Failauga 10
10
O Amioga a ē Popoto ma ē Vālelea
1O lago mamate e elo ai ma masa ai le suāu‘u manogi a le fai mea manogi;
o le valea itiiti fo‘i e leaga ai lē ‘ua ta‘ua o le poto ma le mamalu.
2O le loto o le tagata poto ‘ua i lona lima taumatau;
a o le loto o le vale ‘ua i lona lima tauagavale.
3A savali le vale i le ala, ‘ua leai sona mafaufau,
‘ua fai atu fo‘i o ia i tagata uma, o ia o le vale.#Fa‘ata 13.16
4‘Āfai e tupu le ita o le faipule ‘iā te oe, ‘aua ‘e te tu‘ua le mea ‘ua e i ai;
auā o le agamalū e moe ai le ita i agasala tetele.#10.4 auā o le agamalū e moe…ita i agasala tetele: po o le agamalū e talia ai e ia. #1 Samu 25.24; Fa‘ata 25.15; Fai 8.3
5O le tasi mea leaga ‘ua ‘ou iloa i lalo o le lā, o le mea sesē e tupu mai i le ali‘i; 6‘ua tofia le valea i mea silisili, a ‘ua nonofo ē ‘ua mau‘oa i le mea maulalo. 7‘Ua ‘ou iloa ‘au‘auna e ti‘eti‘e i solofanua, a o ali‘i e sāvavali i le ‘ele‘ele e pei o ‘au‘auna.#Fa‘ata 19.10
8O lē na te ‘eli se lua e pa‘ū o ia i ai;
o ia fo‘i na te lepeti se ‘aupā, e utia o ia e se gata.#Sala 7.15; Fa‘ata 26.27
9O lē na te ‘ave‘esea ma‘a e tigā ai o ia;
o lē na te isia la‘au e lavea ai o ia.
10‘Āfai e matatupa le u‘amea, ‘ae lē fa‘ama‘aia fo‘i e ia lona mata, ‘ona fa‘atele lea i ai o lona malosi;
a o le poto, o le mea aogā lea e fa‘atonu a‘i.
11‘Āfai e u se gata, a o le‘i fa‘aoleoleina,
‘ona leai lea o se mea e maua e lē na te fa‘aoleoleina.#Iere 8.7
12O ‘upu a le tagata poto o ‘upu alofa ia;
a o le gutu o le vale e malaia ai o ia.
13O le amataga o ‘upu a lona gutu o le valea lea,
o le i‘uga fo‘i o lana tautala o le valea leaga lea.
14‘Ua fa‘ateleina fo‘i ‘upu e le vale;
e lē iloa fo‘i e tagata se mea e tupu;
o ai fo‘i sē na te fa‘ailoa ‘iā te ia se mea e tupu pe a mavae atu o ia?
15O le galuega a ē vālelea ‘ua lailoa ai i latou;
auā e leai so latou e iloa ‘ona alu i le ‘a‘ai.
16Le nu‘u e, ‘oi talofa ‘iā te oe pe a se tama lou tupu,
e ala ‘a‘ai ma fa‘afiafia fo‘i ou ali‘i i le aso ‘atoa!#Isai 3.4; 5.11
17Le nu‘u e, ‘amu‘ia oe pe a fai mou tupu le alo o se ali‘i,
e ‘a‘ai fo‘i ou ali‘i i le itū aso e tatau ai, ‘ia malolosi ai,
‘ae lē ‘ina ‘ia ‘o‘onā ai.
18O lē paiē tele e pala ai le paela‘au,
o lē le tago fo‘i o lima i mea, e tutulu ai le fale.
19‘Ua latou faia tausamiga e featani ai,
o le uaina fo‘i e fiafia ai tagata ola;
a o tupe e aogā i mea uma.#Sala 104.13
20‘Aua ‘e te fetu‘u i le tupu i lou lava manatu;
‘aua fo‘i ‘e te fetu‘u i le mau‘oa i lou lava potu moe;
auā e ‘ave le leo e se manulele,
e fa‘ailoa atu fo‘i le ‘upu e le mea ‘ua fai ‘apa‘au.#Eso 22.28
Revised Samoan Catholic Bible © Bible Society of the South Pacific, 2010.