MÁI 13
13
Jísu i yɛpɛní kɔwɔ́ato Hɛ́ɛ́ma Yála Pɛlɛí wólondai wa
(Máfiyu 24:1-2; Lúu 21:5-6)
1Ná Jísuni ngaa polú yélaitii ti ɣɛ́i taa gúla Hɛ́ɛ́ma Yála Pɛ́lɛi góvii h̃uu wá, polú w̃ɔ́i ta yiláá i tolíni, i ɣɛ ma, “Kaamɔ́ɔ́, wɔlɛ lɛ́ɛ́ kɔtu vandá wála walaí sítiini mba ti Hɛ́ɛ́ma Yála Pɛ́lɛ vandaí sí lóngɔ la!”
2Kɛ Jísu i ɣɛa ma, “Yá lɔ́ɔ pɛlɛ́ wála walaí sítii tɔ? Kpɛ́lɛɛ tɔ́ɔ vá wolóma ngáá kɔtu yílaa kéle tɔ ɛi lo lááni ngi mbála w̃aah̃u. Kpɛ́lɛɛ aa woló, í vú.”
Faa bɔ́lundai ɛ́ɣɛ faa bámai
(Máfiyu 24:3-14; Lúu 21:7-19)
3Ná Jísu í ɣɛ́i héini ngihéi sí wa taá tóli ngáá Ɔ́levi Wuluí Yíhei, Hɛ́ɛ́ma Yála Pɛ́lɛi yatéve sú, Pítɛ ɛ́ɣɛ Jimisíni ngaa Njɔú ɛ́ɣɛ Ándulu tiyá léé léé tí mɔɔniní, 4ti ɣɛ́ ma, “Nde lɛ́ɛ́ ni w̃a, bele hɔwɔ́ lɔ́ faí sítiini táá vá ɣɛ́ma yí yɛ́pɛngɔ kɔwɔ́ato ti wa? Ná vólu, bɛɛ́ vá tɔ áá ngákɛ kpál̃au ngáá kɛ faí sítiini tiyá tɔɔ vá ɣɛ́ma?”
5Kɛ Jísu i ɣɛa ti w̃a, “A w̃aah̃ú béle nuu fíli álaa wú yákpolowa. 6Nuu bíh̃iw̃aa lɔɔ vá vaamá tíwaa ndááheingi vɛ́lɛ wa, tí yíla ngíla fíli taa ɣɛ́ taa ɣɛ ta, ‘Nyá lɔ́ ngí ngáá Ngalángi Lókolo Mbá W̃ɔ́i.’ Aáva taá nuu bíh̃iw̃aa yakpólowa. 7Ná wáá mɛ́ni ngáá kɔɔni tí gúlaa ɔɔ wú tɛingáá w̃áá woo ỹɛ́ni ỹanda vékaitii, wú líí álaa gúla wú wa, bɔw̃álale kɛ tí ɣɛ, kɛ́ ngetéyangi yakɛɛlɛmái ɛi ɣɛ ngáá ná. 8Híítii taa ɣɛ táa lápi ngáá ỹɔw̃ɔ́ ỹɔ́w̃ɔ. Ndɔwɔlɔ́ wú ngiláángi aa ɣɛ áá lápi ngáá ndɔwɔlɔ́ vékai. Ndɔwɔlɔ́i aa ɣɛ áá bɛ́li, íwaa vú su ỹandá kpɛ́lɛɛ kpɛ́lɛɛ. Ná vólu, ndɔlɛ walá áa gúla. Aáva nátii kpɛ́lɛɛ ti gúlangɔɔ lé nɔ́ɔ́ ngáá hésendaa gooh̃ubaalɛí ɣɛ́ kíli ndoú léndai h̃u.”
9Jísu í mɔ́ɔ́ ɣɛ ti w̃a, “Kɛ́ wú gísei w̃a. Tiyá lɔɔ ɣɛ́ taa wú hóu, tíwaa lí ngáá wú ye kóótii h̃u, aáva tíwaa wú léve Ngala fɛ́li máákpɔ wotaítii mbu. Tiyá lɔɔ ɣɛ́ taa lí ngáá wú ye masa kúlo gúloaitii ngelé ɛ́ɣɛ masa ngwála wálaitii. Sí kpɛ́lɛɛ pá aa ɣɛ sífaa wú ngáá pólu yélaa. Sí va aa kɛ ngáá háwu sí wú kɔ́lɔ kɔwɔ́ato mbá wú súuɣɛ. 10Aáva kɛ Ngalángi gééla woo vandaí í lé nuu kpɛ́lɛɛ kpɛ́lɛɛ má ngetéyangi yákɛɛlɛmai ɔ́ɔ́ ɣɛ́a foló ma. 11Táingi fíli má taa wú hóu tí lí ngáá wú ye kóóti h̃u, a waá liihɛ́lɛ ngáá sí wáá vá ndéma kóótii h̃u. Kɛ́ ná maa táingi áá fólo ma, sí fíli Ngalá ngáá nde wú w̃a, ná lɔ wáá nde, bɔw̃álale ɛi ɣɛ ngáa wá wɔ́ɔ́ ɣɛ́ wáá njɛpɛí vu, kɛ́ Hɛ́ɛ́ma Ỹínangi lɔ́ áá kɛ ngáá háwu wáá ɣɛ́ wáá yɛ́pɛ. 12Táingi ná h̃uu vá, nungáá taá ɣɛ́ taá ti ndéɣea ɔɔ ti ndíyangaa lokolevé ngáá nungáá tí tí váa. Ngimɔ́ɔ́ nɔ́ɔ ndoú kɛ́ɛ́ɣɛaitii bɛ́lɛ taa ɣɛ́ taá kɛ ngáá tí léngaitii. Ndengáitii bɛ́lɛ taá vote ti le mbélaitii mba, ti kɛ ngáá háwu nungáá tí tí váa. 13Nungáá kpɛ́lɛɛ taá hilí ngáá wú ye sífaa nɔ́ɔ wú ngáá pólu yélaa, kɛ́ nuí fíli áá ló ní hái h̃u í ló su ngetéyangi yakɛɛlɛmái í fólo, Ngalá ngáá ngumááwo.”
Ŋani ỹɔ́u áá ỹánda h̃úú ỹááni pɔ́lɛɣɛ
(Máfiyu 24:15-28; Lúu 21:20-24)
14Jísu i mɔɔ ɣɛi ti w̃a, “Ná wáá ŋani lɔ nyɔúngɔ áá kɛ́ ngáá háwu kpalo í vɛ́lɛ ỹandá wa ngangí wála naa wa, maa ŋánii i lóóni ỹandái mbéi kule áá ma ɔ́ɔ́ ɣɛ́ na, nungái sítiini taa ɣɛ́ Judíya lataí h̃u, kɛ tí w̃áávela, tí li ngihéitii su.” Yɛ́i yáá mbéi gála, yí fái sí yátɔ mba.
15Jísu í mɔ́ɔ́ ɣɛ ta, “Ná nuu fíli áá ɣɛ́ ngi vɛ́lɛi gɔ́ma, álaa hítɛ ɔ́ɔ́ ɣɛ́ kɛ aa ngi wɔ́lingai ta fíli ngéɣe ngi vɛ́lɛi wu. 16Nuí sí va áá ɣɛ́ kpaala h̃u, álaa lí ngí vɛ́lɛ la ngi lóma kooh̃a yeɣé fááw̃a. 17Maa hóloitii suu ỹɔúngɔ aa ɣɛ la koo ỹah̃áitiini fááw̃a ɛ́ɣɛ koímaitiini. 18A Ngala fɛ́li ngáá faí sítiini tálaa bɛ́ saw̃a w̃a, 19sífaa maanɔw̃ɔ́ wála lɔɔ vá lamá táingi ná h̃ú. Aáva maa w̃áánɔw̃ɔi h̃uu áá ɣɛ́ wɔɔlɔ, í lɔ́ve maanɔw̃ɔ́ kpɛ́lɛɛ mbá í híyanga í séi ngetéyangi sí lɔ́kula héimai w̃a í fólo hááwɔ holoí w̃a, aáva maa w̃áánɔw̃ɔi gɛɣɛ́laa fíli ɛi mɔ́ɔ ɣɛ́ na. 20Kɛbei Ndemɔí Ngalá ngáá ɣɛi folói nátii sɔ́ingi h̃uu ɣɛ́i lúkpu, nuu fíli ɛí belé ló ndɛɛh̃ú h̃u. Kɛ́ nungái sítii faaw̃a í lókolonga ti wa ngáá ngi vóngaa, i maa hóloitii sɔ́ingi h̃uu ɣɛngɔ́ lúkpu.
21Naa h̃uu vá, ná nuu fíli áá ɣɛ́ í w̃á, ‘Wɔlɛ lɛ́ɛ, Ngalángi Lókolo Mbá W̃ɔ́i belé tɛ mbéi!’ Ɔɔ ná láá lé i ɣɛ í w̃á, ‘Aá lɔ́ múl̃ɔnda!’ Yálaa la ngáá maa hái. 22Sífaa nungáá tiyá lɔɔ vá vaamá, táá nde ngáá tiyá lɔ ti ngáá Ngalángi Lókolo Mbá W̃ɔ́i. Ti lɛ́ingaa taá nde ngáá tiyá lɔ ti ngáá Ngalá ndaa háá lé mbélaitii. Kɛ́ ta fíli ɛi ɣɛ ngáá tɔɔỹaá. Aáva taá ɣɛ́ taa káámaa haa ɣɛ ɛ́ɣɛ kindáá vilí faa kɛinɔɔ́ ná wɔlíi ɔ́ɔ́ ɣɛ ngáá solowo fáá ti yaá, ti sítii ngákpolowa Ngalá ngí lókolonga tí wa ngáá ngi vóngaa. 23Faalɔ, wú gísei w̃a, ngí fái sítii ndengá wú w̃á naa wutúwɔɔ.”
Nuu Búsa Goo H̃ú Loí váálai volú
(Máfiyu 24:29-31; Lúu 21:25-28)
24Jísu i mɔɔ ɣɛi ti w̃a, “Kɛ́ ná maanɔw̃ɔ́ hóloi nátii taa gúla su kp̃óu, foló ɛ́i mɔ́ɔ gula kɛlaa ngálu ngɔ́ɔ́ hólo. 25Temúleɣaitii ti ngélei ya táá h̃úndɛ, ngeleya kɔ́lingaitii kpɛ́lɛɛ taá ɣɛ taa lííka líika. 26Ná h̃uu vá, nungáitii taá nuí síí w̃ɔ́i lɔ taa ɣɛ́ ma Nuu Búsa Goo H̃ú Loí íwaa vá, i njɛ bilíí ya, ngakpa ngwálai i ngeyá, ná vólu, áá hólo míl̃a mil̃a. 27Ná vólu, aa ngi w̃álekaitii tɔve nungái sítii ngéle Ngalá ngí lókolonga ti wa ngáá ngi vóngaa, taá ti gúla ỹandá kpɛ́lɛɛ kpɛ́lɛɛ ngeleí sí wú, tí ti yatɛ́ mba ỹanda yílaa.”
Faa volú hái kɔwɔ́ato féki wuluí wa
(Máfiyu 24:32-35; Lúu 21:29-33)
28Kɛ Jísu i mɔɔ ɣɛa ti w̃a, “Kɛ a gisíya lɛ́ɛ́ ngáá féki wuluí kíya í na. Ná wáá ngáá, ná féki wuluí yékeitii taa nɛ́ku, wáá ɣɛ nɔ́ɔ kɔlɔ́ ngáá kɛ saw̃aí i bɛɛngá mba. 29Aáva ngimɔ́ɔ́ nɔ́ɔ jɔ́ ná wáá fái sítiini tɔ́ tíwaa ɣɛ́, wáá ɣɛ nɔ́ɔ kɔlɔ́ ngáá kɛ naa í bɛ́ɛ́nga mba, aá lɔ náa naa béla kái kái. 30Ngí tɔɔỹái le wú w̃á, sí h̃úú yéteyangi h̃úú yélai tɛí ha í lo su faí sítiini kpɛ́lɛɛ tí ɣɛ. 31Ngeleíni ngaa ndɔwɔlɔ́i taa vááma ɣɛ́ma na kúnafɔ, kɛ́ ndáá wói lɔ ɣɛ́ na kúnafɔ.”
Nuu fíli aa Nuu Búsa Goo H̃ú Loí vaa l̃áingi wɔ́lɔ
(Máfiyu 24:36-44)
32Jísu í mɔ́ɔ́ ɣɛ ta, “Nuu fíli aa kɔlɔ́ bele hɔwɔ́ lɔ táingi ná áá va, folói ɣéle tɔ kɛlaa táingi í maa hóloi ná h̃u nuu áá kɔ́lɔ. Malékaitii kéle tɔ tí ngelegóóh̃u taá kɔ́lɔ kɛlaa maa Ngalángi H̃íỹɛndou Loí. Kɛ́ kɛ nɔ́ɔ léi Kɛɛɣɛí Ngalá í kɔ́lɔ. 33Faalɔ, a giséi w̃a, wú w̃aah̃ú béle, sífaa wáá kɔ́lɔ mbéi hɔ́wɔi maa táingi áá foló ma. 34Maa hái ɣɛ kíli lɔɔ vá gulamá ngáá siỹɛndópoi í ɣɛ́i áá lí siya má, i ngi vɛ́lɛi lóni ngi yénge mbélai toko h̃u. Í ngengengí he ti yaá léélaa léélaa. Í nde pɛlɛ́ láá w̃ɔ́i w̃a ngáá í pɛ́lɛi laa w̃ááh̃u béle. 35Faalɔ, wá bɛ́lɛ kɛ wáá w̃aah̃ú béle, bɔw̃álale nyɛ́i ngí ngáá pɛlɛ́ w̃ɔ́i, wáá kɔlɔ́ mbéi hɔ́wɔi ngíwaa yángaima. Baa aa ɣɛ ngáá kpindí, ɔɔ kuyá liiwáá, baa ná maifɔ́lɔ tɛ́ɛ́hinai áá bɔ́ɔ́lɔ, baa aa ɣɛa ngelesú bíndi, wáá kɔlɔ́. 36Ná ngáá gɔ́ɔ́la wú wá, ngálaa wú w̃áále nyii h̃u. 37Sí ngáá nde wú w̃á, nyá lɔ́ɔ́ ndé nuu kpɛ́lɛɛ fááw̃a, faalɔ, ngí ndé wú w̃á, ‘A w̃ááh̃u béle!’ ”
Currently Selected:
MÁI 13: KNNT
Highlight
Share
Copy
Want to have your highlights saved across all your devices? Sign up or sign in
Bandi New Testament © Bible Society in Liberia, 2000