2 Nofoa‘iga a Tupu 20
20
O le Tatalo a Iosefatu ‘ina o si‘i mai le Tau‘a e Moapi ma Amoni
1‘Ua mavae ia mea, ‘ona ō mai ai lea o le fānauga a Moapi ma le fānauga a Amoni, e fa‘atasi ma i latou fo‘i nisi o sa Amonī, e tau ma Iosefatu.#Kene 19.37-38; 2 Tu 1.1; 3.4, 7 2‘Ona ō mai lea o isi ma fai mai ‘iā Iosefatu, ‘ua fa‘apea mai, “O lo‘o ō mai le vao tagata e matuā to‘atele e tau ma oe, mai le la itū o le sami, mai Suria; fa‘auta fo‘i, o i Haseso Tamara i latou, o Enokati lea.” 3‘Ona mata‘u ai lea o Iosefatu, ‘ua ia fa‘amalosi ai e sā‘ili‘ili i le ALI‘I ma ‘ua tala‘iina e ia le anapogi ‘iā Iuta uma.#2 No 19.3; Esera 8.21; Ioe 1.14; 2.15; Iona 3.5 4‘Ona fa‘apotopoto ai lea o Iuta e sā‘ili‘ili i le ALI‘I; ‘ua latou ō mai fo‘i mai ‘a‘ai uma o Iuta e sā‘ili‘ili i le ALI‘I.
O le Tatalo a Iosefatu
5‘Ona tula‘i lea o Iosefatu i le fa‘apotopotoga o Iuta ma Ierusalema, i le fale o le ALI‘I, i luma o le lotoā fou, 6‘ua fa‘apea atu, “Le ALI‘I e, le Atua o matou tamā, e lē o le Atua ‘ea oe i le lagi? ‘E te lē pule ‘ea oe i mālō uma o nu‘u ‘ese? E lē o i lou ‘a‘ao ‘ea le mana ma le malosi, e lē mafaia e se tasi ‘ona tete‘e atu ‘iā te oe?#Teu 4.39; 1 No 29.12; Tani 4.17 7E lē o lo matou Atua ‘ea oe, na e tulia i latou sa nonofo i lenei nu‘u i luma o lou nu‘u o Isaraelu ma ‘ua e foa‘iina mai ai i le fānau a Aperaamo lau uō e fa‘avavau?#Isai 41.8; Iako 2.23; Sala 44.2 8‘Ua latou nonofo ai ma fai ai mo oe le malumalu mo lou suafa, sa fa‘apea atu, 9‘‘Āfai e o‘o mai mea leaga ‘iā te i matou, o le pelu, po o le sala, po o le fa‘ama‘i, po o le oge ma matou tutū i luma o lenei fale, ‘atoa ma ou luma, auā o i ai lou suafa i lenei fale ma matou vala‘au atu ‘iā te oe i lo matou puapuagā, ‘ona e fa‘afofoga mai ai lea ma fa‘aola mai.’#2 No 6.20, 28-30 10O lenei fo‘i, ‘ia e sisila mai, o le fānauga a Amoni ma Moapi ma le mauga o Seira, o i latou na e lē mafai ‘ona tu‘u mai ‘iā Isaraelu ‘ia osofia i latou, ‘ina ‘ua latou ō mai mai le nu‘u o Aikupito, a ‘ua latou ‘alo ‘ese ‘iā te i latou ma ‘ua lē fa‘aumatia i latou;#Teu 2.4-19; Kene 32.3; 36.8; Nume 20.21; 2 No 20.1, 22, 23 11silasila ‘iā i latou, ‘ua fa‘apea ‘ona latou taui mai ‘iā te i matou, ‘ua ō mai e tutuli ‘iā te i matou ai lou tofi na e foa‘i mai mo i matou. 12Lo matou Atua e, ‘e te lē fa‘amasino ‘ea ‘iā te i latou? Auā e leai so matou malosi e tete‘e i lenei vao tagata e to‘atele, ‘ua ō mai e tau ma i matou; ‘ua matou lē iloa fo‘i se mea e fai; a ‘ua fa‘asaga atu i matou ‘iā te oe.”#2 No 14.11; 17.12-19; Sala 25.15; 123.1; Isai 40.29-31
13‘Ua tutū Iuta uma i luma o le ALI‘I ma o latou tamaiti, o a latou avā ma a latou fānau. 14‘Ona o‘o mai lea o le Agaga o le ALI‘I i luga o Iaaseelu i totonu o le fa‘apotopotoga, o ia o le atali‘i o Sakaria, o le atali‘i ia o Penaia, o le atali‘i ia o Ieielu, o le atali‘i ia o Matania, o lo sa Levī, o lo le fānauga a Asafo;#1 No 6.39; 2 No 15.1 15‘ua ia fa‘apea atu, “O ‘outou Iuta uma ma ē ‘ua nonofo i Ierusalema ma oe le tupu o Iosefatu, ‘inā fa‘afogafoga mai ia ‘outou, o lo‘o fa‘apea ‘ona fetalai mai o le ALI‘I ‘iā te ‘outou: ‘‘Aua ne‘i fefefe, ‘aua fo‘i ne‘i matata‘u ‘outou, ‘ona o lenei vao tagata e to‘atele; auā o le o lo ‘outou tau‘a lenei, a o lo le Atua.#Teu 20.1-4; Eso 14.13-14; Nume 14.9; 1 Samu 17.47; 2 No 15.2; 32.7-8 16‘Ia ‘outou ō ifo taeao ‘iā te i latou; fa‘auta, ‘ua ō a‘e i latou i le ā‘ega i Sesa; tou te maua fo‘i i latou i le mea e taunu‘u ai le alia e feagai ma le vao o Ieruelu. 17E le tau ‘outou i lenei tau‘a; tutū ia ‘outou ma ‘ia ‘outou tumau ma ‘outou va‘ai atu i le olataga mai i le ALI‘I o lo‘o ‘iā te ‘outou; Iuta ma Ierusalema e.’ ‘Aua le fefefe, ‘aua fo‘i le matata‘u; ‘ia ō atu taeao ‘iā te i latou; e ‘iā te ‘outou fo‘i o le ALI‘I.”#Eso 14.13-14
18‘Ona punou lea o Iosefatu i lalo i le ‘ele‘ele; ‘ua fa‘apa‘ū fo‘i Iuta uma ma ē ‘ua nonofo i Ierusalema i luma o le ALI‘I, ‘ua ifo atu i le ALI‘I.#Eso 4.31; Nee 8.6 19O sa Levī, o le fānauga a sa Koatō ma le fānauga a sa Korū, ‘ua tutū i latou e vivi‘i i le ALI‘I le Atua o Isaraelu i le leo tele ma le maualuga.
20‘Ua latou ala tula‘i i le taeao ma ō atu i le vao o Tikoa; o lo‘o ō atu i latou, ‘ona tu atu lea o Iosefatu, ‘ua fa‘apea atu, “Iuta e ma ‘outou e nonofo i Ierusalema, fa‘alogologo mai ia ‘iā te a‘u. ‘Inā fa‘atuatua ia i le ALI‘I lo ‘outou Atua, ‘ona fa‘atumauina lea o ‘outou; ‘ia ‘outou fa‘atuatua i ana perofeta, ‘ona ‘outou manuia ai lea.”#Isai 7.9; Amo 1.1 21‘Ua ia filifili ma le nu‘u, ‘ona tofia lea e ia o ē pepese i le ALI‘I ma ē vivi‘i atu ‘ua ‘iā i latou teuga pa‘ia, i lo latou ō atu i luma o ‘au ma latou fai atu,
“‘Ia fa‘amanū atu i le ALI‘I,
auā e fa‘avavau lona alofa.”
22‘Ua latou amata ‘ona pepese ma vivi‘i atu, ‘ona tu‘u atu lea e le ALI‘I o ‘au ‘ua tanu e tau ma le fānauga a Amoni ma Moapi ma le mauga o Seira, na ō mai e tau ma Iuta; ‘ua fasia i latou.#2 No 13.13; 20.10 23Auā na tula‘i le fānauga a Amoni ma Moapi e tau ma ē nonofo i le mauga o Seira, e matuā fasioti ma fa‘aumatia ai i latou; ‘ua uma ‘ona latou fasia o ē nonofo i Seira, ‘ona fefasia‘i ai lea o i latou.#Fa‘ama 7.22; 1 Samu 14.20; 2 Tu 3.23; Eseki 38.21 24‘Ua o‘o atu Iuta i le ‘olo e leoleo ai ‘ua i le vao, ‘ona latou va‘ava‘ai atu ai lea i le vao tagata, fa‘auta, o i latou o tagata oti, ‘ua ta‘atitia i latou i le ‘ele‘ele, ‘ua leai sē sao.
25‘Ua ō mai Iosefatu ma lona nu‘u e vete mai a latou mea, ‘ona latou maua lea ‘iā te i latou o ‘oloa e tele i tino o tagata oti, ‘atoa ma teuga matagofie, ‘ua latou tō ‘ese mo i latou, ‘ua lē mafai ‘ona la‘u; o aso e tolu o vete ai le ‘oloa ‘ina ‘ua matuā tele ia. 26O le aso fa na latou fa‘apotopoto ai i le vanu o Peraka; auā na latou fa‘amanū i le ALI‘I i lea mea; o le mea lea ‘ua fa‘aigoa ai lea lava mea, o le vanu o Peraka ‘ua o‘o mai i le aso nei. 27‘Ona fo‘i mai lea o i latou, o tagata uma o Iuta ma Ierusalema ma Iosefatu na muamua i o latou luma e toe fo‘i i Ierusalema ma le fiafia, auā ‘ua fa‘afiafiaina i latou e le ALI‘I i ē na ita mai ‘iā i latou.#Nee 12.43 28‘Ua latou ō mai i Ierusalema ma napeli ma kitara ma pū, i le fale o le ALI‘I. 29Sa ai le mata‘u i le Atua i mālō uma o ia nu‘u, ‘ina ‘ua latou fa‘alogologo na tau ALI‘I ma i latou e ‘ua ita mai ‘iā Isaraelu.#Teu 2.25; 2 No 14.14; 17.10 30Sa to‘alemū le mālō o Iosefatu; auā na tu‘uina mai le filemū ‘iā te ia e lona Atua i itū uma.
O le I‘uga o le Nofoa‘iga a Iosefatu
(1 Tu 22.41-50)
31‘Ua fai Iosefatu ma tupu ‘iā Iuta. E tolu sefulu ma le lima ona tausaga ‘ina o fai o ia ma tupu; na fai fo‘i o ia ma tupu i Ierusalema i tausaga e lua sefulu ma le lima. O Asopa le igoa o lona tinā, o le afafine o Seleki. 32Na savali o ia i le ala o Asa lona tamā, na lē alu ‘ese ai o ia; na faia e ia o mea tonu i luma o le ALI‘I. 33A ‘ua lē ‘ave‘eseina o mea maualuluga; auā o ona po ia ‘ua lē saunia ai le nu‘u o latou loto i le Atua o latou tamā.#2 No 17.6
34O toe o mea na faia e Iosefatu, o mea muamua ma mea mulimuli, fa‘auta, ‘ua tusia i le tala a Ieu le atali‘i o Hanani, ‘ua ta‘ua i le tusi i tupu o Isaraelu.#1 Tu 16.1, 7; 22.45; 2 No 19.2
35‘Ua mavae ia mea, ‘ona fa‘atasi lea o Iosefatu le tupu o Iuta ma Aasaia le tupu o Isaraelu o lē na fai amio matuā leaga.#1 Tu 22.48-49; 2 No 9.21 36Na ia fa‘atasi ma ‘ia e fai va‘a ai, e ō i Tasesa; na latou fai va‘a i Esiokape. 37‘Ona vavalo lea o Elisara, le atali‘i o Totava o le Maresa, ‘iā Iosefatu, ‘ua fa‘apea atu, “‘Ua fa‘amalepeina e le ALI‘I au galuega, ‘ina ‘ua e fa‘atasi ma Aasaia.” ‘Ona lepetia lea o va‘a, ‘ua lē mafai ai ‘ona ō i Tasesa.#2 No 19.2
Revised Samoan Catholic Bible © Bible Society of the South Pacific, 2010.