Fa‘aaliga 7
7
‘Ua Fa‘ailogaina ‘Au‘auna a le Atua
1‘Ua mavae atu ia mea, ‘ona a‘u iloa ai lea o agelu e to‘afa o tutū mai i itū e fa o le lalolagi, o tāofi i matagi e fa o le lalolagi, ‘ina ‘ia lē agi atu le matagi i le fanua, po o le sami, po o se la‘au e tasi.#Iere 49.36; Tani 7.2; Saka 6.5 2‘Ua a‘u iloa fo‘i le tasi agelu ‘ua ui a‘e i le mea e alu a‘e ai le lā, ‘ua ‘iā te ia le fa‘amaufa‘ailoga a le Atua soifua; ‘ua ‘alaga ia ma le leo tele i agelu e to‘afa na tu‘uina atu ‘iā i latou ‘ia fa‘aleaga i le fanua ma le sami. 3‘Ua fa‘apea atu, “‘Aua tou te fa‘aleaga i le fanua, po o le sami, po o la‘au, se‘ia matou fa‘amaufa‘ailogaina ‘au‘auna a lo tatou Atua i o latou muaulu.”#Eseki 9.4, 6 4Na ‘ou fa‘alogo fo‘i i le faitau aofa‘i o ē na fa‘amaufa‘ailogaina; o selau afe ma afe e fagafulu ma afe e fa o ē ‘ua fa‘amaufa‘ailogaina i itū‘āiga uma o le fānauga a Isaraelu. 5E sefulu afe ma afe e lua o ē ‘ua fa‘amaufa‘ailogaina i le itū‘āiga o Iuta, e sefulu afe ma afe e lua mai le itū‘āiga o Reupena; e sefulu afe ma afe e lua mai le itū‘āiga o Kato. 6E sefulu afe ma afe e lua mai le itū‘āiga o Asera; e sefulu afe ma afe e lua mai le itū‘āiga o Nafatali; e sefulu afe ma afe e lua mai le itū‘āiga o Manase. 7E sefulu afe ma afe e lua mai le itū‘āiga o Simeona; e sefulu afe ma afe e lua mai le itū‘āiga o Levi; e sefulu afe ma afe e lua mai le itū‘āiga o Isakara. 8E sefulu afe ma afe e lua mai le itū‘āiga o Sepulona; e sefulu afe ma afe e lua mai le itū‘āiga o Iosefa; e sefulu afe ma afe e lua o ē ‘ua fa‘amaufa‘ailogaina i le itū‘āiga o Peniamina.
O le Motu o Tagata e To‘atele e lē ma Faitaulia
9‘Ua mavae atu ia mea, ‘ona ‘ou iloa lea, fa‘auta fo‘i i le motu o tagata e to‘atele mai atu nu‘u uma, ma ‘āiga, ma nu‘u, ma gagana ‘ese‘ese, e lē ma faitaulia e se tasi, o lo‘o tutū i latou i luma o le nofoāli‘i ma luma o le Tama‘i Mamoe, ‘ua ‘o‘ofu i latou i ‘ofu sisina, ‘ua i ai fo‘i lau pama i o latou lima. 10‘Ua latou ‘alalaga fo‘i ma leo tetele, ‘ua fa‘apea atu, “O i ai le fa‘aolataga i lo tatou Atua o lē ti‘eti‘e i le nofoāli‘i, ‘atoa ma le Tama‘i Mamoe.” 11‘Ua tutū fa‘ata‘ali‘oli‘o agelu uma i le nofoāli‘i ma le ‘au toeaina ma mea ola e fa, ‘ua latou fa‘apa‘ū faō i luma o le nofoāli‘i, ma ifo atu i le Atua. 12‘Ua fa‘apea atu, “Amene; ‘Ia i lo tatou Atua le fa‘amanū, ma le vi‘iga, ma le poto, ma le fa‘afetai, ma le mamalu, ma le mana, ma le malosi e fa‘avavau fa‘avavau lava. Amene.”
13‘Ona fai mai ai lea o le tasi o le ‘au toeaina, ‘ua fa‘apea mai ‘iā te a‘u, “O i latou ia ē ‘ua ‘o‘ofu i ‘ofu sisina, o ai ‘ea i latou, po o fea fo‘i na latou ō mai ai?”
14‘Ona ‘ou fa‘apea atu ai loa ‘iā te ia, “Le Ali‘i e, ‘ua e silafia.”
‘Ona fa‘apea mai ai lea o ia ‘iā te a‘u, “O i latou ia o ē ō mai nai le puapuagā tele, ‘ua tā fo‘i o latou ‘ofu, ma ‘ua fa‘asinasinaina o latou ‘ofu i le toto o le Tama‘i Mamoe.#Tani 12.1; Mata 24.21; Mare 13.19 15O le mea lea ‘ua latou i luma ai o le nofoāli‘i o le Atua, ‘ua latou ‘au‘auna fo‘i ‘iā te ia i lona malumalu i le ao ma le pō; o lē ti‘eti‘e fo‘i i le nofoāli‘i e malutia ai i latou. 16Latou te lē toe fia ‘a‘ai, e lē toe fia inu fo‘i, e lē ogotia i latou i le lā, po o se tasi vevela.#Isai 49.10 17Auā o le Tama‘i Mamoe o lo‘o i luma o le nofoāli‘i na te fafaga ‘iā i latou, ma ta‘ita‘i ‘iā te i latou i puna o vai ola; e sōloi‘eseina fo‘i e le Atua o loimata uma nai o latou mata.”#Sala 23.1; Eseki 34.23; Sala 23.2; Isai 49.10; 25.8
Revised Samoan Catholic Bible © Bible Society of the South Pacific, 2010.