Потон 9
9
9-тӥ ЛЮКЕТ
1Соку Кузё-Инмар Моисейлы шуиз: «Фараон доры мын но солы тазьы шу: ”Тазьы шуэ еврейёслэн Инмарзы Кузё-Инмар: Мынэсьтым калыкме кошкыны лэзь, со, Мыным сӥзьыса, вӧсяськон ортчытыны мед быгатоз; 2[Мынэсьтым калыкме] лэземед ӧз ке поты, эшшо кутыса тон сое возид на ке, 3соку тани, Кузё-Инмарлэн киыз бусыын ветлӥсь пудоед вылэ – валъёсыд, ишакъёсыд, верблюдъёсыд, ошъёсыд, скалъёсыд, ыжъёсыд вылэ – вуоз: туж секыт сьӧдчер погыртыны кутскоз; 4[Со виын] Кузё-Инмар израиль калыклэсь пудозэ египет калыклэн пудоезлэсь висъялоз; израиль калыклэн вань [пудоез] пӧлысь одӥгез но уз кулы”». 5Луоно дырез пусйыса, Кузё-Инмар шуиз: «Та ужез Кузё-Инмар ӵуказе та музъемын лэсьтоз». 6Кузё-Инмар та ужез ӵуказеяз лэсьтӥз, соку египет калыклэн вань пудоез кулӥз; нош израиль пиослэн одӥг пудозы но ӧз кулы. 7Фараон тодыны ыстӥз, но тани, израиль калыклэн [вань] пудоез пӧлысь одӥгез но кулымтэ. Фараонлэн сюлмыз лекомиз, израиль калыкез кошкыны ӧз лэзьы.
8Соку Кузё-Инмар Моисейлы но Ааронлы шуиз: «Гурысь быдэс кырым пень басьтыса, фараонлэн азяз, [солэн ляльчиосызлэн азязы] Моисей пенез ин пала мед пазьгоз; 9соку быдэс Египет музъемын тузон ӝутӥськоз но адямиослэн но, пудоослэн но мугор вылазы урӟектэм пыктосъёс кылдозы, тазьы луоз быдэс Египет музъемын». 10Соос гурысь пень басьтӥзы но фараонлэн азяз султӥзы. Моисей пеньзэ ин пала пазьгиз но адямиос вылын, пудоос вылын урӟектэм пыктосъёс потылӥзы. 11Пыктосъёс потылэмен сэрен туноос Моисей азьын сылыны ӧз ни чидалэ, уго туноослэн но вань египет калыклэн мугор вылазы пыктосъёс потӥзы. 12Нош Кузё-Инмар фараонлэсь сюлэмзэ лекомытӥз, Моисеен Ааронлэсь верамзэс санэ ӧз поны, кызьы азьвыл ик Моисейлы вераз вал Кузё-Инмар.
13Соку Кузё-Инмар Моисейлы шуиз: «Ӵуказе ӵукна вазь ик султы но фараон доры лыктыса шу: ”Тазьы шуэ еврейёслэн Инмарзы Кузё-Инмар: Мынэсьтым калыкме кошкыны лэзь, со, Мыным сӥзьыса, вӧсяськон ортчытыны мед быгатоз; 14уго та радаз вань вӧсь каронъёсме тынад сюлмад, ляльчиосыд вылэ, калыкед вылэ лэзё, тон мед тодод: Мыным укшасез быдэс дунне вылын ӧвӧл; 15Аслэсьтым киме ӝутӥ бере, тонэ но, тынэсьтыд калыктэ но сьӧдчерен погыртыны быгатысал, соку музъем вылысь тон быдтэмын луысалыд: 16Аслэсьтым кужымме тон вылын возьматон понна, Мынэсьтым нимме быдэс дунне выл мед тодоз шуыса, со понна Мон тонэ улэп кельтӥ; 17тон ке нош Мынам калыкелы пумитъяськиськод на, сое кошкыны лэзьытэк улӥськод на, – 18тани, Мон ӵуказе, та дыре ик, туж кужмо йӧзор лэзё, таӵеез Египетын солэн кылдэм нуналысеныз туннэ нуналозь ӧй на вал; 19озьыен, мын, пудо уллёостэ, ваньзэ, маид бусыын вань, липет улэ люканы ысты; бусые кылем вань адямиос, пудоос вылэ, коркаос пушкы ӧз ке пыре, вылазы йӧзор усёз но, соос кулозы”». 20Кузё-Инмарлэн верам кылызлэсь кышкась фараонлэн ляльчиосыз дыртыса ляльчиоссэс, пудооссэс липетъёс улэ люказы; 21нош кинъёс Кузё-Инмарлэсь верам кылъёссэ санэ ӧз понэ, соос ляльчиоссэс, пудозэс бусые кельтӥзы. 22Соку Кузё-Инмар Моисейлы шуиз: «Кидэ ин пала ӝут, соку быдэс Египет музъем вылэ, адямиос, пудоос вылэ, Египет музъемысь вань турын-куар вылэ йӧзор усёз». 23Моисей бодызэ ин пала ӝутӥз но, соку Кузё-Инмар гудыръятыны, йӧзор кисьтыны кутскиз, музъем вылын чилекъяз-ворекъяз; [быдэс] Египет музъем вылэ Кузё-Инмар йӧзор кисьтӥз; 24йӧзор кисьтӥськиз, чилекъяз-ворекъяз, Египет музъемын калык улыны кутскем дырысен таӵе кужмоез йӧзор усён ӧй на вал. 25Быдэс Египет музъемысь бусыосын мар вал – адямиосты но, пудоосты но – ваньзэ йӧзор погыртӥз, бусыысь вань турын-куарез но йӧзор шуккиз, бусыысь вань писпуосты но [йӧзор] тӥяз; 26израиль пиослэн улоно Гесем музъемазы гинэ йӧзор ӧз усьы. 27Соку фараон Моисеен Ааронэз ӧтьытӥз но соослы шуиз: «Та радаз мон сьӧлыкай; Кузё-Инмар шонер лэсьтӥсь, нош мон но, мынам калыке но – янгышоесь. 28[Мон понна] Кузё-Инмар азьын вӧсяське: Инмарлэн гудыриосыз мед дугдозы, йӧзор медаз ни усьы, [медаз чилекъя-ворекъя ни,] соку мон тӥледыз кошкыны лэзё, кутыса уг ни возьы». 29Моисей солы шуиз: «Городысь потыса, киосме Кузё-Инмар пала [ин пала] ӝутӥ ке, гудыръямысь дугдоз, йӧзор уз ни усьылы, тон мед тодод, музъем Кузё-Инмар киын шуыса. 30Но мон тодӥсько: тон но, ляльчиосыд но Инмарлэсь Кузё-Инмарлэсь уд на кышкатске». 31Етӥн но йыды йӧэн шуккемын, уго йыды шепаське вал ини, нош етӥн сяськаяське вал ини; 32нош чабеен вазез йӧзор ӧз шуккы, уго соос бер вуись юос. 33Моисей городысь фараон дорысь потӥз но киоссэ Кузё-Инмар пала ӝутӥз, соку гудыръямысь, йӧзор кисьтӥськемысь, музъем вылэ зор виямысь дугдӥзы. 34Фараон адӟиз, зоремысь, гудыръямысь, йӧзор усьылэмысь дугдӥз шуыса, нош ик сьӧлыканы кутскиз, ачиз но, ляльчиосыз но сюлэмзэс лекомытӥзы. 35Фараон но, [ляльчиосыз но] вогъяськыны кутскизы, фараон нош ик израиль пиосты кошкыны ӧз лэзьы, кызьы Моисей пыр Кузё-Инмар вераз вал.
Currently Selected:
Потон 9: УДМБИБ
Highlight
Share
Copy
Want to have your highlights saved across all your devices? Sign up or sign in
(c) Библияез берыктонъя Институт, Хельсинки, 2013; 2016