2 Nofoa‘iga a Tupu 36
36
O Ioasasa le Tupu o Iuta
(2 Tu 23.30-35)
1‘Ona ‘ave lea e tagata o le nu‘u o Ioasasa le atali‘i o Iosia ma ‘ua latou fai ai o ia ma tupu e sui ai lona tamā i Ierusalema. 2E lua sefulu ma le tolu o tausaga o Ioasasa ‘ina ‘ua fai o ia ma tupu ma ‘ua fai o ia ma tupu i masina e tolu i Ierusalema. 3‘Ona ‘ave‘eseina lea o ia e le tupu o Aikupito i Ierusalema, ‘ua ia fa‘asalaina fo‘i le nu‘u o taleni ario e selau ma le taleni auro. 4‘Ona tofia lea e fai ma tupu ‘iā Iuta ma Ierusalema e le tupu o Aikupito o Eliakimo lona uso, ‘ua ia liua fo‘i lona igoa ‘iā Ioakima. ‘Ona ‘ave ai lea e Neko o Ioasasa lona uso ma ‘ua ‘aumai ‘iā te ia i Aikupito.#Iere 22.11-12
O Ioakima le Tupu o Iuta
(2 Tu 23.36—24.7)
5E lua sefulu ma le lima o tausaga o Ioakima ‘ina ‘ua fai o ia ma tupu ma ‘ua fai o ia ma tupu i tausaga e sefulu ma le tasi i Ierusalema; sa fai fo‘i e ia amio leaga i luma o le ALI‘I lona Atua.#Iere 22.18-19; 26.1-6; 35.1-19; 2 Tu 23.36-37 6‘Ua alu a‘e Nepukanesa le tupu o Papelonia e tau ma ia ma ‘ua noanoa ‘iā te ia i fa‘amau ‘apamemea, e ‘ave ‘iā te ia i Papelonia.#Iere 25.1-38; 36.1-32; 2 Tu 24.1, 6; 2 No 33.11 7‘Ua ‘ave fo‘i e Nepukanesa nisi ipu o le fale o le ALI‘I i Papelonia ma ‘ua tu‘u ai i lona malumalu i Papelonia. 8O toe o mea sa faia e Ioakima ma ana mea leaga na faia ma mea ‘ua iloa ‘iā te ia, fa‘auta, ‘ua tusia i le tusi i tupu o Isaraelu ma Iuta; ‘ua soloa‘i ane Ioakina lona atali‘i e fai ma tupu.
O Ioakina le Tupu o Iuta
(2 Tu 24.8-17; Iere 52.1-3)
9E valu tausaga o Ioakina ‘ina ‘ua fai o ia ma tupu, ‘ua fai fo‘i o ia ma tupu i masina e tolu ma aso e sefulu i Ierusalema; ‘ua faia fo‘i e ia o mea leaga i luma o le ALI‘I. 10‘Ua mavae le tausaga, ‘ona alu lea o le fe‘au a le tupu o Nepukanesa ma ‘ua ‘ave ‘iā te ia i Papelonia ma ipu lelei o le fale o le ALI‘I; ‘ua ia faia fo‘i Setekaia lona uso ma tupu ‘iā Iuta ma Ierusalema.#Iere 22.24-30; 24.1-10; 29.1-2; 37.1; Eseki 17.12-13; 2 No 36.18
O Setekaia le Tupu o Iuta
(2 Tu 24.18-20; Iere 52.1-3)
11E luafulu ma le tasi o tausaga o Setekaia ‘ina ‘ua fai o ia ma tupu ma ‘ua fai o ia ma tupu i Ierusalema i tausaga e sefulu ma le tasi.#Iere 27.1-22; 28.1-17; 2 Tu 24.18-20 12Sa faia e ia amio leaga i luma o le ALI‘I lona Atua, ‘ua lē fa‘amaulalo o ia i luma o Ieremia le perofeta, o lo‘o tautala mai ai i le afioga a le ALI‘I.
O le Fa‘atafunaga o Ierusalema
(2 Tu 25.1-21; Iere 52.3-11)
13‘Ua ia fouvale fo‘i i le tupu o Nepukanesa, o lē na fai atu ‘ia tautō o ia i le Atua; a ‘ua fa‘amalō lona ua ma fa‘ama‘a‘a lona loto, e le liliu mai i le ALI‘I le Atua o Isaraelu.#Eseki 17.15 14O ali‘i uma fo‘i o le ‘au ositaulaga ma le nu‘u, ‘ua matuā agasala lava i latou e tusa ma mea leaga uma a nu‘u ‘ese ma latou fa‘aleagaina le fale o le ALI‘I sa fa‘apa‘iaina e ia i Ierusalema. 15‘Ua ‘a‘auina mai ‘iā te i latou e le ALI‘I le Atua o latou tamā o ē ‘ave ana fe‘au, ‘ua ala ‘a‘auina lava i latou; auā ‘ua na alofa i lona nu‘u ma lona afio‘aga;#2 Tu 17.13; Iere 7.13, 25; 11.7; Epe 1.1 16a ‘ua latou fa‘atauemu i ē na ‘a‘auina mai e le Atua ma ‘ua ‘ino‘ino i ana afioga ma ‘ua ula i ana perofeta, ‘ua o‘o ‘ina tupu le to‘asā o le ALI‘I i lona nu‘u, ‘ua o‘o ‘ina leai se fofō.#2 Tu 17.14-15; Esera 5.12; Iere 5.12-13; Mata 23.34-36; Mare 12.2-5; Galu 7.51-52
17‘Ona ‘auina mai ai lea e ia ‘iā te i latou o le tupu o Kaletaia o lē na fasia o latou taulele‘a i le pelu i le fale o lo latou malumalu ma ‘ua lē alofa atu i taulele‘a ma taupou, o le toeaina ma lē ulusinā; ‘ua ia tu‘uina atu i latou uma i lona lima.#Iere 21.1-10; 34.1-5; Teu 28.49-50; 2 Tu 25.1; Esera 9.7; Paru 1.10, 15; 5.11-14 18O ipu uma fo‘i o le fale o le Atua, o mea tetele ma mea iti ma ‘oloa o le fale o le ALI‘I ma ‘oloa a le tupu ma ona ali‘i; ‘ua ‘aumai e ia o ia mea uma i Papelonia.#2 Tu 25.13-15; 2 No 36.7, 10 19‘Ua latou susunu fo‘i, le fale o le Atua ma lepeti le pā o Ierusalema ma susunu ona maota uma i le afi, ‘ua na fa‘ataugāina fo‘i ana ipu lelei uma.#2 Tu 25.9; Paru 2.7 20O ē na totoe na sao i le pelu na tāfea e ia i Papelonia; sa i ai latou ‘iā te ia ma ona atali‘i e fai ma ‘au‘auna ‘ua o‘o i ona po o le pule o le mālō o Peresia; 21‘ina ‘ia taunu‘u le afioga a le ALI‘I na fai mai e Ieremia, ‘ua o‘o ‘ina fa‘a‘ato‘atoaina e le lau‘ele‘ele ona sapati; o aso uma sa gaogao ai sa fai ai sapati, e fa‘a‘ato‘atoaina o tausaga e fitugafulu.#Iere 25.11; 29.10; Levi 25.4-5; 26.34-35, 43; Tani 9.2, 22-23; Esera 1.1-3; Isai 44.28; 45.1
‘Ua Fa‘asa‘olotoina e Kuresa Tagata Iutaia
(Esera 1.1-4)
22O le tausaga muamua o Kuresa o le tupu o Peresia na fa‘aosoina ai e le ALI‘I o le manatu o Kuresa le tupu o Peresia, ‘ina ‘ia taunu‘u le afioga a le ALI‘I na fai mai e Ieremia, ‘ona ia tala‘iina lea o le ‘upu i lona mālō uma ma na tusia i le tusi, ‘ua fa‘apea:
23“O lo‘o fa‘apea ‘ona fai atu o Kuresa le tupu o Peresia, ‘Ua tu‘uina mai ‘iā te a‘u e le ALI‘I le Atua o le lagi o mālō uma o le lalolagi; o ia fo‘i ‘ua ia poloa‘i mai ‘iā te a‘u e fai se fale mo ia i Ierusalema o lo‘o i Iuta. O ai ‘ea o ‘iā te ‘outou ai lona nu‘u uma? ‘Ia ‘iā te ia le ALI‘I lona Atua ma ‘ia alu a‘e o ia.”#Isai 44.28
Revised Samoan Catholic Bible © Bible Society of the South Pacific, 2010.