Fa‘ata‘oto 10
10
O Fa‘ata‘oto a Solomona
1O fa‘ata‘oto a Solomona.
O le atali‘i poto na te fa‘afiafia lona tamā;
a o le tama valea e fa‘anoanoa ai lona tinā.#Fa‘ata 1.1; 17.25; 27.11; 29.3, 15
2E lē aogā le faulaiga‘oloa o le amio leaga;
a o le amiotonu, e lavea‘i lea nai le oti.#Fa‘ata 11.4; 21.6; Eseki 7.19
3E lē fa‘alāina e le ALI‘I o ē amiotonu;
a o le mana‘o o amio leaga, e te‘ena lea e ia.#Sala 34.9, 10; 112.10
4E mativa lē ‘ua galue ma le lima vaivai;
a o ē lima malosi e mau‘oa i latou.
5O lē fa‘aputu i le tausaga vevela, o le atali‘i poto lea;
a o lē moegase i le tausaga e selesele ai saito,
o le atali‘i lea e tupu ai le mā.#Fa‘ata 6.6-8
6O fa‘amanuia ‘ua i luga o le ulu o lē amiotonu;
a o gutu o ē amio leaga, ‘ua ufitia ia i le fa‘asauā.
7O le fa‘amanatuina o le amiotonu, e vi‘ia lava lea;
a o igoa o ē amio leaga, e pala ia.#Sala 9.5; 112.6
8O lē ‘ua poto lona loto, na te talia poloa‘iga;
a o lē ‘ua gutu vale, e lafotūina ia.
9O lē savali i le amiotonu, ‘ua savali ma le saogalemū o ia;
a o lē fa‘api‘opi‘o ona ala, e fa‘aalia o ia.#Fa‘ata 3.23; 28.18; Isai 33.15-16; 1 Timo 5.25
10O lē ‘ua genogeno ona mata, na te fa‘atupuina le tigā;
o lē ‘ua gutu vale fo‘i, e lafotūina ia.
11O le gutu o le amiotonu, o le puna o le ola lea;
a o gutu o ē amio leaga, ‘ua ufitia ia i le fa‘asauā.#Sala 36.9; Fa‘ata 13.14
12O le ‘ino‘ino e fa‘atupu ai misa;
a o le alofa e ufiufi ai solitulafono uma lava.
13‘Ua iloa le poto i laugutu o lē mafaufau;
a o le sasa, e tatau lea i le tua o lē ‘ua leai sona mafaufau.#Fa‘ata 6.32; 19.29
14O ē popoto latou te teua le poto;
a o le gutu o le vale, ‘ua latalata i ai le malaia.
15O le ‘oloa o le mau‘oa, o lona ‘olo malosi lea,
a o le mativa o ē matitiva, o lo latou malaia lea.#Fa‘ata 18.11; 1 Timo 6.17
16O le galuega o lē amiotonu, e i‘u lea i le ola;
a o mea e maua e lē ‘ua amio leaga, e i‘u lea i le sala.
17‘Ua i le ala o le ola o lē tausi i mea e a‘oa‘oina;
a o lē ‘ua tu‘ua le a‘oa‘iga, ‘ua sesē lea.#Fa‘ata 6.23
18O lē ‘ua ufiufi le ‘ino‘ino, ‘ua ‘iā te ia laugutu pepelo;
ma lē ‘ua fai tala leaga, o le vale lava ia.
19O le tele o ‘upu e fa‘aono solia ai le tulafono;
a o lē ‘ua tāofi ona laugutu, o le tagata poto lea.#Fa‘ata 17.27; Mata 12.36-37; Iako 1.19; 3.2
20O le laulaufaiva o lē amiotonu, o le ario e sili ‘ona lelei lea;
o loto o ē amio leaga, e tusa ia ma se mea fa‘atauva‘a.
21O laugutu o lē amiotonu e fagaina a‘i le to‘atele;
a o ē vālelea, e oti i latou ‘ina ‘ua leai se mafaufau.
22O le fa‘amanuia a le ALI‘I, o lea e fa‘atamao‘āiga ai;
na te lē fa‘aopoopo i ai se tigā.#Kene 24.35; Teu 8.18
23E pei ‘ona fai ma mea e ‘ata‘ata ai le vale ‘ina ‘ua fai mea leaga;
e fa‘apea fo‘i le poto i le tagata mafaufau.
24O le mea e mata‘u i ai lē amio leaga, e o‘o lava lea ‘iā te ia;
a o le mana‘o o ē amiotonu, e foa‘iina mai lava lea.#Iopu 15.21; Sala 145.19; Isai 66.4; Mata 5.6
25E pei ‘ona mavae atu o le asiosio, ‘ua fa‘apea fo‘i lē ‘ua amio leaga ‘ona leai;
a o lē amiotonu, ‘ua i ai fa‘avae e fa‘avauvau.#Iopu 21.18; Sala 15.5; 58.9; Mata 7.24-27
26E pei o le vineka i nifo, e pei o le asu fo‘i i mata,
e fa‘apea le paiē i ē ‘ua ‘auina o ia.
27O le mata‘u i le ALI‘I e fa‘alevaleva ai aso;
a o tausaga o ē amio leaga, e fa‘aitiitiina ia.#Iopu 15.32-33; Fa‘ata 3.2; Fai 7.17
28O le fa‘amoemoe o ē amiotonu o le ‘oli‘oli lea;
a o le fa‘atuatuaga o ē amio leaga, e i‘u vale lea.#Iopu 8.13; Roma 5.2
29O le ala o le ALI‘I o le malosi lea i ē ‘ua sao a latou amio;
a o le malaia i ē fai amio leaga.#Fa‘ata 21.15
30O lē ‘ua amiotonu e le fa‘agae‘etia lava o ia e fa‘avavau;
a o ē amio leaga, e lē mau i latou i le nu‘u.
31O le gutu o lē amiotonu e fua mai ai le poto;
a o le laulaufaiva fa‘api‘opi‘o, e vavae‘eseina lea.#Sala 37.30
32O laugutu o lē amiotonu ‘ua iloa e ia o mea mālie;
a o gutu o ē amio leaga, e fa‘api‘opi‘o ia.#Fai 10.12
Revised Samoan Catholic Bible © Bible Society of the South Pacific, 2010.