Потон 6
6
6-тӥ ЛЮКЕТ
1Кузё-Инмар Моисейлы шуиз: «Табере тон адӟод, мар Мон каро фараонэн: кужмо килэн кужымезлы чидатэк, фараон соосты (еврейёсты) кошкыны лэзёз; кужмо килэн кужымезлы чидатэк, со соосты ас музъемысьтыз уллялоз». 2Инмар Моисейлы таӵе кылъёс вераз: «Мон – Кузё-Инмар. 3Авраамлы, Исааклы, Иаковлы Мон ”Ваньмызлэсь Кужмо Инмар” нимын возьматскылӥ, нош ”Кузё-Инмар” нимыным соослы ӧй усьтӥськы; 4соосын Мон сӥзён-косон пыр кусып кылдытӥ пыдйылчи радын, пыдйылчи луыса ветлон Ханаан музъемез соослы сётон понна. 5Мон кылӥ израиль пиослэсь викышъяса бӧрдэмзэс, египет калык соосты ляльчи радын возе шуыса ӝожтӥськемзэс, соку Мон соосын сӥзён-косон пыр кылдытэм кусыпме тодам вайи. 6Озьыен, израиль пиослы тазьы шу: ”Мон – Кузё-Инмар, тӥледыз египет калыклэн зӥбет улысьтыз потто, ляльчи радын возёнзылэсь тӥледыз мозмыто, кужмо суйбыгытэным, быдӟым судъёсыным тӥледыз утё; 7тӥледыз Аслым калык каро, тӥледлы Инмар луо, соку тӥ тододы: Мон – Кузё-Инмар, тӥляд Инмарды, тӥледыз [Египет музъемысь,] Египетлэн зӥбет улысьтыз поттӥсь; 8Мон тӥледыз нуо со музъеме, кудзэ Мон, киме ӝутыса, Авраамлы, Исааклы, Иаковлы сётыны сӥзи, сое тӥледлы люкетлы сёто. Мон – Кузё-Инмар”». 9Моисей тае израиль пиослы вераз; нош соос Моисейлэсь верамзэ санэ ӧз понэ, секыт ужез быдэсъяса улэменызы, мылкыдзы секыт вал. 10Кузё-Инмар Моисейлы тазьы шуиз: 11«Мын, Египетлэн эксэезлы, фараонлы, вера, со израиль пиосты ас музъем вылысьтызы кошкыны мед лэзёз». 12Моисей Кузё-Инмар азьын тазьы шуиз: «Тани, израиль пиос мынэсьтым верамме санэ уг поно, нош фараон кылзӥськоз меда монэ? Мон вераськыны быгатӥсь мурт ӧвӧл ук». 13Соку Кузё-Инмар Моисеен но Ааронэн вераськиз, Со косӥз израиль пиос доры, Египетлэн эксэез, фараон, доры мыныны израиль пиосты Египет музъемысь поттон вылысь.
14Тани израиль пиослэн выжыоссылэн йыръёссы: Израильлэн нырысь вордскем пиезлэн, Рувимлэн, пиосыз: Ханох, Фаллу, Хецрон, Харми – та Рувимлэн семьяосыз. 15Симеонлэн пиосыз: Иемуил, Иамин, Огад, Иахин, Цохар, Саул – Хананей кышнолэн пиез: та Симеонлэн семьяосыз. 16Тани Левийлэн пиосыз, выжыосыз: Гирсон, Кааф, Мерари. Левий сю куамын сизьым ар улӥз. 17Гирсонлэн пиосыз: Ливни, Шимеи асьсэ семьяосын. 18Каафлэн пиосыз: Амрам, Ицгар, Хеврон, Узиил. Кааф сю куамын куинь ар улӥз. 19Мерарилэн пиосыз: Махли, Муши. Та Левийлэн выжы-кумыосыз асьсэлэн семьяосынызы ӵош. 20Амрам кышно басьтӥз Иохаведаез, атаезлэсь сузэрзэ, солэн Аарон но Моисей пиосыз вордскизы, [Мариам апайзы]. Амрам сю куамын сизьым ар улӥз. 21Ицгарлэн пиосыз: Корей, Нефег но Зӥхри. 22Узииллэн пиосыз: Мисаил, Елцафан но Сӥфри. 23Аарон Аминадавлэсь Елисавета нылзэ, Наассонлэсь сузэрзэ, кышно басьтӥз; солэн Надав, Авиуд, Елеазар но Ифамар пиосыз вордскизы. 24Корейлэн пиосыз: Асир, Елкана но Авиасаф: та Корейлэн семьяосыз. 25Ааронлэн Елеазар пиез кышно басьтӥз Футииллэсь одӥгзэ нылзэ, солэн Финеес пиез вордӥськиз. Та вал Левий выжыослэн йыръёссы асьсэ семьяосынызы валче. 26Кузё-Инмар Ааронэн Моисейлы косон сётӥз израиль пиосты Египет музъемысь поттыны, – ожгарчиосты кадь, радэн-радэн султытыса, поттыны косӥз. 27Соос ик Египетлэн эксэезлы, фараонлы, израиль пиосты Египетысь поттыны мед лэзёз шуыса веразы, – та Моисеен Аарон вал. 28Озьы, Египет музъемысен Моисейлы Кузё-Инмар вераку, 29Кузё-Инмар Моисейлы тазьы шуиз: «Мон – Кузё-Инмар! Египетлэн эксэезлы, фараонлы, ваньзэ вера, мае али Мон тыныд верасько». 30Нош Моисей Кузё-Инмар азьын шуиз: «Мон вераськыны быгатӥсь мурт ӧвӧл ук, кызьы нош фараон мынэсьтым верамме кабыл басьтоз?»
Currently Selected:
Потон 6: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016