A-HEPREU 11
11
1Achi, Ufulielo che kulisela chinyingi cha yuma yize anayitalatala, che kukumika ha yuma yize kuyishi kumoneka. 2Mumu makulwana azukile nawo Shindakenyo yipema. 3Ku Ufulielo chatulumbunuka ngwe atesele miaka ku liji lia Zambi, chocho chize chakumoneka kachitangile ku yuma yize yakusoloka.
4Ku Ufulielo Abele walambwile kuli Zambi chitapo chilemu chahiana Kene, ku chize wazukile Shindakenyo ya kupwa mukwa ululi, Zambi se kanashindakenya ha yawana yenyi; ku uze, iye se wafwile, hindu achili nikuhanjika. 5Ku Ufulielo atutulwilile Enoke hanga kechi kamona kufwa; mba kamuwanyineko, mumu Zambi wamututulwilile; mumu shimbu kanda amututulwila, amushindakenyene ngwo, Kanapemena kuli Zambi. 6Alioze mutu keshi kuhasa kupemena kuli Zambi shina ni Ufulielo; mumu yoze meza kuli Zambi chamutamba kufuliela ngwo, Iye hwali, iye mukwa kwononona waze akumufupa. 7Ku Ufulielo Noe wa kufumba kuli Zambi ha kutwala ku yuma yize kanda yichimoneka, se wevwile woma wa Zambi, walulikile ulungu akalamwine akwa zuwo lienyi; chochene wahishile akwa hashi, amupwishile swana ya ululi uze wakulita ni Ufulielo.
8Ku Ufulielo Apalahama, muze amutambikile, wononokene kukatuka mukuya kuma kuze matambula ha chihinga; mba wakatukile, chipwe kanyingikine kuze maya. 9Ku Ufulielo watwamine ngwe chilambala mu chifuchi cha chilakenyo, ngwe mu chifuchi cha mbala, nikutwama mu mbalaka hamwe ni Izake ni Yakomba, maswana hamwe nenyi a chilakenyo chimuwika: 10mumu wataliletalile limbo lize likwete fundamentu, lize chilangaji, tungi yalio Zambi. 11Ku Ufulielo chipwe Sara mwene watambwile tachi ja kuseseka ufumba muze te hapalika mwaka, se wamunyongene wamwenemwene yoze walakenyene: 12kashika nawa kwakatukile kuli umuwika, iye ngwe mufu, anji ngwe matongonoshi a mwilu, ngwe masekeseke aze ali ku sesa lia Kalunga-lwiji, keshi kuhasa kwaalula.
13Wano eswe afwile nikulita ni Ufulielo, katambwile yilakenyo, aiioze ayimwene kusuku; ayisambililile; atayijile ngwo, Tuli ngeji ni njize hano hashi. 14Mumu waze akwamba yuma ngwe yino, kakuchisolola kanafupu chifuchi cha ayo ene. 15Nyi kachi chamwenemwene ewulukile chifuchi kuze akatukile, kachi apwile ni mwaka wa kuhilukilako; 16aiioze haliapwila kakuzanga chifuchi chimwe chahiana, te chize cha mwilu: kashika Zambi keshi kwavwila sonyi, akamuvuluke ngwo, Zambi yetu; mumu hanaalulikila limbo.
17Ku Ufulielo Apalahama, muze amwesekele, walambwile Izake, ni yoze watambwile yilakenyo kushi walambwile mwanenyi wa wika, 18yoze ha kutwala kuli iye achambile ngwo, Muli Izake makatambika munyachi we: 19se kanashinginyeka ngwenyi, Zambi kanahase kumuhindwisa, chipwe hahachi ka afu, muze mwene nawa ngwe mu Chizulie wamutambwile. 20Ku Ufulielo Izake wawahishile Yakomba ni Esau, ha kutwala ku yuma yize muyizaho. 21Ku Ufulielo Yakomba, muze himafwa, wawahishile mweswe wa kuli ana ja José a malunga; Wawayilile nikujamina ha mulumbu wenyi. 22Ku Ufulielo José, muze akundamine ku songo lia mwono wenyi, wavulukile kukatuka cha ana a Izalele; nikuhana shimbi ha kutwala ku yifwaha yenyi.
23Ku Ufulielo, muze te Mose hasemuka, amuswekele kuli yisemi jenyi tukweji atatu, mumu amumwene mwana wa vumbi, o kevwileko woma ku chiyulo cha mwanangana. 24Ku Ufulielo Mose, muze te hakola, katayijileko akamuvuluke ngwo, Mwana wa mwana Falau wa pwo. 25Watongwele Shinaho kwivwa lamba hamwe ni atu a Zambi, katongwele kuwaha cha shili ha shimbu likepe. 26Se kananyongo ngwenyi, Luchoko yoze achokele nenyi Kristu, hapwa upite kuhiana yikumba ya Engitu: mumu wahulikilile meso ku kwononona. 27Ku Ufulielo wehukile Engitu, kuchapwile ngwe wevwile woma wa ufwatulo wa mwanangana: mumu wanyongonwene ndusu ngwe kanamono yoze keshi kumoneka. 28Ku Ufulielo wafungile Chizomboka, ni kusapwila cha manyinga, hanga chenyeki cha atangu a kusemuka kechi kaakwata.
29Ku Ufulielo apalikile ndusu mu Kalunga-lwiji Muchila ngwe hashi homu: chize A-Engitu ha kweseka kuchilinga atokele. 30Ku Ufulielo yipanga ya Yeriku yapuzukile, muze te hayijinguluka matangwa shimbiali. 31Ku Ufulielo Rahape, chikoi, katokeleko hamwe ni waze kononokeneko, se watambwile ngendeshi ni sambukila.
32Mba kuchi mungwamba nawa? Mumu mwaka muunguhwila, kachi mungwambulula ha kutwala kuli Ngideone, ni Mbarake, ni Samasone, ni Jefeta, ni David, ni Samuele, ni aprofeta: 33waze ku Ufulielo akanganyine mawanangana, alingile ululi, azukile yilakenyo, ajikile makanwa ja ndumba, 34ajimine tachi ja kahia, apulukile ku lutwilo wa katana, ku ulelu alikolezele, ayile ni kutakama mu jita, achinyishine yizavu ya yilambala. 35Mapwo atambwile afu jo ku Uhindukilo: akwo aapinjishile ndo ku kufwa, se katayijile akaapulule, hanga akazuke Uhindukilo wahiana. 36Akwo aesekele ni kwakekuna ni kwalamba ni shikote, ewa, ndo ku malenge ni mazuwo ja ususu; 37aashile mawe, aaselalile mukachi, aazezele, aashihile ni katana; endanganyine mu malambu ja mapanga, mu malambu ja pembe, akwa kuhona, aapinjishile, aalingile chipi, 38(akwa hashi kaatelele), achamanganyine mu puya ni ha milundu, ni mu yivwenge, ni mu mena a hashi.
39Wano eswe, se azukile Shindakenyo ku Ufulielo, katambwile che chilakenyo. 40Zambi se wamwene Shimbu-kanda chuma chimwe chipema chahiana ha kutwala kuli yetu, hanga kechi kaapwisa angunu shina ni yetu.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
A-HEPREU 11: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.