Fa‘ata‘oto 29
29
O Pule ‘Ese‘ese i le Mālō ma le ‘Āiga
1O le tagata ‘ua a‘oa‘iina so‘o, ‘ae fa‘ama‘a‘a lona ua,
e fa‘afuase‘i ‘ona nutimomoia o ia, ‘ae leai se fofō.#Fa‘ata 1.14-27; 6.15; Iere 19.11
2A pule ē amiotonu, ‘ua ‘oli‘oli ai le nu‘u;
‘ae a pule ē amio leaga, ‘ua mapuitigā le nu‘u.#Ese 3.15; 8.15; Fa‘ata 28.12, 28
3O le tagata ‘ua mana‘o i le poto, na te fa‘atupuina le fiafia o lona tamā;
a o lē aumea ma fafine talitane, na te fa‘aumatia ‘oloa.#1 Tu 1.48; Fa‘ata 6.26; 10.1
4E fa‘atumauina le nu‘u e le tupu i le fa‘amasinoga;
a o le tagata ‘ua tali mea alofa, na te lepetia ai le nu‘u.
5O le tagata ‘ua fa‘a‘ole‘ole i lē la te tuā‘oi;
na te folasia le ‘upega i le mea e ui ai o ia.#Sala 9.15; Fa‘ata 28.23
6O i ai le mailei i le soliga o le tulafono e le tagata amio leaga;
a o le tagata amiotonu, ‘ua pese ma ‘oli‘oli o ia.
7‘Ua manatu le tagata amiotonu i le finauga a lē ‘ua mativa;
a o le amio leaga, ‘ua lē mafaufau o ia ‘ina ‘ia iloa.#Iopu 29.16; Sala 41.1
8O tagata fa‘atauemu, latou te fa‘amūina le ‘a‘ai;
a o ē popoto, latou te fa‘aliliu‘eseina le ita.
9O le tagata poto ‘ua finau ma le tagata valea,
pe ita, pe ‘ata‘ata, e leai se filemū.
10O tagata totolima, ‘ua ‘ino‘ino i latou i lē ‘ua sa‘o lana amio;
a o ē amiotonu, latou te sā‘ili ‘ia ola o ia.#Kene 4.5, 8; 1 Ioane 3.12
11O le vale, e sasa‘a uma mai e ia lona loto;
a o le tagata poto, e tāofiofi e ia lona loto.
12O le faipule e ua‘i atu ona taliga i ‘upu pepelo,
e amio leaga ana ‘au‘auna uma lava.
13O lē ‘ua mativa, ma le tagata fa‘asauā, la te fetaia‘i;
o le ALI‘I na te fa‘atau fa‘amalamalamaina o lā‘ua mata.#Sala 13.3; Fa‘ata 22.2
14O le tupu, o lē na te fa‘amasinoina ma le fa‘amaoni ē matitiva,
e fa‘atumauina lona nofoāli‘i e fa‘avavau.#Sala 72.2, 4; Fa‘ata 16.12
15O le sasa ma le a‘oa‘iga e tupu ai le poto;
a o le tama ‘ua tu‘ulafoa‘iina, e tupu ai le mā o lona tinā.#Fa‘ata 10.1; 29.17
16A fa‘ato‘ateleina ē amio leaga, ‘ua fa‘ateleina le solitulafono;
a o ē amiotonu, latou te iloa atu lo latou malaia.
17‘Ia e a‘oa‘i i lou atali‘i, ‘ona e maua ai lea se filemū;
e tupu ai le fiafia i lou loto.#Fa‘ata 13.24
18A leai se valo‘aga, e fa‘asalalauina le nu‘u;
a o lē ‘ua tausiusi i le tulafono, ‘amu‘ia o ia.#Eso 32.25; 1 Samu 3.1; Amo 8.11-12; Ioane 13.17; Iako 1.25
19E lē mafai ‘ona a‘oa‘iina o le ‘au‘auna i ‘upu;
auā ‘ua lagona e ia, ‘ae lē tali atu i ai.
20‘Ua e iloa ‘ea le tagata ‘ua fa‘ata‘alise i ana ‘upu e fai le fa‘amoemoe o tagata i le vale, ‘ae lē ‘iā te ia.#Fa‘ata 26.12
21O lē ‘ua fa‘apelepele i lana ‘au‘auna e āfua mai ‘ina itiiti,
mulimuli ane e fai o ia ma atali‘i.#29.21 o lē fa‘apelepele i lana ‘au‘auna…fai o ia ma atali‘i: po o E fai lenā ‘au‘auna ma ona fili.
22O le tagata itagofie na te fa‘atupuina le misa;
ma le tagata lotoa na te fa‘ateleina soliga o le tulafono.#Fa‘ata 15.18
23O le fa‘amaualuga o le tagata e fa‘amaulaloina ai o ia;
a o le fa‘amaulalo o le loto e maua ai le vi‘iga.#Sala 18.27; Fa‘ata 11.2; 15.33; Mata 23.12; Iako 4.6
24O lē ‘ua vaelua mea fa‘atasi ma le gaoi, ‘ua ‘ino‘ino o ia ‘iā te ia lava;
e fa‘alogo o ia i le tautō, ‘ae lē fa‘aali atu.#Levi 5.1
25O le fefe i tagata e tupu ai le mailei;
a o lē fa‘atuatua i le ALI‘I e fa‘amamaluina o ia.#Kene 12.12-13; Fa‘ata 18.10; Ioane 12.42-43
26E to‘atele ē sā‘ili i le faipule;
a o lo‘o i le ALI‘I le fa‘amasinoga o tagata.#Isai 49.4
27O ē amiotonu latou te ‘ino‘ino i le tagata agapi‘opi‘o;
a o ē amio leaga, latou te ‘ino‘ino i lē ‘ua sa‘o lona ala.
Revised Samoan Catholic Bible © Bible Society of the South Pacific, 2010.