi ih ti hiăp.» 13Plai Môsê til glaĭ: «Ơ Khua Yang, pap br̂ơi kâo he, dueh mơ̆ng ih pơđơi r̂ăng pơkŏn wŏ!» 14Pah anŭn Yêhôwa hêl jat Môsê, nŭn ñu laĭ: «Jơ̆ nĭng nŭn, yŏng ih Ơrô̆n, ñu nă čo Lêwi mơ̆n, kâo thâo kr̂ăn laĭ ñu mơnuih lơgơi pơhiăp. Nêne, ñu pah bat r̂ai sem ih, tơl ñu ƀôh ih nŭn bŭt ñu ti mơ-ak jat. 15Ih ti r̂ă br̂ơi ñu, čiăng ñu pơhiăp tang br̂ơi ih,#An Biă 4:30; 7:1-2. kâo pô ti dŏ mơ̆ng amăng bah ih, dăp amăng bah ñu, wŏt pơto br̂ơi gô-ih mơ̆ng buă yĕt gô-ih ti ngă he mơ̆n. 16Ñu ti pơhiăp hr̂ŏm nă plơi lan tang br̂ơi ih, ñu ti jr̂ŏng hla ti amăng bah ih, plai ih dŏng ti jr̂ŏng hla ti yang ñu. 17Gah gai jr̂a ne dŏng, br̂ơi djă tăm ngan ih, čr̂oh ngă buă myang mơsêh wŏ.»
Môsê wŏt glaĭ pơ čal Êjĭp
18Nŭn yơh Môsê glaĭ nao pơ Yêtrô khma ñu, jr̂ŏng nŭn pơhiăp laĭ: «Dueh mơ̆ng ih br̂ơi kâo wŏt glaĭ pơ yŏng dơi kâo dŏ pơ čal Êjĭp, čiăng thâo kr̂ăn laĭ môt gơñu dŏ nŏng dŏ dĭp lơ hiư̆m pă?» Yêtrô til glaĭ pơ Môsê: «Br̂ơi ih glaĭ nao ak-oi wŏ!» 19Yêhôwa pơhiăp hr̂ŏm Môsê mơ̆ng čal Mađien: «Br̂ơi ih wŏt glaĭ pơ čal Êjĭp wŏ, yua bih mơnuih čiăng pơdjai ih, gơñu djai bih boih.»#An Biă 2:15, 23. 20Nŭn yơh, Môsê djă ba bơnai dăp nă-bă ñu#An Biă 2:22; 18:3-4. čơ gơñu ngŏ r̂ŏng lie, glaĭ nao pơ čal Êjĭp, dăp djă ba gai jr̂a Ơi Adai mơ̆ng ngan ñu mơ̆n.
21Yêhôwa pơhiăp nao pơ Môsê: «Tơl ih glaĭ nao tr̂uh pơ čal Êjĭp boih, ih anăm wĕč ho, klơi myang mơsêh kâo čr̂oh mơ̆ng ngan ih, br̂ơi ih ngă bih klơi nŭn ti năp pơtao Pharon. Plai kâo ti ngă br̂ơi Pharon găng bŭt,#An Rôm 9:18. bĭ phom br̂ơi nă plơi lan biă nao ôh. 22Jr̂ŏng nŭn br̂ơi ih r̂ă thâo Pharon:
“Ne yơh klơi pơhiăp Yêhôwa, ñu laĭ:
‘Israel yơh nă đahkơi phŭn kâo. 23Kâo laĭ br̂ơi ih boih, br̂ơi nă đahkơi kâo biă nao, čiăng ñu ngă buă kâo. Plai ih bĭ phom br̂ơi ñu biă nao ôh, ep wŏ, kâo iă ti pơdjai lôi nă đahkơi phŭn ih yơh.’”»#An Biă 12:29.
24Tơl Môsê tr̂uh pơ ƀon đŏm r̂ok glan, nŭn Yêhôwa nao pơ ñu čiăng pơdjai lôi ñu. 25Pah anŭn Sêphôra tô̆ bohtâo hmâo pơta hlĭ, tr̂ĕ klĭ dơdŭ ia djă nă đahkơi ñu,#An Phŭn 17:10-14. jr̂ŏng nŭn ñu tô̆ klĭ ñu tr̂ĕ lôi nŭn tĭt mơ̆ng le Môsê kơi ñu, dăp pơhiăp laĭ: «Ih kơi kâo dơdi yơh, r̂ai mơ̆ng dr̂ah ne.»#4:25 Ih kơi kâo dơdi yơh r̂ai mơ̆ng dr̂ah ne lơ «Ih kơi dr̂ah kâo dơdi yơh.» 26Jr̂ŏng nŭn Yêhôwa biă đuĕ mơ̆ng Môsê. Nĭng nŭn yơh Sêphôra mơ̆ng pơhiăp laĭ: «Kơi r̂ai mơ̆ng dr̂ah,» yua mơ̆ng klơi tr̂ĕ klĭ dơdŭ ia djă nŭn.
27Yêhôwa pơhiăp hr̂ŏm Ơrô̆n: «Br̂ơi ih nao tơkă Môsê pơ čol dơdang.» Nŭn Ơrô̆n nao pŏ Môsê pơ kŏ čĭ Ơi Adai,#An Biă 3:1. jr̂ŏng nŭn čô̆m ñu. 28Jr̂ŏng nŭn Môsê r̂ă br̂ơi Ơrô̆n tơgr̂ư̆ boh hiăp Yêhôwa pơđơi ñu nao pơhiăp, dăp tơgr̂ư̆ buă myang mơsêh Yêhôwa pơtă br̂ơi ñu ngă. 29Jr̂ŏng nŭn Môsê dua ñu Ơrô̆n nao iâo pơtŭm bih môt kŏng-tha nă čo Israel.#An Biă 3:16-18. 30Ơrô̆n r̂ă r̂oi bih klơi Yêhôwa pơhiăp hr̂ŏm Môsê, dăp ngă buă myang mơsêh ti năp nă plơi lan he mơ̆n. 31Nŭn nă plơi lan ngư̆ yơh. Jr̂ŏng nŭn gơñu bon kô̆p kŏ, yua gơñu hmĭ laĭ Yêhôwa r̂ai dŏng nă čo Israel, dăp ƀôh klơi kơnap-tap gơñu.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Biă 4: JKB
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© 2024, Wycliffe Bible Translators, Inc.