Matyu 2
2
Hoɗoppai magau danab ag Jesus anidkkulagnu uɗippig
1Maria nug Juda wanppa, Betlehem appa, Herot okkai king dayeye, Jesus menue, hoɗoppai magau danab ag aam bedeppanu ahan uɗin, Jerusalem bena oɗ meppig; 2“Nid nakok laa doum, Nug Juda dilag king amu, Nug adeppa daatte? Ig nuhig hoɗoppai aam bedeppa anidta, Nug noobppa dup nota binag mekkunignu uɗimut,” aon appig.
3Aon aeg amu, King Herot nug nai amu doya ottaie, Jerusalem danab ah oh ele ottaippig. 4Ottaieg amu, Herot nug ɗo mehuqak danab, mana mettak danab okkai ele, nug amu oh qagmaatta, ag oɗ matta aum. “Kristus Nug aab attenppa bekku?” awa aum. 5-6Awa a amu ag appig. “Kayaknu propet nug amunu nai inam yom. ‘O Betlehem, na Juda wanppan aab laa. Na Juda wanppan aab laa daattem, amu na ele Juda wanppan aab laala onilag ele, na aab amu oolagppa daan, hamu bia ii daattem. Iitta. Na ag oolagppa onin ele daattem. Aɗinu? Nahip-ppa geha danab okkai bekku, amu Nug Israel danab ah dahilad gumadkku.’ Propet nug anam yom amunu, ig doottem, Kristus Nug Betlehem, Juda wanppa bekku,” aon appig.
7Ag anam aeg amu Herot nug nai amu doya, nug lokkumakppa aam bedeppanu hoɗoppai magau danab, ag oɗelagppa hoɗoppai amu haen ganebnab ba dayom, am nug ag amunu oɗ matte, mattieg doyom. 8Doya amu nug ag Betlehem gokkulagnu a, ag gokkulagnu heegeg, nug ag amelagppa aum. “Ag gona, nid nakok amu pehettan mattin anidna, ag eɗun uɗin appeg, da ele ukken, Nug noobppa dup noin binag mekkul,” awa aum.
9Awa a amu, ag Herotnu nai doyona, ag ahan gonana, ag hoɗoppai, aam bedeppa anidppig, hoɗoppai amu anuqa ukka, lag nid nakok dayomppa boppala dayeye anidppig. 10Haen ag hoɗoppai anidna amu, ag maɗoɗppan gamag ahak okkai doon, 11ag lag ooppa nona, nid nakok, amu Nug anig Maria ele anatppig. Anatna, ag nid nakok noobppa dup nona binag meppig. Binag mewona, ag ahilag battam hipana, gol, prankinsens, mir ele, ag amu nuhig daakkunu Nug medappig. 12Mettona, ag niiegeg, tuqan tulppa Kayak ag eɗun Herot toppa ii gomananu aum amunu, ag eɗun, ib laa aon, ag appalagppa goppig.
Josep nug wau, nid ele diiate, Isip goppig
13Ag ukkaeg, Naɗinu engel tulppa Josep amegppa aum. “Na ahan, nid nakok anig ele diiatna, oolna Isip wanppa gona, appa daappe, da na eɗun uɗikkutnu appi doona uɗikkut. Aɗinu? Haen nakokib ukkeb, Herot nug nid nakok mattia antta qekkunu hekku,” awa aum. 14Awa a amu, Josep nug tuqan amuppa aha, nid nakok, anig ele diiate, Isip gokkulagnu goppig. 15Gona, Isip appa daaegeg, Herot mauhom. Isip ukkaknu amu, amuam propet laa nug Naɗi oɗe awa, nai mattiom, nai amu elele medakkunu beum. Propet nug inam aum. “Nid danab dahil Nug Isip dayeye, da nug Isip uua dokkunu onigppa emi,” awa aum.
Herot nid naunau aqe mauhppig
16Anam aakku, amge Herot nug ii mauhom haenppa, magau danab ag eɗun goppig, haen amuppa nug ag buppuidna autna aoppig doyom amunu, nug oppoɗi huanak be ameg kokoɗ eppe, nuhikkud daup ag gona, Betlehemnu nid naunau, Betlehem talilittak eleppanu nid naunau oh ele, ahilag maɗ aɗit, laa ag maɗ aɗit ii aoppig ele, magau danab ag hoɗoppai digmena anitteg, Herot amegppa aeg doyom bia amu, daup ag amu oh aqaglagnu haknunab a, ⌊ag gona human aqappig⌋. 17Aqappig amunu, amuppa propet Jeremaia nug Naɗi oɗe awa, nai mattiom, nai amu elele mettom. Nug inam aum.
18“Laa Rama appa gayeye dootteb.
Ge, appa laa nug gayaya, eheɗ mahitte.
Amuam Rahel, nug nid nuhikkud oh iitta meppig amunu, nug nid dilagnu gayaya, mahiadtte. Nug mahiatta gayeye, laa heeb, oo mekkunu uua daatte,” awa aum.
Josep wau ele, nid nakok ele, ag eɗun, Nasaret uɗippig
19Aria, Josep aɗi ag Isip gona daaegeg, Herot nug mauhe, Naɗinu engel tulppa Josep gumitta doum. 20Nug doa, Josep amegppa aum. “Danab ag nid nakok qekkulagnu heppig ele aakku mauhppig amunu, na ahan, na waat, nid nakok ele diiatna, eɗun Israel ukke!” awa aum. 21Nug anam a amu Josep nug aha, nid nakok, anig ele diiate, eɗun Israel goppig. 22Goppig amge Josep nug Herot bekka Akelaus, nug mameg abenab awa, Juda dilag king dayeye doya, nug appa ukkaknu oo baɗom. Oo baɗeɗe, tuqan tulppa Kayak Nug Josep, Juda wanppa gokkunu, “Aib,” aum amunu, nug aha, wan atu onig Galili ukkom. 23Nug ukka, aab laa Nasaret appa ta dayom. Amuppa propet ag nai madippig amu, nai amu elele mettom. Nai amuam inam. “Ag nuhignu, Nug am Nasaret danab,” akkulag.
Attualmente Selezionati:
Matyu 2: NB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2022, Wycliffe Bible Translators, Inc. All rights reserved.