2 Nofoa‘iga a Tupu 23
23
O le Fa‘anofoga o Ioasa e ‘avea ma Tupu
(2 Tu 11.4-16)
1A o le fitu o tausaga na fa‘amalosi ai Ieoiata ma ‘ua ia faia le feagaiga ma ali‘i o ta‘ito‘aselau, o Asaraia le atali‘i o Ieroama ma Isamaeli le atali‘i o Ioanana ma Asaraia le atali‘i o Opeta ma Maaseia le atali‘i o Ataia ma Elisafata le atali‘i o Sekari. 2‘Ona latou fa‘ata‘amilo lea i Iuta ma fa‘apotopotoina sa Levī mai ‘a‘ai uma o Iuta ma matai sili o Isaraelu; ‘ona latou ō mai ai lea i Ierusalema.
3‘Ona osi ai lea o le feagaiga a le fa‘apotopotoga uma ma le tupu, i le fale o le Atua. ‘Ua ia fa‘apea atu fo‘i ‘iā te i latou, “Fa‘auta, e fai le atali‘i o le tupu ma tupu e tusa ma le fetalaiga a le ALI‘I le fānauga a Tavita.#2 Samu 7.12 4O le mea lenei tou te faia; o le tasi vasega o lona vaetoluina o ‘outou, o le ‘au ositaulaga ma sa Levī, o ē ulufale mai i le sapati, latou te fai ma leoleo faitoto‘a; 5e i ai fo‘i le tasi vaega i le fale o le tupu; ma le tasi vaega i le faitoto‘a o le fa‘avae; a o le nu‘u uma e i ai i lotoā o le fale o le ALI‘I. 6‘Ae ‘aua le ō mai nisi i le fale o le ALI‘I, ‘ua na o le ‘au ositaulaga ma i latou o ē ‘au‘auna o sa Levī, latou te ulufale i ai, auā ‘ua fa‘apa‘iaina i latou, a o le nu‘u uma latou te ‘ana‘ana i tausiga a le ALI‘I.#1 No 23.27-29 7E vagavagai sa Levī i le tupu ‘ia so‘o ai, o le tagata ma lana ‘au‘upega i lona lima; ai se tasi e ulufale mai i le fale, ‘ia fasiotia o ia; a ‘ia ‘outou i ai i le tupu i lona ulufale mai ma lona ulufafo atu.”
8‘Ona faia lea e sa Levī ma Iuta uma e tusa ma mea uma na fai atu ai Ieoiata le ositaulaga, ‘ua ta‘itasi ma ‘ave ona tagata e ulufale mai i le sapati, ‘atoa ma ē ulufafo atu i le sapati; auā ‘ua lē fa‘atū‘ua vasega e Ieoiata le ositaulaga. 9‘Ona avatu lea e Ieoiata le ositaulaga i ali‘i o ta‘ito‘aselau o tao ma talitā tetele ma talitā a Tavita le tupu sa i le fale o le Atua. 10‘Ua tofia e ia o tagata uma e tutū fa‘ata‘ali‘oli‘o i le tupu, o le tagata ma lana ‘au‘upega i lona lima, e āfua i le itū taumatau o le fale e o‘o i le itū tauagavale o le fale, i tafatafa ane o le fatafaitaulaga ma le fale. 11‘Ona latou ‘aumaia lea o le atali‘i o le tupu ma fa‘ae‘eina ‘iā te ia le paleali‘i ma avatu ‘iā te ia le tulafono ma ‘ua fai o ia ma tupu. Na fa‘au‘uina o ia e Ieoiata ma ona atali‘i, ‘ona latou fai atu lea, “‘Ia soifua le tupu.”#Teu 17.18, 19; 1 Samu 10.24
‘Ua Fasiotia o Atalia
12‘Ua fa‘alogo Atalia i le vāvāō o le nu‘u o lo‘o tamomo‘e#23.12 tamomo‘e: O le fa‘aliliuga tuai; femoei. ma vivi‘i atu i le tupu, ‘ona sau ai lea o ia i le nu‘u i le fale o le ALI‘I; 13‘ua va‘ai atu o ia, fa‘auta, ‘ua tu mai le tupu i lona pou i le faitoto‘a ma ali‘i ma ē ili pū e latalata i le tupu; o tagata uma o le nu‘u ‘ua ‘oli‘oli ma ilia pū, ma ē pepese ma la‘aupese ma i latou o ē a‘oa‘o atu i vi‘iga; ‘ona saei ai lea e Atalia i ona ‘ofu ma fa‘apea atu, “O le fouvale, o le fouvale.”
14‘Ona ‘aumaia lea i fafo e Ieoiata le ositaulaga o ali‘i o ta‘ito‘aselau, o ali‘i o ‘au ma na fa‘apea atu ‘iā te i latou, “‘Inā ‘ave ia ‘iā te ia i tua o ‘au ‘ua fa‘aatusolo; ai se mulimuli atu ‘iā te ia ‘ia fasiotia o ia i le pelu;” auā na fa‘apea a le ositaulaga,#23.14 ositaulaga: O le fa‘aliliuga tuai; faitaulaga. “‘Aua le fasioti ‘iā te ia i le fale o le ALI‘I.”
15‘Ua latou pu‘e ‘iā te ia; ‘ua o‘o atu o ia i le ala e ui ai i le faitoto‘a o solofanua i le fale o le tupu; ‘ona latou fasioti lea ‘iā te ia i lea mea.
O le Fa‘afouga na faia e Ieoiata
(2 Tu 11.17-20)
16‘Ona osi lea o le feagaiga a Ieoiata, o ia ma le nu‘u uma ma le tupu, e ‘avea i latou ma nu‘u o le ALI‘I. 17‘Ona ō atu lea o le nu‘u uma i le fale o Paala, ma latou lepetia ma latou tu‘imomoia ona fatafaitaulaga ma ona tupua ma latou fasiotia Matana le ositaulaga a Paala i luma o fatafaitaulaga.#Teu 13.9 18‘Ua tofia e Ieoiata o tofiga o le fale o le ALI‘I e faia e le ‘au ositaulaga o sa Levī, o i latou na tofia e Tavita i le fale o le ALI‘I e fai taulaga mū i le ALI‘I, e pei ‘ona tusia i le tulafono a Mose ma le fiafia ma le pese, e pei ‘ona faia e Tavita.#Eso 29.38-42; 1 No 23.6, 30, 31; 24.1 19‘Ua tofia fo‘i e ia o leoleo faitoto‘a i faitoto‘a o le fale o le ALI‘I, ‘ina ne‘i ulufale mai lē ‘ua leaga i se mea e tasi.#1 No 26.1-19
20‘Ua ‘ave fo‘i e ia o ali‘i o ta‘ito‘aselau ma ali‘i ma faipule o le nu‘u, ‘atoa ma tagata uma o le nu‘u ma latou ō ifo ma le tupu nai le fale o le ALI‘I; ma ‘ua latou ui mai ai i le faitoto‘a aupitoaluga i le fale o le tupu ma ‘ua latou fa‘anofo le tupu i le nofoāli‘i o le mālō. 21‘Ona ‘oli‘oli lea o tagata uma o le nu‘u; ‘ua filemū fo‘i le ‘a‘ai, ‘ina ‘ua fasiotia e i latou o Atalia i le pelu.
Revised Samoan Catholic Bible © Bible Society of the South Pacific, 2010.