Biă 3
3
Ơi Adai iâo Môsê
1Pah Môsê dŏ čiă phung triw phung be Yêtrô khma ñu,#3:1 Yêtrô ne ha tô̆ Rêhuôl nŭn yơh. An Biă 2:21. pô ngă yang mơ̆ng čal Mađien, pah anŭn Môsê ba nao phung čĭm pơ hang gah dih čol dơdang, khă tơl pơ kŏ čĭ Ơi Adai, a iâo kŏ čĭ Hôrep.#3:1 Kŏ čĭ Hôrep ha tô̆ kŏ čĭ Sinai nŭn yơh. An Biă 31:18; 33:6. 2Ti ha anŭn ling-jang Ơi Adai Yêhôwa pơƀôh br̂ơi Môsê ƀôh ñu tăm glah phui tŏng-kr̂ah pôm jr̂ơi. Môsê ƀôh phui ƀŏng pôm jr̂ơi nŭn, plai pôm jr̂ơi nŭn bĭ hiă ôh. 3Nŭn Môsê laĭ: «Kâo ti weh ep lăng klơi myang mơsêh ne! Yua yĕt pôm jr̂ơi ne, phui ƀŏng bĭ hiă?» 4Yêhôwa ƀôh Môsê weh ep, nŭn Ơi Adai iâo ñu mơ̆ng pôm jr̂ơi: «Ơ Môsê! Ơ Môsê!» Môsê til glaĭ: «Yĕt, Khua Yang? Kâo hmĭ boih.» 5Nŭn Ơi Adai laĭ: «Anăm r̂ai jĕ ƀon ne ôh! Toh lôi klĭ juă mơ̆ng le ih wŏ, yua ƀon ih dŏ dŏng ne kơnah lơgoh hiam.»#3:5 Kơnah lơgoh hiam čiăng laĭ ƀon nŭn bĭ djơ̆ ƀon tă-tăn ôh. 6Ơi Adai pơhiăp dŏng: «Kâo Yang ma ih, Yang Abrahăm, Yang Isă, dăp Yang Yakô̆p.»#An Mat 22:32. Nŭn Môsê gŏm lôi ƀŏ ñu, yua ñu bĭ khĭn ep Ơi Adai ôh.#An Biă 33:20.
7Jr̂ŏng nŭn, Yêhôwa pơhiăp laĭ: «Kâo ƀôh dơdi yơh klơi kơnap-tap nă plơi lan kâo dŏ mơ̆ng čal Êjĭp, wŏt kâo hmĭ jua gơñu ôl hơmr̂ač yua mơ̆ng môt khua bơjăm bơjuă gơñu. Kâo thâo kr̂ăn boih bŭt gơñu bơngŏt-bơngañ.#An Biă 2:23-25. 8Nŭn yơh, kâo tr̂ŭn r̂ai čiăng dŏng gơñu br̂ơi klaih mơ̆ng ngan môt sô̆n-sat Êjĭp, jr̂ŏng nŭn kâo ti ba biă gơñu mơ̆ng čal nŭn, nao dŏ pơ lŏn-ia hiam dăp pr̂ŏng lơhaih, lŏn-ia nŭn hmâo ia sâo#3:8 Môt Israel mơ̆ng đim ñŭm ia sâo be dăp ia sâo mo he mơ̆n. dăp ia ni lơbeh-lơbai, lŏn-ia nŭn ƀon môt sô̆n-sat Kanan, môt sô̆n-sat Hêt, môt sô̆n-sat Amôri, môt sô̆n-sat Pêrĭsit, môt sô̆n-sat Hêwi, dăp môt sô̆n-sat Yêƀuh. 9Nêne, jua nă čo Israel ôl hơmr̂ač hmĭ đĭ tơl pơ kâo boih, dăp kâo ƀôh môt sô̆n-sat Êjĭp bơjăm bơjuă ngă pơkơnap gơñu mơ̆n.#An Biă 1:11-14, 22. 10Nêne dŏng, nah! Kâo pơđơi ih nao pơ Pharon, čiăng ih ba nă čo Israel, nă plơi lan kâo, biă mơ̆ng čal Êjĭp.» 11Môsê til glaĭ pơ Ơi Adai: «Mơnuih hla ti kâo ne, hiư̆m kâo mơ̆ng khĭn nao pơ Pharon, dăp ba biă nă čo Israel mơ̆ng čal Êjĭp?» 12Ơi Adai pơhiăp laĭ: «Kâo ti dŏ hr̂ŏm ih.#An Phŭn 26:3; Biă 4:12. Tơl ih ba nă plơi lan kâo biă mơ̆ng čal Êjĭp, gô-ih ti ngă buă Ơi Adai mơ̆ng kŏ čĭ ne,#An Biă 19. hla nŭn yơh ih ti thâo kr̂ăn laĭ kâo pô pơđơi ih nao.»
13Môsê til glaĭ pơ Ơi Adai: «Tơl kâo nao pơ nă čo Israel, kâo ti r̂ă br̂ơi gơñu, “Yang môt ơi don gô-ih pơđơi kâo r̂ai pơ gô-ih,” jơ̆ laĭ gơñu kơña, “Lơi a iâo ƀŏ ñu?”#An Phŭn 32:29. Nŭn kâo ti r̂ă br̂ơi gơñu hiư̆m pă?» 14Ơi Adai pơhiăp hr̂ŏm Môsê: «Kâo Yơh Pô Kâo.» Nŭn ñu laĭ dŏng: «Br̂ơi ih r̂ă br̂ơi nă čo Israel hla ne: “Yang iâo ñu pô ‘Kâo Yơh Pô Kâo,’ ñu pơđơi kâo r̂ai pơ gô-ih.”» 15Ơi Adai pơhiăp nao pơ Môsê dŏng: «Br̂ơi ih r̂ă br̂ơi nă čo Israel hla ne: “Yêhôwa#3:15 Ơi Adai iâo ñu pô, ñu laĭ «Kâo yơh pô kâo» (Biă 3:14). Jơ̆ laĭ ta iâo ñu, ta laĭ «Ñu yơh pô ñu.» Ƀŏ Yêhôwa keng-keng boh hiăp Hêbrơ laĭ «Ñu yơh.» Yang môt ơi don gô-ih, ñu Yang Abrahăm, Yang Isă, dăp Yang Yakô̆p, ñu yơh pơđơi kâo r̂ai pơ gô-ih.”
Ne yơh ƀŏ kâo dŏ nao-nao hayoh,
Čiăng gô-ih hơdŏl glaĭ mơ̆ng kâo,
Mơ̆ng ha nôk nao pơ ha nôk.
16«Nao iâo pơtŭm wŏ môt kŏng-tha Israel, jr̂ŏng nŭn r̂ă br̂ơi gơñu:
“Yêhôwa Yang môt ơi don gô-ih, ñu Yang Abrahăm, Yang Isă, dăp Yang Yakô̆p, ñu pơƀôh br̂ơi kâo ƀôh ñu, dăp pơhiăp laĭ,
‘Kâo r̂ai dŏng gô-ih dơdi yơh,#An Phŭn 50:24. yua kâo ƀôh r̂ăng ngă set gô-ih mơ̆ng čal Êjĭp. 17Kâo uăn ti ba biă gô-ih mơ̆ng klơi kơnap-tap mơ̆ng čal Êjĭp, jr̂ŏng nŭn ba nao gô-ih pơ lŏn-ia môt sô̆n-sat Kanan, môt sô̆n-sat Hêt, môt sô̆n-sat Amôri, môt sô̆n-sat Pêrĭsit, môt sô̆n-sat Hêwi, dăp môt sô̆n-sat Yêƀuh, lŏn-ia nŭn hmâo ia sâo dăp ia ni lơbeh-lơbai.’”
18«Môt kŏng-tha Israel, gơñu ti hmĭ tui ih,#An Biă 4:31. jr̂ŏng nŭn gơñu ti nao hr̂ŏm ih pơ pơtao čal Êjĭp, dăp pơhiăp laĭ:
“Yêhôwa Yang môt sô̆n-sat Hêbrơ, ñu r̂ai pơ môt mơi, nŭn yơh mơi dueh mơ̆ng ih br̂ơi mơi biă nao bat tăm čol dơdang taih klâo r̂ơi bat, nŭn mơi ti ngă yang Yêhôwa Yang mơi.”
19Plai dŏng, kâo thâo kr̂ăn laĭ pơtao čal Êjĭp bĭ br̂ơi gô-ih biă nao ôh, hmâo ha tô̆ ngan kơtang myang kâo đơč. 20Kâo ti yŏl đĭ ngan kâo, teh čal Êjĭp, kâo ti ngă mơ̆ng bih klơi myang mơsêh kâo tăm čal nŭn. Dơdơi mơ̆ng anŭn, pơtao ti br̂ơi gô-ih biă nao.#An Biă 12:31-33. 21Jr̂ŏng nŭn kâo ti ngă br̂ơi môt sô̆n-sat Êjĭp ngă hiam hr̂ŏm nă plơi lan ne, nŭn yơh tơl gô-ih biă đuĕ, gô-ih bĭ đuĕ ngan soh-sel ôh. 22Môt đahmơi sô̆n-sat Israel ha r̂ăng ha r̂ăng ti dueh dr̂ăm-gơnăm a ngă mơ̆ng maih, a ngă mơ̆ng pr̂ăk, dăp khô ao, mơ̆ng đahmơi sô̆n-sat Êjĭp dŏ jŭm dăl gơñu, wŏt đahmơi tuai dŏ dăng mơ̆ng sang gơñu, jr̂ŏng nŭn gô-ih ti čr̂oh dr̂ăm-gơnăm nŭn br̂ơi nă đahkơi nă đahmơi gô-ih. Nĭng nŭn yơh, gô-ih ti mă tô̆ bih-tih dr̂ăm-gơnăm mơ̆ng môt sô̆n-sat Êjĭp.»#An Phŭn 15:14; Biă 11:2-3; 12:35-36.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Biă 3: JKB
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
© 2024, Wycliffe Bible Translators, Inc.