A-HEPREU 10
10
1Mumu shimbi se yili ni Chizulie cha yuma yipema yize muyizaho, hi we mujimba wene ko wa yuma, kuyahashile nilimwe tangwa ni yitapo yimuwika tangwa ha tangwa, yize akulambula mwaka ha mwaka, kupwisa angunu waze akukundama. 2Nyi chocho, kachi kalitwaminyine kuyilambula, nyi? Mumu akwa kuwayila se haapemesa kamuwika keshi kupwa nawa ni uhiso wa milonga. 3Alioze mu yitapo yize kuchili kwiwulula cha milonga mwaka ha mwaka. 4Mumu manyinga ja ngombe ni ja pembe kechi kuhasa kuchiza milonga.
5Kashika muze yeza hano hashi, yamba ngwenyi,
Chitapo ni mulambu yena kwayipalile,
alioze wangululikilile mujimba.
6Mu milambu ya muwundu ya kulumba, ni yitapo ha shili yena kwawahilililemo.
7Hohene nambile ngwami, Talenu, Zambi nguneza.
(Mu chivungo cha mukanda chinasonewa hali yami)
mukulinga upale we. Zambi.
8Helu, muze yamba ngwenyi, Yitapo ni milambu, ni milambu ya kulumba, ni yitapo ha shili yena kwayipalile, chipwe kwawahilililemo (yize akuyilambula nikulita ni shimbi), 9mba wambile ngwenyi, Mba, hinguneza mukulinga upale we. Machiza yitangu, hanga akakolese yamuchiali. 10Mu upale uno wene hanatusela ku usandu ku kulambula cha mujimba wa Yesu Kristu kamuwika kunahu.
11Chikwo nawa sasendote mweswe kakumana tangwa ha tangwa nikuvumbika, nikulambwola kanji kanji yitapo yimuwika, yenayo kuyishi kuhasa kuchiza milonga nilimwe tangwa. 12Alioze iye muze te hatambula chitapo chimuwika ha milonga, Watwamine ndo ku miaka ya mutolo ku kwoko lia chindume lia Zambi. 13Kanalawoka chize ku mwaka uze ndo mapwisa akwa kole jenyi chitwamo cha yiliato yenyi. 14Mumu ku mulambu umuwika hanapwisa angunu ndo ku miaka ya mutolo waze hanaasela ku usandu. 15Ni Spiritu Musandu nawa kanatushindakenya; mumu muze te hamba ngwenyi,
16Mwene kanambe ngwenyi, Uno usendo uze mungukakwata no kulutwe lia matangwa aze:
Mungukasa shimbi jami ha mbunge jo,
ni ha kunyonga cho nawa mungukajisoneka.
17Milonga yo ni ungulungulu wo chichi kayiwuluka nawa
ndo ku miaka ya mutolo.
18Alioze kuze kwatwama ukonekeno wa yino, mulambu ha shili wakuhi nawa niumwe.
19Kashika, mandumbu, se hamu tuli nalio mukunjila muma musandu mwahiana ku manyinga a Yesu, 20ku jila yize hanatuputukilayo, jila yaha, ya mwono, ku chikalakala cha hina, chenacho musunya wenyi; 21se tuli ni sasendote munene helu lia zuwo lia Zambi; 22tukundamenu ni mbunge yamwenemwene, ni kusela chinyingi liakulu cha Ufulielo: se hasapwila mbunge jetu jipema ku shimbi jipi: se hasanyisa mijimba yetu ni meya apema. 23Tulalaminyenu ku kutayiza cha kutalatala chetu, nikulihiza ka; mumu yoze walakenyene iye mukwa jika. 24Tulitalenu umwe kuli mukwo ni mukwo mukukasumuna ku zango ni yitanga yipema. 25Kanda twehuka kulikungulula cha yetwene, ngwe ndako ya amwe, aiioze nikulishinjila, ni kuhiana chikolo shimbu munumona lie tangwa linakundama.
26Mumu kachi mutuvulumuna ni mbunge yeswe muze te hitunatambula yinyingi ya umwenemwene, chitapo ha milonga kuchishiko nawa; 27aiioze kutatatata cha upatwilo chikota ni woma, ni kuyila cha kahia chize muchikalesa akwa kulimika. 28Mumu mutu yoze hanalitunu shimbi ya Mose, mafwa, ha Shindakenyo ya yela aali hanji atatu, keshi kumuvwila keke. 29Kuchi nunanyongo? Yoze hanaliate mwe Mwana Zambi, hanajilula manyinga a usendo aze amuselele no ku usandu, hanasaula mwe Spiritu ya vumbi, lamba lika Mamutela? 30Mumu kutunamunyingika yoze wambile ngwenyi, Kukala nichami, yami kumungukafwetesa, chocho anambe Mwene; cheka nawa ngwenyi, Mwene kumakapatwila atu jenyi. 31Kuholokela mu moko ja Zambi ya mwono, chuma cha kukolesa woma.
32Alioze iwulukenu matangwa a kunyima, muze te hinwapanguluka, nwanyongonwene ha kulinjika chinji cha lamba; 33kanda shimbu anumwesene kuchoka ni kuhungumiona, kanda shimbu nwalianganyine ni waze evwile yino yuma. 34Mumu nwevwile keke hali funge, nwatambwile ni uwahililo kupunda cha yikumba yenu, te nunanyingika nuli nayo yikumba yahiana ya kulinduluka. 35Kanda nukambila kashika hamu lienu, lienalio kukundulula chinene likwete. 36Mumu Chanutamba kunyongonona, nulinge upale wa Zambi, nukatambule che chilakenyo.
37Mumu hindu kashimbu kakepekepe ni yoze meza
kumakeza, kechi kashimbula.
38Alioze mukwa ululi kumenda ku ufulielo;
mba kachi masosolokela kunyima, yami chichi kuwaha nichimwe muli iye.
39Alioze yetu hi tuli akwa kusosolokela kunyima ko ku kwonwona; aiioze tuli akwa kufuliela ha ulamwino wa mwono.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
A-HEPREU 10: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.