1 Korenti 2
2
Kilisiti kuuma wangima
1N kpiiba, min den cua yi kani yaa yogunu, ki wangi yi U Tienu moamoani yii n duagi, mii den cua leni mi mabanma, bi leni mi yanfuocianma ka. 2N den jagi ki sua ke laa tie tiladi min bandi bontoala kuli yi siiga, kali Jesu Kilisiti, ban den kpaa wani yua li dapoanpoanli po yeni. 3N den ye yi siiga leni ku tadingu ki digibi kelima ti jawaandi po. #JTT 18.9. 4N mawangima leni n bangima naa den ŋua bi nisaaliba mabanma ka. Ama li den tie leni U Tienu Fuoma Yua leni o paalu doagidima yaa po, 5ke yi dandanli n da se kelima bi nisaaliba yanfuoma po, ama U Tienu yaa paalu po.
U Tienu yanfuoma maama fuuli
6Min bangi yaala, tie yanfuoma bangima yo Kilisiti niba yaaba n kpeligi li dandanli nni po. Laa yanfuoma naa tie o naa jamaano yaama ka, laa tie ŋanduna bali danba yaaba n ye mi bodima sanu nni yanfuoma mo ka. 7Ti wangi U Tienu yaa yanfuoma maame, yaama n duagi ki wuo bi nisaaliba po, U Tienu n den tuodi ki bili yaama ke man yaa tie ti po ti kpiagidi. 8Ŋanduna bali danba siiga oba kuli naa den bani laa yanfuoma. Bi yaa den bandi ma, bi kan den kpaa ti kpiagiciandi Diedo li dapoanpoanli po. 9Nani lan diani ki yedi maama:
«Nunbu n daa laa yaala,
Tubili n daa gbadi yaala,
O nisaalo n daa kpaagi yaala mo,
U Tienu tuodi ki ŋanbi lani kuli
Yaaba n bua o po.» #Esa 64.3.
10U Tienu teni ke o Fuoma doagidi la tinba yaa po. O Fuoma biigidi li bonla kuli, baa U Tienu jaga ya n wuo ki ñua. 11Bi nisaaliba siiga ŋme bani o nisaalo pali tugu nni bonla, li yaa tie o nisaalo yantiaceli yaali n ye o niinni? Likuli yenma leni U Tienu. Oba kuli ki bani U Tienu pali tugu nni bonla, kali U Tienu Fuoma Yua.
12Tinba, tii baa ŋanduna yantiali, ama ti baa yaa Fuoma n ñani U Tienu kani, ke tin fidi ki bandi U Tienu n puni ti yaala kelima o ŋanbili po. 13Tii maadi laa bonla nani mi nisaali-yanfuoma n bangi yaala ka, ama nani U Tienu Fuoma Yua n bangi ti yaame ki doagidi li moamoani yaaba n pia U Tienu Fuoma Yua po. 14Ama li nisaali-yantiali n die yua, kan fidi ki gaa yaa bonla n ñani U Tienu Fuoma Yua kani, kelima li tie o po yanluobonla. O kan bandi la kelima li biigidi leni U Tienu Fuoma Yua yaa yantiale. 15U Tienu Fuoma Yua yantiali n diedi yua biigidi li bonla kuli. Ama oba kuli kan fidi ki biigi ki bandi wani. 16Li diani:
«Ŋme bani o Diedo yantiali?
Ŋme n baa fidi ki bangi o?»
Ama, tinba ti pia Kilisiti yaa yantiali. #Esa 40.13.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 Korenti 2: BGP
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Gulmancema Protestant Bible © Bible Society of Burkina Faso, 2013.