1 Korenti 1
1
I fuondi leni Korenti Kilisiti Nitaanli yema
1—6
I fuondi
1Mini Poli, U Tienu n den yini yua, kelima o yanbuama po, ke min tua Jesu Kilisiti tondo, n taani leni ti kpiilo Sositeni 2ki diani li tili U Tienu Nitaanli, yaali n ye Korenti dogu nni po. O den gagidi ki ŋanbi yi Jesu Kilisiti nni, ke yin yaa tie o nigagidiŋanba. N fuondi yi leni yaaba n jaandi ki miadi ti Diedo Jesu Kilisiti i kaani kuli, wani yua n tie bi Diedo leni ti yaa Diedo. #JTT 18.1.
3Ti Baa U Tienu leni o Diedo Jesu Kilisiti n pa yi li ŋanbili leni mi yanduanma.
Tin baa yaa seli Kilisiti nni
4Yogunu kuli n tuondi U Tienu yi po, kelima yin baa yaa ŋanbili o kani Jesu Kilisiti nni. 5O yaa niinni, yi den baa li seli li bonla kuli nni, lan tie mi maama leni mi bancianma kuli po. 6Lani n tie ke yin den gbadi yaa siedi Kilisiti po, den puu ki go se yi siiga ki pa. 7Yeni U Tienu paabu kuli siiga, ba bonyenbu ki poadi yi po, yin guu ke U Tienu baa doagidi ti Diedo Jesu Kilisiti yaa yogunu. 8Wani U Tienu n baa teni yin yaa se ki pa hali mi juodima yogunu, ke ban da fidi ki kuli yi leni liba kuli, ti Diedo Jesu Kilisiti cuama daali. 9U Tienu tie tin fidi ki dugi yua yaa po, wani yua n den yini yi ke yin yaa pia yanyenma leni o Bijua Jesu Kilisiti ti Diedo.
Mi paadima Kilisiti Nitaanli siiga
10N kpiiba, n mia yi ki go tundi yi, kelima ti Diedo Jesu Kilisiti yeli po, ke yikuli n yaa mani leni yiyaba, ke paadimiba kuli n da ye yi siiga. Lani n tie yin yaa taa yenma yi yantiana leni yi jaga kuli nni. 11N kpiiba, Kilowe#1.11 Kilowe: Kilowe den tie pua yo ki moko den daani. diegu yaaba den waani nni ke mi niama ye yi siiga. 12Min bagi yaala tie ke yi siiga one tua: «Mini wani n ŋua Poli,» one: «Mini wani n ŋua Apolosi,» one: «Mini wani n ŋua Sefa,» one mo: «Mini wani n ŋua Kilisiti.» #JTT 18.24. 13Naani Kilisiti boagidi yo? Naani bi den kpaa Poli yo li dapoanpoanli po ki baa faabi yi? Bi, bi den batisi yi Poli yeli po yo?
14N tuondi U Tienu ke mii den batisi yi siiga oba kuli, kali Kilisipusi leni Gayusi. #JTT 18.8; 19.29; Lom 16.23. 15Lanwani, oba kuli kan yedi ke bi den batisi o mini yaa yeli po. 16Moamoani, n den batisi Sitefana leni o deni yaaba moko, mii tiani n yaa go den batisi nitoa. #1Kor 16.15. 17Kilisiti naa den soani nni ke min batisi bi niba ka. Ama o den soani nni ke min yaa wangi o Laabaaliŋamo, ke laa tie min yaa wangi o leni mi yanfuodanmaama ka, ke Kilisiti dapoanpoanli n da tua fanma.
Kilisiti tie U Tienu paalu leni o yanfuoma
18Li dapoanpoanli yaa mawangima tie yanluoma yaaba n baa bodi po. Ama tinba yaaba n tindi po, li tie U Tienu paalu. 19Li diani ki yedi:
«N baa bolini bi yanfuodanba yanfuoma,
Ki biani bi nunfandanba nunfanbu.» #Esa 29.14.
20Lanwani, o yanfuodaano ye le? Li bali maama bando go ye le? U naa yogunu nianiado go ye le? Naani U Tienu ki doagidi ke ŋanduna yanfuoma kuli tie mi yanluoma ka? #Jb 12.17; Esa 19.12; 33.18; 44.25. 21Bi nisaaliba leni bi yaa yanfuoceli naa fidi ki bandi U Tienu leni wan doagidi o yanfuoma maama. Lanwani, U Tienu den jagi ke o baa faabi yaaba n daani leni o Laabaaliŋamo wangima, yaama n tie nani mi yanluomaama yeni. 22Jufinba miadi mi bancianma, Girekinba mo lingi mi yanfuoma. 23Ama tinba wani wangi Kilisiti, ban den kpaa yua li dapoanpoanli po. Laa maama tie tingbali bonla Jufinba po, ki tie yanluoma mo bi nilanba po. 24Ama U Tienu n yini yaaba po, ban tie Jufinba bi ban tie Girekinba, Kilisiti tie U Tienu paalu leni U Tienu yanfuoma. 25U Tienu yanluoma fani ki cie bi niba yanfuoma, U Tienu tadingu mo pa ki cie bi nisaaliba yaa paalu.
26N kpiiba, kpaagi ki le yin tie yaaba. Yi siiga yaaba n tie yanfuodanba naa yabi, yaaba n tie paatieba leni bulicinba moko naa fuu. 27Ama U Tienu gandi bi nisaaliba n nua yaala ke li tie yanluobonla, ki baa waani bi yanfuodanba i fe. O gandi bi nisaaliba n nua yaala ke li tie tadinbonla, ki baa waani bi paatieba i fe. 28O gandi bi nisaaliba n nua yaala ke li tie bonfanla ki fali la ke laa tie puu, ki baa bolini ban nua yaala ke li tie bonmoanla. 29O tieni yeni ke nisaaloba kuli n da kpiagi o yuli wani U Tienu kani. 30Ama yinba, U Tienu teni ke yi ye Jesu Kilisiti nni. O go teni ke Jesu tie ti po mi yanfuoma, mi teginma, mi gagidiŋanma leni mi daafaabima.#1.30 Mi teginma yeni bua ki yedi ke Jesu ñani ti tuonbiadi kuli, ke U Tienu yedi ke tii go pia tagiliba kuli. Mi gagidiŋanma yeni bua ki yedi ke Jesu taani ti leni wani o ba ke tinba leni wani kuli gagidi ki ŋani U Tienu po. Mi daafaabima yeni bua ki yedi ke Jesu faabi ti leni ti tuonbiadi, Sutaani leni mu cicibiadimu kuli paalu, ke tin da go tie bi yonbi. 31Lanwani, nani lan diani maama:
«Yua n bua ki jigini o yuli,
Wan jigini o yuli o Diedo nni.» #Jer 9.23.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
1 Korenti 1: BGP
ಹೈಲೈಟ್ ಮಾಡಿ
ಕಾಪಿ
ತಾಳೆಮಾಡಿ
ಹಂಚಿಕೊಳ್ಳಿ
ನಿಮ್ಮ ಎಲ್ಲಾ ಸಾಧನಗಳಲ್ಲಿ ನಿಮ್ಮ ಮುಖ್ಯಾಂಶಗಳನ್ನು ಉಳಿಸಲು ಬಯಸುವಿರಾ? ಸೈನ್ ಅಪ್ ಮಾಡಿ ಅಥವಾ ಸೈನ್ ಇನ್ ಮಾಡಿ
Gulmancema Protestant Bible © Bible Society of Burkina Faso, 2013.