उत्पत्ती 2
2
ङोंइती ङा नाइक्तीक नाक्त
1मिनु मोपा परमप्रभुमी सरीङ, रागी नु मार मार बाक्मा, मेको नेल्ल सेल्ने थुमा बाक्त। 2मिनु ६ नाक्तीम आ गेय नेल्ल थुम्शा ङा मिन ७ नाक्तीम नांइसे बाक्त। हिब्रू ४:४ 3मिनु परमप्रभुमी नाइक्तीक नाक्त कली आसीक गेवा बाक्त। मिनु मेको नाक्त आंम कली नाइक्चा, दे वोदा बाक्त। मारदे हना मेको नेल्ल सेल्तीक गेय थुम्शा नांइसे बाक्त। प्रस्थान २०:११; भजन संग्रह ९५:११; इजीकीएल २०:१२; हिब्रू ४:९-१९
परमप्रभुमी मुर सेल्शो
4एको परमप्रभुमी सरीङ नु रागी सेल्ची ना ङा लोव़ बाक्ब। परमप्रभु यावेमी रागी नु सरीङ सेलानु, 5मारेइ मारेइ घांस खपीम मवाशो बाक्मा बाक्त। कोव़केली यो मदाप्शो बाक्मा बाक्त। मारदे हना परमप्रभु यावेमी रागीम रेउ मयिपाइश्शो बाक्माक्त। मिनु रूम गेय पाइब मुर यो मबाक्मा बाक्त। 6मेना रागी रे खोला ग्रूशा, रागी नेल्ल ङा खप जिप्पाइक्बाक्माक्त। 7मिनु नोले परमप्रभु यावेमी रू ङा खप के मुर का सेला बाक्त। मिनु मुर आ नेंमी ब्रोंइतीक सोक्त मुइक्ता बाक्त। मिनु मुर सोक्त पाइश्शो दुम्माक्त। उत्पत्ती ३:१९; अय्युब १०:९; अय्युब ३३:४; भजन संग्रह १०४:२९-३०; १कोरिन्थी १५:४५,४७
परमप्रभुमी आ रू सेल्शो
8मिनु नोले परमप्रभु यावेमी पूर्बम एदेन माइश्शो रू का सेला बाक्त। मेकेर आ सेल्शो मुर कली वोदा बाक्त। 9मिनु परमप्रभु यावेमी मेकेर मार मार दारशो तांइसीब रवा नु जचा ब्वचा फल सिप्ब रवा वापदा बाक्त। ब्रोंइपाइक्ब का नु रिम्शो नु मरिम्शो तुइक्पाइक्ब रवा का यो रू आ दातेमी वापदा बाक्त। उत्पत्ती ३:२२; प्रकाश २:७; प्रकाश २२:२
10मिनु रू कली जिप्पाइक्चा, दे एदेन रे खोला का ग्रूमाक्त। मेको खोला नोले ब्राशा, ४ ओटा खोला दुम्शो बाक्मा बाक्त। इजीकीएल ४७:१-१२ 11ङोंइती ङा खोला आ नें पीशोन बाक्ब। मेको खोला हवीलाह रागी आ एर ओंथ रे लशो बाक्ब। मेको रागीमी सुन बाक्बाक्माक्त। 12मेको रागी ङा सुन रिम्शो बाक्बाक्माक्त। मेकेर गोकुल धूप नु ओनीक्स माइश्शो हीरा यो बाक्बाक्माक्त। 13मेको आ नोले ङा खोला आ नें गिहोन बाक्ब। मेको कूश माइश्शो रागी आ एर ओंथ हिरशो बाक्ब। 14मिनु मेको आ नोले ङा खोला आ नें टाइग्रीस बाक्ब। मेको खोला अस्सुर रागी आ पूर्ब गे लशो बाक्ब। मिनु नेल्ल क्येङा नोले ङा खोला आ नें युफ्रेटीस बाक्ब।
15मिनु परमप्रभु यावेमी मुर कली लाइश्शा, एदेन रू दोचा नु कोव़चा कली वोदा बाक्त। 16मिनु परमप्रभु यावेमी मेको मुर कली “नेल्ल रवा ङा फल जने ब्वने चाप्नेवे। 17तन्न रिम्शो नु मरिम्शो तुइक्पाइक्ब रवा रे ब्वचा मदुम्ब। तेको नाक्त ब्वाइनेवे, मेको नाक्तीन बेक्नेवे” दे अरेवा बाक्त। रोमी ६:२३
मुर आ गेय
18मिनु परमप्रभु यावेमी “मुर का ला बाक्चा मरिम्शो दुम्ब। गो मेको नु बाक्चा कली वारच पाइब का सेल्नुङ” देंमाक्त। उपदेसक ४:३०
19मिनु परमप्रभु यावेमी आ खप के सेल्शो मार मार जन्तु नु सरीङम बेरब चिक्ब आन कली मुरुम मार मार नें वोइक्बाक्मे, दे मुर आ बाक्तीके चाक्मी बाक्त। मिनु मुरुमी ब्रोंइशा बाक्ब नेल्ल आन कली नें वोदा बाक्त। मार नें वोदा, मेको नें लीमा बाक्त। 20मुरुमी बी ब्यफ, सरीङम बेरब चिक्ब नु ब्वाकी ङा जन्तु नेल्ल आन कली नें वोदा बाक्त। तन्न मुर कली मेको नु बाक्चा कली वारच पाइब मबाक्शो बाक्माक्त।
परमप्रभुमी मुर आ वारच सेल्शो
21मिनु परमप्रभु यावेमी आदम कली मारेइ मतुइक्चा ङा पा निन्द्रा पपदा बाक्त। मिनु मेको के जेरी का शोला बाक्त। मिनु मेको पोव़ला कली श्येमी सुवा बाक्त। 22मिनु परमप्रभु यावेमी मेको शोल्शो जेरी के मीश मुर का सेल्शा, मुर आ बाक्तीकेमी चाक्गा बाक्त। 23मिनु आदममी “ओहो, एको रुश, आं रां ङा रुश बाक्त। एको श्ये आं रां ङा श्ये बाक्त” दे तुइक्ता बाक्त। मिनु मेकोमी “मेको आ नें मीश मुर वोइक्चा माल्ब। मारदे हना वोंइश मुर आ रां रे शोल्शो बाक्ब” देंमाक्त।
24मोपतीके वोंइश मुरुमी आ आंम आफ आस कली प्रोंइशा, आ मीश नु काथा बाक्ब। मेको निक्शी रां का दुम्नीस। मत्ती १९:५-६; १कोरिन्थी ६:१६; एफिसी ५:३१ 25मेना आदम नु आ मीश निम्फा शिश्रा बाक्सा बाक्त। मुने चहिं मतुइक्बाक्सा बाक्त।
Attualmente Selezionati:
उत्पत्ती 2: susz
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2011, Wycliffe Bible Translators, Inc. All rights reserved.