Failauga 7
7
O le Ta‘uleleiina ma le ‘Onosa‘i ma le Poto e Māmā ai le Tigā ‘ona o Mea Valea
1E sili ‘ona lelei o le ta‘uleleia i le suāu‘u lelei,
ma le aso e oti ai e sili i le aso e fānau mai ai.#Fa‘ata 22.1; Fai 4.2
2E sili ‘ona lelei o le alu i le fale o i ai le fa‘anoanoa, i le alu i le fale ‘ua fai ai le tausamiga;
auā o le i‘uga lea o tagata uma; e manatua fo‘i e le tagata ola i lona loto.
3E sili ‘ona lelei o le tigā, i le ‘ata‘ata;
auā o le fa‘anoanoa, o mata e lelei ai le loto.#2 Kori 7.10
4O le loto o le tagata poto ‘ua i le fale o i ai le fa‘anoanoa;
a o le loto o ē vālelea, ‘ua i ai lea i le fale o i ai le ‘oli‘oli.
5E sili ‘ona lelei o lē fa‘alogo i le a‘oa‘iga a le tagata poto,
i le fa‘alogo o se tasi i le pese a ē vālelea.#Sala 14.5
6Auā e pei o le talalī o la‘au talatala i lalo o le ‘ulo,
e fa‘apea le ‘ata‘ata o le vale; o le mea fa‘atauva‘a fo‘i lea.
7O le sauā e fa‘avalea ai lava le tagata poto;
o le mea foa‘ifuaina fo‘i e leaga ai le loto.#Eso 23.8
8E sili ‘ona lelei o le i‘uga o se mea i lona amataga.
E sili ‘ona lelei o lē ‘ua ‘onosa‘i i lē ‘ua loto fa‘amaualuga.
9‘Aua le fa‘ata‘alise ‘ona ita o lou loto;
auā e tumau le ita i loto o ē vālelea.#Iako 1.19
10‘Aua ‘e te fa‘apea, “Se a le mea ‘ua sili ai ‘ona lelei o ona po anamua i nei ona po?”
Auā e lē o le poto ‘ua e fesili ai i lea mea.
11E lelei le poto e fa‘atasi ma le tofi,
e sili ‘ona aogā fo‘i i ē o iloa atu le lā;
12auā ‘ua fai le poto ma mamalu, ‘ua fai fo‘i tupe ma mamalu;
a o le aogā lenei o le poto ‘ua maua, e ola ai ē ‘ua i ai.#Fa‘ata 3.18
13‘Inā mānatunatu ia i le galuega a le Atua;
auā o ai sē na te mafaia ona fa‘asa‘oina o le mea ‘ua fa‘api‘opi‘oina e ia?#Fai 1.15; 3.11; Isai 14.27
14‘Inā fiafia ia i le aso e manuia ai, ‘ia mafaufau fo‘i i le aso e malaia ai;
‘ua tu‘u feagai e le Atua le tasi i le tasi, ‘ina ‘ia lē iloa e le tagata se mea e tupu pe a mavae atu o ia.#7.14‘ina ‘ia lē iloa e le tagata…pe a mavae atu o ia: po o e lē iloa e le tagata se sesē a le Atua.
O mea e Faigatā ‘ona Malamalama i ai
15‘Ua ‘ou iloa nei mea uma i ‘ou nei aso fa‘atauva‘a; o le tagata amiotonu e oti o ia i lana amiotonu; o le tagata amio leaga fo‘i e ola umi o ia i lana amioleaga.#Fai 6.12; 8.12-14 16‘Aua ‘e te amiotonu na‘uā, ‘aua fo‘i ‘e te fa‘atele na‘uā lou poto; se a le mea e oti ai oe ‘iā te oe?#Roma 12.3; Fili 3.6 17‘Aua ‘e te amio leaga na‘uā, ‘aua fo‘i ‘e te fa‘avalea; se a le mea e oti ai oe a o le‘i o‘o i ou po?#Iopu 15.32; Fa‘ata 10.27 18E lelei ‘ona e tāofi i lenei, ‘aua fo‘i ‘e te tu‘u ‘ese lou lima i lenā; auā o lē ‘ua mata‘u i le Atua e sao o ia a‘i na mea uma.
19O le poto e sili ai ‘ona malosi o lē ‘ua poto, i faipule e to‘asefulu ‘ua i le ‘a‘ai.#Fa‘ata 21.22; Fai 9.16, 18
20E leai lava se tagata amiotonu i le lalolagi, o lē na te faia amio lelei, ma le lē agasala.#1 Tu 8.46; Roma 3.23; 1 Ioane 1.8
21‘Aua fo‘i ‘e te manatu i ‘upu uma ‘ua faia; ne‘i e fa‘alogo i lau ‘au‘auna o fetu‘u ‘iā te oe; 22auā fo‘i ‘ua iloa lou loto, o oe lava ‘ua atu lasi ‘ona e fetu‘u i nisi tagata.
23‘Ua ‘ou tofotofo ma le poto i nei mea uma; na ‘ou fa‘apea ifo, “O le a ‘ou poto;” a ‘ua mamao lava lea ‘iā te a‘u. 24O le mea ‘ua mamao ma le matuā loloto, o ai sē na te mafaia ‘ona iloa?#Iopu 28.12; Roma 11.33; 1 Timo 6.16 25Na ‘ou fa‘asaga ma lo‘u loto ‘ia iloa ma sā‘ili ma su‘esu‘e i le poto ma le uiga o mea, ‘ia iloa fo‘i le leaga o le valea ma le amio valea a ē vālelea.
26‘Ua ‘ou iloa fo‘i e itiiti lava le tigā o le oti, ‘ae tele lava ‘ona o le fafine ‘ua fai lona loto ma mailei ma ‘upega ma ona lima ma noanoaga; o lē ‘ua lelei i luma o le Atua, e sao o ia ‘iā te ia; a o le ‘ua agasala e maua o ia e ia.#Fa‘ata 5.4; 22.14; 23.27-28 27O lo‘o fa‘apea mai le Failauga, Fa‘auta mai, ‘ua ‘ou iloa lenei mea i lo‘u fa‘atatauina o le tasi i le tasi, e iloa ai le mea ‘ua fa‘apea ai; 28o lo‘o sā‘ili ai pea lava a‘u, a ‘ua lē iloa; o le tane e to‘atasi o i le to‘aafe ‘ua ‘ou iloa; a o se fafine o i le to‘atele fa‘apenā ‘ou te le‘i iloa.#1 Tu 11.3 29Fa‘auta, na o lenei lava mea ‘ua ‘ou iloa, na faia e le Atua le tagata e amiotonu, a o i latou ‘ua sā‘ili‘ili i latou i togafiti e tele.#Kene 1.27; 3.6-7
Revised Samoan Catholic Bible © Bible Society of the South Pacific, 2010.