1 PETULU 1
1
1Yami Petulu, postolo wa Yesu Kristu, Kuli njize waze anamwangashana mu yifuchi ya Ponto, Ngalashia, Kapatoshia, Eshia, ni Mbitiniya; 2waze hanaatongola nikulita ni chinyingi cha kulutwe cha Zambi Tata, nikulita ni tachi ja Spiritu, ha kutusela ku usandu hanga twononoke, atusapwile ni manyinga a Yesu Kristu:
Vumbi kuli yenu ni sambukila yikalumbame.
3Zambi kanda Tato ya Mwene wetu Yesu Kristu afumane, yoze nikulita ni keke yenyi yinji hanatuseme chaha, tukapwe ni kutalatala cha mwono, ku Uhindukilo wa Yesu Kristu hakachi ka afu, 4tukapwe ni chihinga chingunu, kuchishi luchisa, ni chize kuchishi kujimuka, kanachifungu mu malilu hali yenu. 5Yenu kananufungu ni tachi ja Zambi ku Ufulielo, ha ulamwino, himausolola ha mwaka wa kusula. 6Mu uze nwakulikwiza, chipwe haliapwila ha shimbu likepe, kachi chinatambe, hananuvwisa chinyengo ni yeseko yeka ni yeka, 7hanga kweseka cha Ufulielo wenu, ulemu wahiana chikolo oru yize ya kutoka, chipwe mayeseka ni kahia, akauwane wa uhaliso ni uhenya ni ulemu ha usolwelo wa Yesu Kristu: 8yoze chipwe kunwamumwene, hindu nwakumuzanga; chipwe haliapwila kunushi kumumona, hindu se nunamufuliela, nwakulikwiza ni uwahililo uze keshi kuhasa kuuhanjika, wa tò ni uhenya. 9Nunatambula songo lia Ufulielo wenu, we ulamwino wa mwono wenu.
10Ha kutwala ku ulamwino uno aprofeta afupile nikuhengula chikolo, waze aprofetezele ha kutwala ku vumbi lize muliza kuli yenu; 11nikuhengula ha chize, hanji mwaka uze, Spiritu ya Kristu, yoze wapwile muli ayo wenyikine, muze ashindakenyene Shimbu-kanda ha lamba lia Kristu, ni uhenya uze muukapwa kulutwe. 12Aalwezele ngwe, hi kuli ayo ko, aiioze kuli yetu atuvumbikile ni yino yuma, yize haliapwila hananwambulwilayo ku makanwa ja akwa kwambujola, muli Spiritu Musandu kanatumiwa mwilu; yuma yize angelo kakwivwa usona kuhengulamo.
13Kashika, jichikenu miya mu zalilo ja kunyonga chenu, keyelenu, nukataletale ndo ku songo ha vumbi lize makalineha kuli yenu ha usolwelo wa Yesu Kristu. 14Chizechene ngwe akwa kwononoka, kanda nulitesa ni usolo wenu wa kunyima mu kwalajala chenu: 15aiioze chizechene ngwe yoze wanutambikile kapwa musandu, ni yenwene nawa pwenu asandu ha kwenda chenu cheswe. 16Mumu chinasonewa ngwo, Pwenu asandu, mumu yami nguli musandu. 17Nyi kachi nwakumutongola ngwenu, tata yoze keshi katonde, kakupatula nikulita ni chitanga cha mutu ni mutu, endenu ni woma, wenyi wenu weswe: 18se nunanyingika hananukula, hi ni yuma ya kupola ko, ngwe prata hanji oru, ku kwenda chenu chamokomoko, chize anukunjikilecho tulamba twenu; 19aiioze ni manyinga alemu a Kristu, ngwe a mwanapanga keshi kapalia, keshi chipeka. 20Amunyingikine chamwenemwene shimbu kanda asela fundamentu ya hashi, aiioze hanamusolola ha kusula songo lia miaka mumu hali yenu. 21Yenu, kuli iye nwakufuliela Zambi, yoze wamuhindwishile hakachi ka afu, wamuhele uhenya; hanga Ufulielo wenu ni kutalatala chenu chikapwe muli Zambi.
22Se hinunatomesa mbunge jenu ha kwononoka chenu ku umwenemwene, hanga nukafwile mandumbu ni kufwila chize kuchishi ulembekese, lizangenu umwe mukwo ni mukwo ku mbunge yipema ni mbunge yeswe.
23Se hinunasemuka chaha, hi ku mbuto ya kupola ko, aiioze ku yize kuyishi kuhasa kupola, lie liji lia Zambi, lize lia mwono, kuliakulinduluka ndo ku miaka ya mutolo. 24Mumu
musunya weswe unapu ngwe mwambu,
ni uhenya wawo weswe ngwe chitemo cha mwambu;
mwambu muulela, ni chitemo chawo muchiholoka,
25aiioze liji lia Mwene kuliakulinduluka ndo ku miaka ya mutolo.
Lino lie liji lize hananwambulwilalio mu sango lipema.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 PETULU 1: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.