Marakiyaxi 3
3
1Yawé Naimekɨmɨtɨrɨkaɨye mɨpaɨ kaniutayɨni: «Ne neniuki tuayame nekananunɨ'amɨkɨ huye mukuha'aritɨanikɨ nehetsiemieme. Yapauka ti'aitame yutukitsie kaninuamɨkɨ kemɨ'ane xeme xemɨkuwautɨwe, tɨratu niuki tuayameya kaninuamɨkɨ, kemɨ'ane xeme waɨkawa xemeuyehɨwa».
2Peru ¿kemɨ'ane pinewieni mɨkɨ tukari munuanitsie? ¿Kemɨ'ane hɨxiena mɨtakeni pɨyɨweni kepauka mɨkɨ mɨyuhekɨatatsie? Tai kemɨtitikwaxiya kemɨtiti'itiwa hepaɨ kani'anemɨkɨ, meta xapuni kemɨtitituriya hepaɨ. 3'Apayerɨni pɨrata mɨtikwaxiya meta mi'itieni hepaɨ, rewitsixi kaniwa'itimɨkɨ, huru meta pɨrata kemɨtiti'itiwa taikɨ mɨpaɨ pɨtiwa'itieni. Hikɨ 'ana Yawé mawari mekani'atɨiriekuni kemɨtiheitserie, 4metatsiere Kura meta Kerutsareme wamawari Yawé kaninaki'eriekamɨkɨ, meripaitɨ hepaɨ.
5«Hikɨ ne nekaninuamɨkɨ nexetaxanetake. Ne nemunierixɨ nepaneyeitɨani memɨteyukewaiya wahetsiemieme, memɨwakumaɨwa kayu'ɨitama kayukɨnama, meta memɨte'itawa, teyu'uximayatsiriwamete memɨwakwamana, wiuraxi meta nutuite memɨwananaima, meta 'ateewa kiekatari heitserie memexeiyani memɨkawapitɨa, ne 'etsiwatɨma mekanetsi'ayemakatɨ —Yawé Naimekɨmɨtɨrɨkaɨye mɨpaɨ kanaineni—.
Mawari 'aixɨa mɨ'ane
6»Ne Yawé, nepɨkanepata. 'Ayumieme xeme Kakuwu nuiwarimama, xepɨkaheuyehɨiyawawe. 7Meripaitɨ xe'ukiyarima memu'uwakaitsie paitɨtɨ ne'aitsikate xepuku'eiri meta xepɨka'eye'atɨawawe. 'Ayumieme hikɨ nehetsɨa xekenanuaxɨa, neta xehetsɨa nekaninuamɨkɨ —Yawé Naimekɨmɨtɨrɨkaɨye mɨpaɨ kanaineni—.
»Peru xeme mɨpaɨ xeputiyuane: “¿Kehapaɨtɨtɨri titayari tetehanuaxɨani 'ahetsɨa?”
8»¿Kamɨtsɨ tiyɨwe tewi Kakaɨyari mɨtiunawatsirieni? Xeme xekaneteninawatsirietɨweni.
»'Akuxita mɨpaɨ xete'u'iwawa: “¿Titakuta tematenawatsirietɨwe?”
»Tamɨ tamamatatsie mieme xeime meta 'imikieri xeneteyetuiriwatɨ xepɨte'uhayewaxɨ. 9Xeme —yunaitɨ 'ixaheritsixi— waɨkawamekɨ 'axaxekani'itɨariekakuni, netsɨ xekaneteninawatsirieka.
10»Xekene'atɨa 'aixɨa 'anemekɨ tamamatatsie mieme xeime tukita muyuhayewanikɨ, mɨpaɨ 'ikwai kanixuawekamɨkɨ netukita. Mɨkɨkɨ xekeneneuta'inɨata —mɨpaɨ kanaineni Yawé Naimekɨmɨtɨrɨkaɨye—, xekaninenierikuni muyuawitsie wiyeri nekaneuyepimɨkɨ meta 'aixɨa nekanixeyurimɨkɨ waɨkawa yemekɨ 'anutiyakamekɨ. 11'Utsikari nekaniwakwimɨkɨ, xe'etsari memɨkakɨmenikɨ meta kaxie haraweriyari 'aixɨa 'anemekɨ mukaxuxuawerenikɨ —Yawé Naimekɨmɨtɨrɨkaɨye mɨpaɨ kanaineni—. 12Hikɨ yunaitɨ nuiwarite 'aixɨa xemɨ'itɨarie xeme mekatenixe'uterɨwakuni, xeme yukwieyari witsi'aneme xemexeiyanikɨ —Yawé Naimekɨmɨtɨrɨkaɨye mɨpaɨ kanaineni—.
Kura kiekatari ke'axamemutiyuanekai
13»Xeme 'axaxekaniutiyuaneni nehepaɨtsita —Yawé kanaineni—.
»'Akuxita mɨpaɨ xete'u'iwawa: “¿Kehepaɨ kuta 'axateputiyua 'ahepaɨtsita?”
14»Xeme mɨpaɨ xekaniutiyuani: “Kakaɨyari xɨka 'ayexeiyani yakɨ xeikɨa pɨtiyu'uxitɨaka. ¿Tita teteha'iwa xɨka 'aitsikateyatsie yatetekahuni meta Yawé Naimekɨmɨtɨrɨkaɨye hɨxie te'u'uwani hiwerika kamixayari te'anakatɨtɨkaitɨ? 15Hikɨri 'aixɨa memɨ'itɨarie tepɨtewaruterɨwani mariweme memayuyeitɨwa, 'axateyuruwamete xikutsixi mepakɨka meta Kakaɨyari memɨ'iwatɨwe mɨtiwakwinitɨanikɨ ni'atsimepɨkate'anuyekɨka”».
16Hikɨ kemɨ'ane Yawé memayemakaxekai mekateniutixata, mɨkɨta kaniwaru'enieni kememɨte'uxa. Hikɨ hɨxiena xapatsie mekanayuka'utɨani kemɨ'ane Yawé memayemakaxe meta memeyexeiya. 17«Tukari nepexeiyari kepauka mɨkɨ neteɨterima memakɨne yemekɨ —Yawé Naimekɨmɨtɨrɨkaɨye mɨpaɨ kanaineni—. Mɨkɨ nepɨwatinenimayata, tewi yuniwe kemɨtinenimaya ti'uximayatsiriekaku hepaɨ. 18Xeme 'ana xetemaitɨ xepakɨne keyɨkɨmɨ'ane 'aixɨa memɨteyurie wahetsiemieme meta 'axamemɨteyurie, Kakaɨyari memayexeiya wahetsiemieme meta memɨka'eyexeiya.
Attualmente Selezionati:
Marakiyaxi 3: hch
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2020, Wycliffe Bible Translators, Inc.