Потон 10
10
10-тӥ ЛЮКЕТ
1Соку Кузё-Инмар Моисейлы шуиз: «Фараон доры пыр, уго Мон солэсь, ляльчиосызлэсь но сюлэмзэс секытомытӥ соос пӧлын та паймымон тодметъёсме возьматон понна, 2аслад пиедлы, пиедлэн пиезлы вераны мед быгатод, мар Мон Египетын лэсьтӥ, кыӵе паймымон тодметъёс та музъемын возьматъяй, тӥ мед тододы, Мон Кузё-Инмар шуыса». 3Моисеен Аарон фараон доры лыктӥзы но солы шуизы: «Тазьы шуэ еврейёслэн Инмарзы Кузё-Инмар: ”Кема-а тон Мыным тэрытскытэк улод на? Мынэсьтым калыкме кошкыны лэзь, со, Мыным сӥзьыса, вӧсяськон ортчытыны мед быгатоз; 4нош калыкме мыныны ӧд ке лэзьы, соку, тани, ӵуказе [та дыре ик] тынад музъем вылад саранча лэзё: 5со музъемлэсь ымнырзэ тазьы шобыртоз – сюез ик уд адӟы, [музъем вылады] йӧзор бере мар кылиз, [ваньзэ] сиёз; бусыосады будӥсь писпуосты но ваньзэ сиёз, 6тынад коркаосад, вань ляльчиосыдлэн коркаосазы, Египетын улӥсь вань калыклэн [вань] коркаосаз пачылаз саранча люкаськоз, таӵезэ атайёстылэн но, атайёстылэн атайёссылэн но музъем вылын улыны кутскемзы дырысен туннэ нуналозь но таӵезэ адӟемзы ӧй вал”». [Моисей] берытскиз, фараон дорысь потыса кошкиз. 7Соку фараонлэн ляльчиосыз солы шуизы: «Кема-а со асьмеды курадӟытыса возёз на? Та адямиосты кошкыны лэзь, асьсэлэн Инмарзылы Кузё-Инмарлы сӥзьыса, вӧсяськон мед ортчытозы; Египет кулэ-быре ини шуыса, тон уд адӟиськы на шат?» 8Моисеен Ааронэз фараон доры берыктыса вайизы но [фараон] соослы шуиз: «Мынэлэ, асьтэлэн Инмардылы Кузё-Инмарлы вӧсяськон ортчытэ; кин но кин отчы мыноз?» 9Соку Моисей шуиз: «Пичи пиналъёсынымы но пересь муртъёсынымы, пиосынымы но нылъёсынымы, ыжъёсынымы но ошъёсынымы ӵош огазьын мыномы, уго та [Инмармылы] Кузё-Инмарлы сӥзем праздникмы». 10[Фараон] соослы шуиз: «Озьы мед луоз, Кузё-Инмар тӥледын! Тӥледыз лэзьыны мон дась, но малы пичи пиналъёсыныды ӵош кулэ тӥледлы мыныны? Уд адӟиське-а, умойтэм малпанды вань шуыса! 11Озьы уз луы! Пиосмуртъёс гинэ, асьтэ понна мыныса, Кузё-Инмарлы сӥзем вӧсяськонэз ортчытэ, уго тӥ тае гинэ куриды». Соосты фараон дорысь уллязы.
12Соку Кузё-Инмар Моисейлы шуиз: «Египет музъем вылэ кидэ ӝут, Египет музъем вылэ саранча мед васькоз но музъем вылын будӥсь вань турынэз, [писпуосысь вань емышез,] йӧзор бере мар кылиз, ваньзэ мед сиёз». 13Соку Моисей бодызэ Египет музъем вылэ ӝутӥз но, Кузё-Инмар та музъем вылэ шундыӝужанысь тӧл пельтытӥз, быдэс нунал, быдэс уй со пельтӥз. Ӵукна вуиз но, шундыӝужанысь вуэм тӧл саранча вайиз. 14Быдэс Египет музъем вылэ саранча васькиз, соос туж трос вал, быдэс Египет музъемез шобыртӥзы: азьвыл ноку но тамында саранча ӧй вал, берло дыръёсы но тамында уз луы; 15саранча быдэс музъемлэсь ымныр вылзэ шобыртӥз, сюй выл ик ӧз ни адӟиськы; йӧзор бере кылем музъем вылын будӥсь вань турынэз но, писпуосын будӥсь вань емышъёсты но – ваньзэ сииз. Быдэс Египет музъеме вож турын но, писпуосы вож куар но ӧз кыльы. 16Фараон дыртыса Моисеен Ааронэз ӧтьытӥз но соослы шуиз: «Инмарды Кузё-Инмар азьын, тӥ азьын но сьӧлыкай; 17эшшо одӥг пол сьӧлыкме куштэ но Инмарды Кузё-Инмар азьын мон понна вӧсяське, Со мед ик палэнтысал та эзелез мон бордысь». 18[Моисей,] фараон дорысь потыса, Кузё-Инмарлы вӧсяськиз. 19Кузё-Инмар табере мукет палась, шундыпуксён палась, туж кужмо тӧл вайиз но тӧл саранчаез Горд Кам зарезе нуыса куштӥз – быдэс Египет музъеме одӥг саранча но ӧз кыльы. 20Нош Кузё-Инмар фараонлэсь сюлэмзэ лекомытӥз но, со израиль пиосты кошкыны ӧз лэзьы.
21Соку Кузё-Инмар Моисейлы шуиз: «Кидэ ин пала ӝут, соку Египет музъем вылэ пеймыт усёз, киын кутоно кадь тём-тём пеймыт луоз». 22Моисей кизэ ин пала ӝутӥз но, куинь нунал ӵоже быдэс Египет музъемын тём-тём пеймыт улӥз; 23адямиос огзэс огзы адӟыны ӧз быгатэ, куинь нунал ӵоже нокин но интыысьтыз ӧз султылы; нош израиль пиослэн ваньзылэн улоно интыосазы югыт вал. 24Фараон Моисеен [Ааронэз] ӧтьытыса шуиз: «Мынэлэ [Инмардылы] Кузё-Инмарлы сӥзем вӧсяськон ортчытэ, векчи сюро, таза сюро пудоосты гинэ мед кылёзы, но нылпиосты сьӧрады мед мынозы». 25Нош Моисей шуиз: «[Озьы уз луы,] киямы сёт на курбонъёсты, тылын сутоно курбонъёсты, соосты Инмармылы Кузё-Инмарлы сётыны мед быгатомы. 26Пудо уллёосмы но милемын ӵош мед мынозы, одӥг гижы но медаз кыльы: уго соос пӧлысь ми быръёмы Инмармылы Кузё-Инмарлы курбонлы сётыны ярамонзэ; нош со интые вуытозямы ми ум тодӥське, [Инмармылы] Кузё-Инмарлы кудзэ курбонлы сётоно». 27Кузё-Инмар фараонлэсь сюлэмзэ лекомытӥз но, солэн соосты лэземез ӧз поты. 28Соку фараон солы шуиз: «Кошкы мон дорысь, чакласькы, азьло-берло мон азе эн ни возьматскылы; ымнырме адӟон нуналад – кулод». 29Нош Моисей шуиз: «Кызьы тон шуид, озьы ик луоз, тынэсьтыд ымнырдэ азьланяз уг ни адӟы».
Currently Selected:
Потон 10: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016