A-HEPREU 12
12
1Kashika, se kanatuseleka ni mbunga yinene yipwa haha ya yela, tumbilenu milalu yeswe ni shili yize ya kutulimbalimba chashi chichize, tunyongononenu kuzombokela jila yize hanase kulutwe lietu. 2Tuhulikilenu meso kuli Yesu, Kaputu kanda mukwa kupwisa ungunu Ufulielo, mwenawo ha uwahililo uze asele kulutwe lienyi, wanyongonwene mu lamba lia kulusu, nikulelesa je sonyi; hanatwama ku kwoko lia chindume lia ngunja ya Zambi.
3Mumu Zewulenu kanawa yoze wanyongonwene ha kuhamika chinene cha yivulumunyi, cha kulimika nenyi, hanga kunuchi kevwa yikatalo, kunuchi kulezumioka mu mbunge jenu. 4Yenu kanda nuchilimika ndo ku manyinga, nikulitachika ni shili: 5mba hinunavulama kushinjila chize chinanuhete ngwe kuli ana ngwo,
Mwanami, kanda ulelesa kufumba cha Mwene,
chipwe kanda ulezumuka muze makukumika kuli iye.
6Mumu yoze Mwene mamuzanga mamulamba ha kufumba,
malamba ni shikote ana eswe maatambula.
7Kachi nwakunyongonona mu lamba lia kufumba, kachi Zambi kakulinga kuli yenu ngwe kuli ana; mumu mwana muka tato keshi kumulamba ha kufumba? 8Alioze kachi lamba lia kufumba kunushi nalio, ha lize ana eswe kakutambula chihanda, kachi nunapu ana ja utanji, hi nuli ana amwenemwene ko. 9Chikwo nawa, twapwile ni atata a mu musunya akutulamba ha kufumba, twaalemesene: Shinaho chikolo kutuchi kuzeyela kuli Tato ya maspiritu, tukapwe ni mwono, nyi? 10Mumu o chamwenemwene, atulambile ha kutufumba ha matangwa akehe nikulita ngwe chaawahilile, aiioze iye hanga tukafumbuke, hanga tukaliangane ha usandu wenyi. 11Achi, lamba lieswe lia kufumba Unasoloka haliapwila ngwe kulishi uwahililo, aiioze lia chinyengo, hindu kulutwe mulima mihuko ya ululi wa sambukila kuli waze akulifumba nalio.
12Kashika ololenu moko aze a upekepeke, ni makungunwa a kukokoloka. 13Lingenu majila a kululama ha molu jenu, hanga chilema kechi kakondoloka, aiioze Shinaho akahinduke. 14Kaulenu sambukila hamwe ni atu eswe, ni usandu, uze mutu kechi kamona Mwene nyi keshi nawo. 15Talenu kanawa kuchina mapwa umwe wakuhona vumbi lia Zambi, kuchina muji umwe wa usasu muze wasoka, muunupinjisa, ni anji malichisa nawo; 16kuchina chitanji umwe, hanji chijiluke, ngwe Esau, yoze ha kulia chimuwika walanjishile wata wenyi. 17Mumu nunanyingika chipwe kulutwe, muze azangile kuhinga uwape, alitunyineye; (mumu kawanyine muhela akalikonyeke), chipwe waufupile chikolo ni masoji.
18Mumu kunwejile ku mulundu uze mahasa kuukwata, wapwile weswe wa kahia, walayile ni milima ni chijimbi 19ni kuhanjika cha chitavwi, ni kuhanjika cha maliji; chize waze evwile, alembele nilimwe liji likwo kanda akahanjika kama kuli ayo; 20mumu kahashile kunyongonona ha chize ayulile, nyi kachi kashitu maheta kama ku mulundu akamwase mawe. 21Ni usolwelo uze wahiana woma, kashika Mose wambile ngwenyi, Ngunevu woma kuhiana ngunachikima. 22Alioze yenu hinuneza ku mulundu wa Zaione, ni ku limbo lia Zambi ya mwono, Yerusaleme ya mwilu; ni ku yizavu yinji ya angelo; 23che kukungama cha eswe; ni ku chikungulwila cha atangu, waze anasonewa mwilu; ni kuli Zambi mwe Sopi ya eswe, ni kuli maspiritu ja akwa ululi hanaapwisa angunu, 24ni kuli Yesu mwe chitakanyishi cha usendo waha, ni ku manyinga a kusapwila waze akuhanjika yuma yipema yahiana Abele.
25Talenu kanda nulituna yoze unahanjika. Mumu kachi kapulukile muze alitunyine yoze waatumbile hano hashi, kachi kuhiana chikolo yetu kutuchi kuputuka kachi mutumba manyima kuli yoze unafumbu mwilu: 26yoze liji lienyi ha matangwa aze lianyikishine hashi; aiioze haliapwila hanalakenya ngwenyi, Hindu chisuho chimuwika nawa, mungukatukungisa hi hashi wika ko, aiioze lilu nawa. 27Alioze liji lino ngwo, Hindu chisuho chimuwika nawa, linalumbunuka kunungunuka cha yuma yize ya kunyika, ngwe ya ku yuma ya kutunga, hanga yuma yize kuyishi kunyika yikasale. 28Kashika, ha kutambula wanangana uze kuushi kuhasa kunyika, tupwenu ni vumbi, ku lize tukavumbike Zambi ni uvumbiko wa kupemena chikolo, ni ulemeso ni woma. 29Mumu Zambi yetu iye kahia kakulalisa.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
A-HEPREU 12: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.