Baruch 3
3
O le Fa‘aauauga o le Tatalo Fa‘ato‘esega
1A o lenei, le Ali‘i mamana e, le Atua o Isaraelu, ‘ua tagi atu ‘iā te oe agaga puapuagātia ma le loto ‘ua ātu lava ia. #Paru 2.18 2Le Ali‘i e, ‘ia e fa‘afofoga ma e alofa mai, auā o oe o le Atua agaalofa, ‘ia e alofa mai fo‘i ‘iā i matou, auā ‘ua matou agasala i ou luma. 3Auā e fai oe ma tupu e fa‘avavau pe fano fo‘i i matou e fa‘avavau? #Sala 29.10; 44.22; Paru 5.19 4Le Ali‘i mamana e, le Atua o Isaraelu, ‘ia e fa‘afofoga nei i le ōlega a ē ‘ua oti o Isaraelu ma le fānau a ē na latou agasala i ou luma ma ‘ua latou lē fa‘alogo i le si‘ufofoga o le Ali‘i lo latou Atua, e i ai ‘ona pesi mai o mala ‘iā te i matou. 5‘Aua ne‘i e manatua le amio leaga a o matou tamā, ‘ae ‘ia e manatua lou ‘a‘ao mamana ma lou suafa i nei lava aso; 6auā o oe o le Ali‘i, o lo matou Atua, matou te vivi‘i atu ai ‘iā te oe, le Ali‘i e. 7Auā o le mea lava lea na e tu‘u mai ai le mata‘u ‘iā te oe ‘iā i matou loto, ‘ina ‘ia matou vala‘au ai i lou suafa ma ‘ia matou vivi‘i atu ‘iā te oe i lo matou tāfeaga, auā ‘ua matou liliu‘ese i le amio leaga a o matou tamā, o ē na agasala i ou luma. #Iere 31.33 8A o le aso nei ‘ua i ai i matou i lo matou tāfeaga, na e fa‘ata‘ape‘apeina ai i matou ‘ia ‘avea ma tauemuga ma ‘upu fāifai ma sala o agasala, e tusa ma amioga leaga uma a o matou tamā na latou fouvale ‘iā te oe, le Ali‘i e, lo matou Atua.
O le Vi‘ia o le Poto
9Isaraelu e,
‘ia e fa‘alogologo mai ia i poloa‘iga o le ola;
‘ia e ua‘i mai ou taliga, ‘ina ‘ia e maua ai le fa‘autauta. #Fa‘ata 4.20-22
10Isaraelu e, se ā le mea ‘ua i ai oe i le nu‘u o ou fili?
11‘Ua fa‘alevaleva ou aso i le nu‘u ‘ese, ‘ua fa‘aleagaina oe i tagata oti,
‘ua faitauina oe fa‘atasi ma ē ‘ua ō ifo i seoli.
12Na e tu‘ulafoa‘iina le punāvai o le poto. #Iere 2.13; Sira 1.5
13Auā ‘ana e savali i le ala o le Atua, po ‘ua e mautū lava i le filemū e fa‘avavau.
14‘Ia e sā‘ili po o fea e i ai le fa‘autauta, po o fea e i ai le malosi,
po o fea e i ai le mafaufau, ‘ina ‘ia e iloa ai fo‘i po o fea e i ai le olaga fa‘alevaleva,
le ola moni, le fiafia o mata, le filemū.
15‘Ua maua e ai lona nofoaga?
O ai ‘ua ulu atu i le mea e teu ai ana ‘oa? #Iopu 28.12, 20
16O ifea ‘ea o ta‘imua o nu‘u ‘ese,
na latou pulea o manu fe‘ai ‘ua i le lalolagi?
17Sa latou ta‘a‘alo i manu felelei o le lagi,
18sa latou fa‘aputu le ario ma le auro ‘ua fa‘alagolago i ai o tagata,
sa leai se gata‘aga o la latou fai mea; sa latou fai tupe,
sa latou popole i ai o lenei ‘ia leai se toe fa‘ailoga o a latou galuega.
19‘Ua fa‘aumatia i latou ma ‘ua fa‘aifo i latou i seoli,
a ‘ua tūtūla‘i ni isi e sui ‘iā te i latou.
20O tagata talavou ‘ua latou iloa le malamalama, ma ‘ua latou nonofo i le lalolagi;
‘ae ‘ua latou lē iloa le ala o le poto moni,
21ma ‘ua latou lē maua ona magāala; ‘ua lē talia fo‘i ia e o latou atali‘i,
‘ua tu mamao lava ia ma o latou mata.
22‘Ua lē logo lava ia i le fanua o Kanana, ‘ua lē iloa ia i Timanu. #Eseki 28.4-5; Saka 9.2
23O le fānau fo‘i a Akara, ‘ua latou sā‘ili le poto fa‘alelalolagi,
o fa‘atau ‘oloa mai Mera ma Timanu,
o ē fai fagono ma ē sā‘ili‘ili i le atamai ma le malamalama,
a ‘ua latou lē iloa le ala o le poto ma ‘ua latou lē manatua ona magāala. #Iopu 2.11; Eso 2.15
24Isaraelu e!
‘ua matuā telē le maota o le Atua,
‘ua matuā salalau le tulaga o ana pule‘aga!
25‘Ua telē lava, ‘ua leai sona tulu‘iga; ‘ua maualuga, ‘ua lē ma fuatia.
26O le mea lea na i ai o tagata maualuluga ‘ia ma le tāua anamua, tagata tino ‘ese, popoto i le tau‘a. #1 Samu 16.7
27E lē o i latou ia na filifilia e le Atua, ‘ua latou lē maua fo‘i le ala o le poto;
o le mea lea na fano ai i latou.
28‘Ona ‘ua latou lē maua fo‘i le poto, o lea na fano ai i latou ‘ona o lo latou valea.
29Po o ai na alu a‘e i le lagi ma ‘ua na maua o ia,
‘ua na fa‘aifoina mai ao timu? #Sira 24.7; Poto 9.4
30Po o ai ‘ua na sopo‘ia atu le sami ma ‘ua na maua ia
ma ‘ua na ‘aumaia, o fa‘asili ia i le auro mamā?
31E leai sē na te mafaia ‘ona iloa ona ala,
na te sā‘ilia ona magāala. #Iopu 28.13-14
32A o lē ‘ua na silafia mea uma, ‘ua na iloa ia, ‘ua na maua ia i lona fa‘autauta,
o lē ‘ua na saunia le lalolagi i ona po o le vavau ma ‘ua na fa‘atumuina i mamoe ma manu vaefā.
33O lē ‘ua na ‘auina mai le malamalama,
‘ona sau ai lea ma ‘ua vala‘au atu i ai ma ‘ua usita‘i ‘iā te ia ma le tetemū.
34A o fetū ‘ua latou fepulafi ‘iā latou leoleoga, ma ‘ua latou ‘oli‘oli;
‘ua vala‘auina i latou ma ‘ua latou fai mai,
“O i matou nei;” ma ‘ua latou fepulafi ma le fiafia i lē ‘ua na faia i latou. #Isai 40.26; Iopu 38.35; Sala 147.4
35O lo tatou Atua lea, e leai fo‘i se tasi e taufa‘atusaina ma ia.
36O ia ‘ua na maua uma o ala o le poto ma ‘ua tu‘uina mai ‘iā Iakopo,
lana ‘au‘auna, ‘iā Isaraelu lana pele.
37‘Ona fa‘ato‘ā aliali lea o ia i le lalolagi
ma ‘ua soamafuta fa‘atasi ma tagata. #Sira 24.12, 15; Fa‘ata 8.31; Poto 9.10; Ioane 1.14
Revised Samoan Catholic Bible © Bible Society of the South Pacific, 2010.