1 PETULU 2
2
1Kashika, mbilenu uhuka weswe, ni tulimbalimba eswe, ni ulembekese, ni lufwachinda, ni kuhanjika chipi. 2Chizechene ngwe ana-akemba waze anasemuka haliapwila, ivwenu chikolo usona ha yamwa ya uspiritu yize kuyishi kalimbalimba, hanga nukatatuke nayo ndo ku ulamwino, 3kachi hinunapanjika ngwe Mwene iye mukwa utu.
4Nwakwiza kuli iye, ngwe ku liwe lia mwono, alitunyinelio chamwenemwene kuli atu, aiioze kuli Zambi Hapwa lia kutongola, lilemu. 5Ni yenu nawa, ngwe mawe a mwono, kananutungu kupwa zuwo lia uspiritu, kupwa asasendote asandu, mukulambula yitapo ya uspiritu, ya kupemena chikolo kuli Zambi ku tachi ja Yesu Kristu. 6Mumu chinasonewa mu chisoneko ngwo,
Talenu, mungusa mu Zaione liwe lia lutwe lia mbango, lia kutongola, lilemu;
yoze mamufuliela kechi kevwa sonyi.
7Kuli yenu kashika, nwakufuliela,
iye mulemu: alioze kuli waze keshi kwononoka, liwe lia lutwe lia mbango.
8Chikwo ngwo, liwe lia kuhukanyisa, ni luliwe lwa kutalingisa; mumu kakuhukana ku liji, se keshi kwononoka:
ku chize aatongwelele.
9Alioze yenu nuli akwa munyachi wa kutongola, asasendote a ku wanangana, enya chifuchi chisandu, amwe atu a kwapita Zambi mwene, hanga nukambujole che kuhiana cha yoze hananutambika nukakatuke ku milima ndo ku pangu lienyi lia kukomwesa: 10Yenu, ha miaka ya kunyima kunwapwile atu aiioze haliapwila nuli atu a Zambi: te kunwawanyine keke, aiioze haliapwila hinunawane keke.
11Akwetu a zango, ngunaliumbu kuli yenu ngwe ngeji ni njize nukasúle ku usolo wa musunya uze wakwasa jita ni mbunge. 12Pwenu ni kwenda chenu ngwe chinate hakachi ka akwa mavungu: hanga chipwe manuhanjika ngwe akwa kulinga yipi, ku yitanga yenu yipema yize akumona, akachichimieke Zambi ha tangwa lia kukala ni lia kwononona.
13Zeyelenu ku yiyulo yeswe ya atu, mumu hali Mwene: chipwe kuli mwanangana ngwe munene Wahiana; 14hanji kuli manguvulu, ngwe waze akutumiwa kuli iye, akakale milonga ya akwa kulinga yipi, akahalise akwa kulinga yipema. 15Mumu chocho we upale wa Zambi, ha kulinga yipema, nukakolese kwalajala cha yizuzuke. 16Ngwe akwa kutusuka, aiioze kanda nutenga kutusuka chenu chifuko cha uhuka, aiioze ngwe ndungo ja Zambi. 17Lemesenu atu eswe, zangenu mandumbu, ivwenu woma kuli Zambi, lemesenu mwanangana.
18Yenu ngamba, zeyelenu kuli miata jenu ni woma weswe; hi kuli apema ni yimbovu wika ko, aiioze nawa kuli akalu. 19Mumu chino chinapemena kachi ha shimbi ya mbunge kuli Zambi, umwe manyongonona mu yinyengo, nikwivwa lamba, hi ha chitela chenyi ko. 20Mumu hahi manuchichimieka, kachi munuvulumuna, o manumbufula, chipwe munulihumikiza nacho? Alioze kachi ha kulinga yipema munwivwa lamba, munulihumikiza nacho, chino chinapemena kuli Zambi. 21Mumu ku chino hananutambika: mumu Kristu nawa wanuvwilile lamba, nikunuhichikila cheseko, hanga nukakaule mu ngano jenyi. 22Iye kavulumwineko, chipwe mu kanwa lienyi kawanyinemo kalimbalimba. 23Muze amutukile, katukanyine; muze evwile lamba, komishine; aiioze walikunjikile ku moko ja yoze wakupatula ni ululi. 24Iye mwene wambachile milonga yetu mu mujimba wenyi ha mutondo, hanga yetu se hitunafu ku milonga, tukapwe ni mwono ku ululi; ku mbandu jenyi hinunahinduka. 25Mumu yenu nwapwile nikupianguka ngwe mapanga, aiioze haliapwila hinunahilukila kuli Kafunga, Kalayi ka mbunge jenu.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 PETULU 2: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.