Потон 5
5
5-тӥ ЛЮКЕТ
1Та бере Моисеен Аарон фараон доры лыктыса шуизы: «Тазьы шуэ Израильлэн Инмарез Кузё-Инмар: ”Мынэсьтым калыкме кошкыны лэзь, луоё кыр дуннеын, Мыным сӥзьыса, праздник мед ортчытоз”». 2Нош фараон шуиз: «Кин со сыӵе Кузё-Инмар, Солэсь верам кылзэ мон мед кылзӥськом но израиль [пиосты] кошкыны мед лэзём? Кузё-Инмарез мон уг тодӥськы, Израилез кошкыны уг лэзьы». 3Соос [солы] шуизы: «Еврейёслэн Инмарзы милемыз ӧтиз; луоё кыр дуннее куинь нунал мынымон кеме милемыз кошкыны лэзь, Инмармылы Кузё-Инмарлы курбон сётыны мед быгатомы вал, урод черен яке мечен Со милемыз медаз погырты вал». 4Египетлэн эксэез соослы шуиз: «Моисеен Аарон, малы тӥ калыкме ужано ужъёсызлэсь палэнтӥськоды? Мынэлэ [ваньды] ужано удысады». 5Фараон шуиз на: «Тани та музъемын трос лыдо калык улэ, нош тӥ солы ужаны люкетӥськоды».
6Со нуналэ ик фараон та калыклэсь ужамзэ эскерисьёслы, чакланы пуктэмъёслы таӵе косон сётӥз: 7«Азьланяз та калыклы кирпич лэсьтыны куро эн сётэ, кызьы тӥ лэсьтӥды толон но, толон валлян но: асьсэос асьсэлы куро бичаса мед ветлозы; 8нош тӥ соосты косэ сомында ик кирпич лэсьтыны, кӧня соос лэсьто вал толон но, толон валлян но, кирпич лэсьтонзылэсь лыдзэ эн кулэстэ; соос азьтэмесь, соин ик тазьы кесясько: ”Мыномы но Инмармылы курбон сётомы”; 9соослы тросгес уж сётоно, мед ужалозы, кылынызы супыльтыса медаз улэ». 10Калыклэсь ужамзэ эскерисьёс, чакланы пуктэмъёс потыса калыклы шуизы: «Тазьы шуэ фараон: ”Тӥледлы куро уг сётӥськы; 11асьтэос мынэ но кытысь шедьтоды, отысь куро басьтэ; нош быдэсъяно ужды уг кулэстӥськы”». 12Еврей калык быдэс Египет музъеме пазьгиськиз куро интые арам бервылысь ӝыжызэ бичаны. 13Ужамзэс учкыны-чакланы пуктэмъёс дыртытыса шуо: «Сомында ик кирпич лэсьтэ котькуд нуналэ, куроды вань дыръя кӧня лэсьтӥськоды вал». 14Нош фараонлэн ужам ужез учкись-чаклась муртъёсыз израиль пиос пӧлысь ик быръемын вал, соосты чакланы пуктэм муртъёссэ жуго-тышкало но шуо: «Малы тӥ толон но, туннэ но нуналлы быдэ кӧня кулэ, сомында кирпич уд лэсьтӥське, кӧня лэсьтӥськоды вал та дырозь?» 15Израиль пиос пӧлысь эскерись-чакласьёс лыктӥзы но фараонлы сюлворыса вазиськизы: «Аслад ляльчиосыдлы малы тон озьы кариськод? 16Ляльчиосыдлы куро уг сёто, нош кирпич лэсьтыны косо. Тани, тынэсьтыд ляльчиостэ жуго-тышкало. Сьӧлык луоз тынад калыкедлы». 17Нош фараон [таослы] шуиз: «Ужаны мылды уг поты, азьтэмесь тӥ, азьтэмесь, соин ик шуиськоды: ”Мыном но Кузё-Инмарлы курбон сётом”. 18Мынэлэ, ужалэ ук! Куро тӥледлы уз сётэ, нош кӧня кулэ, сомында кирпич лэсьтэ». 19Израиль пиослэн эскерись-чакласьёссы фараонлэн «нуналлы быдэ кӧня кирпич лэсьтыны тӥ кулэ, сомында ик лэсьтэ» верам кылысьтыз азьпал курадӟонъёссы сярысь тодӥзы. 20Фараон дорысь потэм беразы соосты возьмаса сылӥсь Моисеен Ааронэз пумитазы, 21таослы соос шуизы: «Кузё-Инмар тӥледыз мед адӟоз но милемыз фараон азьын, солэн ляльчиосыз азьын синазькыльёслы пӧрмытэмды понна судить мед кароз, соослэн киязы меч сётӥды милемыз виён понна». 22Соку Моисей Кузё-Инмарлы вазиськыса шуиз: «Кузё-Инмаре! Мар понна Тон та калыкез таӵе шугадӟон улэ сётӥд, малы монэ татчы ыстӥд? 23Уго фараон доры лыктэм дырысеным, Тынад нимыныд вераны кутскем дырысеным, та калыкез со уродгес но уродгес возьыны кутскиз; мозмытыны ке нош Тон Ас калыктэ ӧд мозмыты».
Currently Selected:
Потон 5: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016