1 Korenti 6
6
Yaa dandantieba n yi bi lieba ti buudi
1Yi yaa pia maama yi siiga, be yaa po ke yi yen taa ma ki gedini yaaba n ki daani bujiali kani, ki kan gedini ma bi nigagidiŋanba kani? 2Yii bani ke bi nigagidiŋanba n baa jia ŋanduna buudi? Lanwani, li yaa tie ke yi baa jia ŋanduna buudi, yi baa gbali ki jia ti buwaadi bi? 3Yii bani ke ti baa jia malekinba buudi? Lanwani, laa pia kuli tama, ke ti baa fidi ki jia ti buudi yaa jamaano n tie ne yaa maama po. 4Lanwani, yi yaa pia o naa jamaano yaa maama leni yiyaba, yi yen taa Kilisiti Nitaanli n ki pia leni yaaba ŋantaado yene, ban tua yi bujiaba. 5N yedi yeni ki bua i fe n cuo yi. Naani yii pia yi siiga ba niyendo yua n pia mi yanfuoma, ki baa fidi ki jia ti buudi o kpiiba siiga? 6Naani yi siiga yua n pia mi maama leni o kpiilo baa gedini o ti buudi po, yaaba n kaa daani kani yo?
7Ba yin pia ti buudi leni yiyaba yeni, li doagidi yi gbalime. Laa bi baa yaa ŋani ki cie yin juuni leni yi kpiiba n tieni yi yaa bonbiadila ka? Laa bi baa yaa ŋani ki cie yin tuo ban je yi ka? 8Ama yinba n tiendi laa bonbiadila, ki di nitoaba, bani yaaba n tie yi kpiiba yeni. 9Yii bani ke yaaba n ki tiegi kan ba biinu U Tienu diema nni yo? Yin da boandi yi yula. Yaaba n tiendi ti cagindi, i buli danba, mi conconma danba, yaaba n biidi bi yula, yaa jaba n taagi leni biyaba, 10a suuda, bi ŋaliŋabuaba, a dañogaada, yaaba n sugidi bi niba leni i janbi danba kuli kan baa biinu U Tienu diema nni. 11Yi siiga bi nitianba den tie laa nibuolu, ama U Tienu ŋuudi yi, ki gagidi yi, ki teni ke yi tua niteginkaaba o Diedo Jesu Kilisiti yeli leni ti Tienu Fuoma po.
A gbanandi n yaa ye o Diedo kpiagidi po
12Bi tianba yi siiga tua: «Mii go kua liba,» ama li bonla kuli ka ŋani. N baa fidi ki yedi: «Mii go kua liba kuli,» ama n kan tuo liba kuli n diedi nni. #1Kor 10.23. 13Yi go tua: «Mi jiema ye ku tugu po, ku tugu mo ye mi jiema po.» U Tienu baa ti bolini likuli yenma. Ama ti gbanandi naa ye mi conconma po ka, ti ye o Diedo po, o Diedo mo ye ti gbanandi yaa po. 14U Tienu, yua n den fiini o Diedo bi tinkpiba siiga, o go baa fiini timo, kelima o paalu yaa po. 15Yii bani ke yi gbanandi tie Kilisiti gbananbuoli ka yo? Naani n baa taa Kilisiti gbananbuoli ki teni yin tua li puokpagili gbananbuoli? Kalam! 16Yii bani ke yua n taani leni li puokpagili, tua gbananyendi leni o ka? Li diani: Bani nibilie baa tua gbananyendi.#Cil 2.24. 17Yua n taabi o Diedo tua yendo leni o.
18Yin sani ki foagidi mani leni mi conconma. Tuonbiatoadi kuli ye ti gbanandi niinpo, ama yua n puni o yuli mi conconma po, tudi o gbanandi po yo. 19Yii bani ke yi gbanandi tie U Tienu Fuoma Yua yua n ye yi niinni dieli, U Tienu n puni yi yua, ke yii go die yi yula? #1Kor 3.16; 2Kor 6.16. 20Moamoani o daa yi leni yaa dunga n pa. Lanwani, yin yaa kpiagidi U Tienu yi gbanandi nni.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 Korenti 6: BGP
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Gulmancema Protestant Bible © Bible Society of Burkina Faso, 2013.