1 A-KORINDU 6
6
1Nyi umwe kali ni chuma cha kusopa ni mukwo, mahamuka kuchisopa kumeso ja yihenge, hi kumeso ja asandu ko, nyi? 2Hanji kunwanyingikine asandu makapatwila akwa hashi? Mba kachi munukapatwila akwa hashi, kunwatelele kupatula yikuma yikepekepe, nyi? 3Kunwanyingikine mutukapatwila angelo? Shinaho chikolo yuma ya kutwala ku mwono uno? 4Kashika kachi munupwa ni yuma ya kupatula ha kutwala ku mwono uno, munwasela kupatula waze anapu amokomoko mu chikungulwila, nyi? 5Ngunahanjika chino kunukolesa sonyi. Kumanyi, mukwa mana wakuhi hakachi kenu, nyi? Chipwe umuwika, yoze mahasa kupatula hakachi ka mandumbu jenyi, nyi? 6Alioze ndumbu masopesa ndumbu, ni chize kumeso ja waze keshi kufuliela.
7Ka, hichinapu kapalia muli yenu, nwakulisopesa umwe ni mukwo ni mukwo. Kuchi te ngwe Shinaho kunushi kuliecha akanulinge chipi? Kuchi te ngwe Shinaho kunushi kuliecha akanulake? 8Alioze yenwene nwakulinga yipi, nwakulaka, ni kuli mandumbu jenu.
9Hanji kunwanyingikine yihenge kechi kahinga wanangana wa Zambi. Kanda nulionga: chipwe mapangala, chipwe akwa kukombelela mahamba, chipwe yitanji, chipwe akwa luchisa, chipwe akwa utumwa, 10chipwe eji, chipwe akwa kwivwa kuzo, chipwe akwa kuzengewa, chipwe akwa kutukana, chipwe akwa kuhianyisa ndando, kechi kahinga wanangana wa Zambi. 11Ngwe wano amwe a kuli yenu nwapwile: alioze hananusanyisa, alioze hananusela ku usandu, alioze hananusambisa mu jina lia Mwene Yesu Kristu, muli Spiritu ya Zambi yetu.
12Yuma yeswe yinalite ni shimbi hali yami kulinga; alioze yuma yeswe kuyishi kufumbula; yuma yeswe yinalite ni shimbi hali yami kulinga; alioze chichi kuliecha akanguzeyese ku nichimwe. 13Kulia ha jimo, ni jimo ha kulia: alioze Zambi kumakahwisa yeswe yiali. Alioze mujimba hi ha utanji ko, alioze hali Mwene, ni Mwene ha mujimba: 14ni Zambi yoze wahindwishile Mwene, kumakatuhindwisa nawa ku tachi jenyi. 15Kunwanyingikine mijimba yenu yinapu yihanda ya Kristu? Kevwe munguchiza yihanda ya Kristu nguyipwise yihanda ya chikoi, nyi? Ka, pundu! 16Kuma, kunwanyingikine nyi, yoze malinunga ni chikoi mapwa mujimba umuwika? Mumu kanambe ngwenyi, E aali kumakapwa musunya umuwika. 17Alioze yoze malinunga ni Mwene mapwa Spiritu umuwika. 18Chinenu utanji. Milonga yize yeswe mutu mavulumuna yili haze lia mujimba; alioze yoze malinga utanji mavulumuna mujimba wenyi mwene. 19Kuma, kunwanyingikine nyi, mujimba wenu unapu tembele ya Spiritu Musandu, yoze uli muli yenu, yoze nuli nenyi wa kuli Zambi? Hi nuli a yenwene ko; 20mumu hananulande ni ndando: kashika Chichimiekenu Zambi mu mijimba yenu ni mu maspiritu jenu, mumu ya Zambi.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 A-KORINDU 6: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.