Salāmo 85
85
O le Tatalo ‘ina ‘ia Fa‘afoisia mai e le Atua le Manuia
Ma le usu pese. O le salāmo mā le fānauga a Koru
1Le ALI‘I e,
‘ua e fiafia lava i lou nu‘u;
‘ua e fa‘afoisia mai le tāfeaga o Iakopo.
2‘Ua e fa‘amāgaloina le amio leaga a lou nu‘u,#Sala 32.1; 78.38; Iona 3.9
‘ua e ufitia a latou agasala uma lava. Selā.
3‘Ua e ‘ave‘esea lou ma‘ema‘eā uma lava;
‘ua e liliu ‘ese lou to‘asā mamafa.
4Le Atua e, o lo matou fa‘aolataga,#Sala 80.3
‘ia e fa‘afoisia mai i matou;
‘ia e fa‘amavae atu fo‘i lou to‘atama‘i ‘iā te i matou.
5E fa‘avavau ‘ea lou to‘asā ‘iā te i matou?
‘e te fa‘aualoa ‘ea lou ma‘ema‘eā e au tupulaga.
6‘E te lē toe fa‘aolaola mai ‘ea ‘iā te i matou;#Sala 71.20; 90.14
‘ina ‘ia fiafia lava lou nu‘u ‘iā te oe?
7Le ALI‘I e, ‘ia e fa‘ailoa mai ‘iā te i matou lou alofa;
‘ia e foa‘iina mai fo‘i ‘iā te i matou le olataga mai ‘iā te oe.
8‘Ou te fa‘alogologo atu i mea e fetalai mai ai le ALI‘I le Atua;#Sapa 2.1; Saka 9.10; 2 Pete 2.21
auā na te fetalai mai ia manuia lona nu‘u
‘atoa ma ona tagata amio Atua;
‘ae ‘aua ne‘i latou toe liliu atu i le valea.
9E moni, ‘ua latalata lana olataga i ē ‘ua matata‘u ‘iā te ia;
‘ina ‘ia tumau ai le mamalu i lo tatou nu‘u.
10O le alofa ma le fa‘amaoni ‘ua la fetaia‘i;#Sala 72.3; 89.14; Isai 32.17; Mika 7.20
o le amiotonu ma le filemū ‘ua la feasogi.
11E tupu a‘e le fa‘amaoni a‘i le lalolagi;#Isai 45.8
e va‘ava‘ai ifo fo‘i le amiotonu mai le lagi.
12E foa‘iina mai e le ALI‘I lava le manuia;
e fua mai fo‘i e lo tatou lau‘ele‘ele ona lava fua.
13E muamua atu i ona luma le amiotonu;#Isai 58.8
na te fa‘atumauina fo‘i ona vae i le ala.
Revised Samoan Catholic Bible © Bible Society of the South Pacific, 2010.