1 A-KORINDU 7
7
1Achi, ha kutwala ku yuma yize nwasonekene: ngwami, Chinawaha hali mutu kanda akambata pwo. 2Alioze mumu ha utanji ngwami, Mutu ni mutu akapwe ni pwo lienyi mwene, ni pwo ni pwo akapwe ni lunga lienyi mwene. 3Lunga akahane chize chinatambe kuli mukwo-pwo; chizechene pwo kuli mukwo-lunga. 4Pwo keshi chiyulo ha mujimba wenyi mwene, alioze mukwo-lunga: chizechene lunga keshi chiyulo ha mujimba wenyi mwene, alioze mukwo-pwo. 5Kanda nulilaka umwe ni mukwo, shina muchipwa ha kulitesa ha shimbu limwe, hanga nulitumbikile ku kulemba, hanga nukapwe hamuwika cheka nawa, hanga Satana kechi kanweseka mumu ha ulelu wenu wa kuyula mijimba yenu. 6Alioze chino ngunambe ngwe ha kutayiza, hi shimbi ko. 7Hindu ngunazange atu eswe akapwe chizechene ngwe yami; alioze mutu ni mutu chawana chenyi mwene cha vumbi kali nacho cha kuli Zambi, umwe ngwe chino, ni mukwo ngwe chocho.
8Alioze ngunambe kuli waze kambachile ni kuli twamishi ngwami, Chinawaha hali ayo kachi matwama chizechene ngwe yami. 9Alioze kachi kahashile kusúla, kachi akambate, mumu chipema kumbata, hi kusasaminya ko.
10Alioze kuli waze hanalimbata ngunambe, hindu hi yami ko alioze Mwene ngwenyi, Pwo kanda alihandununa kuli mukwo-lunga: 11(alioze chipwe kachi malihandununa kuli iye, kachi akatwame chizechene twamishi, nyi ka, akawane ni mukwo-lunga); ni lunga kanda akahichika mukwo-pwo.
12Alioze ha kutwala kuli akwo, yami ngunambe, hi Mwene ko; ngwami, Kachi ndumbu umwe mapwa ni mukwo-pwo yoze keshi kufuliela, iye matayiza kutwama nenyi, kanda akamuhichika. 13Pwo yoze mapwa ni mukwo-lunga yoze keshi kufuliela, iye matayiza kutwama nenyi, kanda akahichika mukwo-lunga. 14Mumu lunga yoze keshi kufuliela mamusela ku usandu muli mukwo-pwo, ni pwo yoze keshi kufuliela mamusela ku usandu muli mukwolunga; nyi ka, kachi ana jenu mapwa a luchisa; alioze haliapwila kanapu ku usandu. 15Hindu kachi yoze keshi kufuliela makatuka, akatuke: ndumbu hanji pangi keshi mu undungo ha kutwala ku yuma ngwe yino: alioze Zambi hanatutambika ku sambukila. 16Mumu ngwe kuchi munyingika, yena pwo, hanji makalamwina mukwenu-lunga, nyi Hanji ngwe kuchi munyingika, yena lunga, hanji mukalamwina mukwenu-pwo, nyi?
17Chino wika, chizechene ngwe Mwene hanane kuli mutu ni mutu, nikulita ngwe hanamutambika Zambi, chocho akende, chocho nakusela mu yikungulwila yeswe. 18Hanatambika umwe mu ungalami, nyi? Kanda amupwisa chilima. Umwe amutambikile mu ulima nyi? Kanda amupwisa ngalami. 19Ungalami hi chimwe ko, ni ulima hi chimwe ko, alioze nukafunge shimbi ja Zambi. 20Mutu ni mutu mu kutambika chize amutambikilemo, akatwame chizechere. 21Akutambikile mu undungo, nyi? Kanda uchinyonga, alioze kachi muhasa kutusuka, Shinaho linga nacho. 22Mumu yoze amutambikile muli Mwene mu undungo iye mukwa kutusuka wa Mwene: chizechene yoze amutambikile nikutusuka iye ndungo ya Kristu. 23Anulanjile ni ndando, kanda nupwa ndungo ja atu. 24Mandumbu, mutu ni mutu mu chize amutambikile, mo mwene akatwame hamwe ni Zambi.
25Achi, ha kutwala kuli ana-mapwo aze kanda aya ulo liji lia chiyulo chishi nalio lia kuli Mwene, alioze ngunahana upatwilo wami ngwe umwe yoze hanawane keke kuli Mwene ngupwe wamwenemwene. 26Kashika ngunashinginyeka chino chinawaha, mumu ha lamba lia haliapwila, chinawaha hali mutu akapwe chocho. 27Unakashiwa kuli pwo, nyi? Kanda ufupa kukasuluka. Unakasuluka kuli pwo, nyi? Kanda ufupa pwo. 28Alioze kachi mumbata kachi kwavulumwineko; kachi mwana-pwo yoze kanda amumbata, maya ulo kachi kavulumwineko. Hindu waze ngwe wano kumakapwa ni luyinda ha mwono uno: alioze keke ngunanuvwila. 29Alioze chino ngunambe, mandumbu, ngwami, Mwaka hiwatepuluka; hanga waze ali ni mapwo akapwe ngwe keshi no. 30Ni waze malila ngwe kalilileko; ni waze mawahilila, ngwe kawahililileko; ni waze malanda ngwe kapichileko; 31ni waze malinga ni yuma ya hashi, ngwe kalingileko nayo liakulu: mumu tushilikilo twa hashi meza kuhwa.
32Alioze ngunazange nukapwe kunushi yipikalo. Yoze kambachile mazanga yuma ya Mwene ngwe mahasa kupemena kuli Mwene: 33alioze yoze hanambata pwo mazanga yuma ya hashi ngwe mahasa kupemena kuli mukwo-pwo. 34Kulipwila kuchili hakachi ka njaulo ni yoze kanda achiya ku ulo. Yoze keshi ku ulo mazanga yuma ya Mwene, hanga akapwe musandu, ni mu mujimba ni mu Spiritu: alioze yoze njaulo mazanga yuma ya hashi, ngwe mahasa kupemena kuli mukwo-lunga. 35Ni chino ngunambe mukunufumbula; chafupile kunutela muheto, alioze ha chize chinalite, hanga nukavumbike Mwene kunushi yisaka.
36Alioze kachi umwe nushinginyeka ngwe kalingile kanawa ni mwanenyi wa *virgem, kachi mahiana kukula cha miaka yenyi, kachi chatamba kupwa, akalinge chize mapala, keshi kuvulumuna, akamumbate. 37Alioze yoze majikiza mu mbunge yenyi se keshi kumukapwola, alioze chiyulo akwete ha upale wenyi mwene, hanapatula mu mbunge yenyi mwene kufunga mwanenyi wa *virgem, malinga kanawa. 38Chocho kevwe, yoze mahangisa malinga kanawa; alioze yoze keshi kuhangisa malinga kuhiana.
39Pwo makashiwa ni shimbi ha shimbu lize lieswe mukwo-lunga mapwa ni mwono, alioze kachi mukwo-lunga mafwa kachi makatusuka akaye ulo kuli mweswe mamuzanga; alioze muli mwe Mwene wika. 40Alioze kawaha kuhiana kachi matwama chizechene, nikulita ni upatwilo wami: ngunashinginyeka yami nawa nguli ni Spiritu ya Zambi.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 A-KORINDU 7: Csa
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Chokwe Bible © Bible Society in Angola, 1975.