Mátyo 9
9
Yésuwə a pwisí mɔʼ a libyə́ŋ
1Á mbís ɛ púndá, Yésuwə a kwilí pə́ á bwálu átin a tím á pɛsi ɛ mbô ɛníní, ti a kǐ á nkí ámə́ a bílíní ɛ dyɛ. 2Ngə a pilíní á nkí m mɔ, baʼ bafɔ́ bá pánání mɔ́ mɔʼ a libyə́ŋ awə̌ bá pə́mbíní á likɛ. Ngə Yésuwə a míníní dúbɛ álə́ bá wɔ́ŋíní, a byábí á mɔʼ a libyə́ŋ ani nána, “Á mwǎn, ɛ si wú mbú, n laksɛ́ wubî wú wə.” 3Ngə balɛ̂ bá mbéndá bafɔ́ ábə́ bá bílí áwə́ bá wúkíní nâ, bá bútí ɛ tɔʼ átin nána, “Mɔʼ anín ǎ lwí Dyǔ!” 4Yésuwə a m bí yə̌ ɛ́yə́ bá bílíní ɛ kani á mílə́m mí bɔ. Ti a kɔndɛ́ bɔ́ nána, “Yán nyí wɔ́ŋíní likani lí bî ngə ɛ́yín á mílə́m mí nyə? 5Ɛfə́ ɛ́ kámbiyǎ álí byá, álí byá nána, ‘N laksɛ́ wubî wú wə’ tɔ̌, álí byá nána, ‘Falú áshí, butí ɛ́ kə?’ 6Ndé n lúfú nyə́ nána Mwǎn a Mɔnyuŋ a wɔ́ŋí wunja á nkínshíyə álí laksɛ́ wúbî.” Yɔ̂ a pɔŋíní mɔ a libyə́ŋ nána, “Mi nǎn pɔŋ wə̂ nána, falú áshí, ɛ nûŋ ngushú ɛ́ wə, ɛ tîm á ndáʼ.” 7Áfâ áshí áshí, mɔʼ ani a falú áshí a kǐ á ndáʼ ɛ́ mɔ. 8Ngə limuti álə́ lí bílí áwə́ lí míníní nâ, mbú n kúwí bɔ́. Ti bá bútí ɛ kɛsí Dyǔ á ɛ́tútú nána a bəkí wunja á mɔ̌nyuŋ álí bwə ɛbú ɛ́ mísam ngə ɛ́mî.
Yésuwə a bəŋí Mátyo álí pɔ̌ŋ mɔ́ á mbís
9Ngə misam mínán mísə́sə̌n mí mə́ní ɛ bwəlan, Yésuwə a falú á fǔm bû. Ngə a bílíní ɛ kə a míní mɔʼ nfɔ́, awə̌ dǐn lí mɔ lí bílí Mátyo. Mátyo a shumání á ndáʼ áfə́ a bílíní ɛ ku táks. Ti Yésuwə a pɔŋí mɔ́ nána, “Pɔ̌ŋ mî á mbǐ!” Mátyo a falú áshí a pɔŋí mɔ́ á mbǐ. 10Á mbís ɛ púndá Yésuwə a kǐ á ndáʼ ɛ́ Mátyo álí dyá lídyá. Baku-bá-táks bápə́pə̂ jǐta na baʼ bá bî bápə́pə̂ bá pílí ɛ dyá lídyá na Yésuwə bû bawútú bá mɔ. 11Á púndá ɛyə̌ duŋgu lí Bafárisî bá míníní nâ bá bútí ɛ kɔndɛ́ bawútú bá Yésuwə nána, “Yán mulɛ̂ n nyə ǎ dyání na baku-bá-táks na baʼ bá bî?” 12Ngə Yésuwə a wúkíní nâ, a byábí á bɔ́ nána, “Baʼ ábə́ bá dyɛ bwǎm bá sə̌ ɛ́ sa mɔ-a-bwə̌. Ndé baʼ bá kfulu bɔ́ bá sa mɔ-a-bwə̌. 13Ndé nyí kə̂ nyí sâ ngə nyí sɔ́ntání biyala bî ábə́ bí tílání á kâti ɛ Dyǔ nána, ‘Yə̌ ɛ́yə́ nǎn sakání baʼ ɛ́ dí likini lí nlə́m suká jabeya lí bidfú.’ Mi m píliyǎ á nkínshíyə álí bə̌ŋ baʼ á bə́ bá tyə́bí sîm á wusú wú Dyǔ, ndé m pilí álí bə̌ŋ baʼ bá bî.”
Likɔndɛ tɛ́ŋgɛnɛ li dyɛ́ lí njɛ-á-mákáni átin
14Bǔn bufɔ́, bawútú bá Jɔnə́ a Dumsɛ bá pílí á Yésuwə bá kɔ́ndɛ́ mɔ́ nána, “Yán sə́ na Bafárisî sí dyɛní njɛ-á-makáni átin, ndé bawútú bá wə bá sə̌ ɛ́ dyɛ njɛ-á-makáni átin?” 15Ti Yésuwə a pushú bɔ́ á ŋganú átin nána, “Yán baʼ ábə́ bá bə́ŋíní á ŋgandu ɛ wuwə́ bá tíŋgání ɛ bútí ɛ́ lɛbɛ, ɛ́yə́ bá díní na mɔʼ awə̌ ǎ kasí sɔ́mbɔ́? Bá tíŋganiyǎ. Ndé bǔn bú paʼ ɛ́yə́ bá nuŋání bɔ́ mɔʼ awə̌ ǎ kasí sɔ́mbɔ́. Á bǔn bû yɔ́ bá dyɛní njɛ-á-makáni átin. 16Nyí lɔ́lí ɛ bí nána wə̌ti mɔʼ ǎ tambú libaʼ, a sə̌ ɛ́ nuŋ mǎ ɛpɛsí ɛ́ libaʼ ɛ́ kɔ́nə́ álí tambú libaʼ álə́ lí mə́ ɛ́ jin, á ɛ́tútú nána, njí mǎ ɛpɛsí ɛ́ libaʼ ɛ́ kɔ́nə́ lí mə́ ɛ níŋti, ɛ́ falú á libaʼ álə́ lí mə̌ ɛ́ jin. Ɛ́yî ɛ́ bwə ɛpɔn ɛyî ɛ́ púwan litúm ɛ́ wúsúsuwə. 17Nâ pə́ mɔʼ a tíŋganiyǎní ɛ nǔŋ mǐm má kɔ́nə́ a fá mɔ́ á bam ɛyə̌ a mə̌ ɛ́ jin. Á ɛ́tútú nána njí a bwəlí nâni, mǐm mâ má pulu, bam ɛni ɛ́ gbíli, ti mǐm mâ má súwílí áshí, bam ɛni pə́ ɛ́ fɛ́nji. Ndé baʼ bá fá mǐm má kɔ́nə́ á bam ɛ kɔ́nə́. Ɛ́yî ɛ́ bwə mǐm mâ má lɔ̂, bam pə́ á bá bwǎm.”
Yésuwə a fusí mwǎn a mwalân á líwá, a pwisí pə́ mwalân nfɔ́
18Ngə Yésuwə a bílíní wə̌ ɛ́ pɔŋ baʼ misam mín, janiya nfɔ́ a pilí á mɔ́, ti a tɔ̌ mabɔ́ŋ áshí á wúsú wú Yésuwə na ɛdúbɛ́ ɛ́sə́sə̌n, ti a byábí nána, “Mwǎn a mwalân m myə a gvúlí sɔ́nsɔ́nǎn. Ndé pǎʼ ɛ bán mɔ́ ɛkɛ́ á nyǔ, ngə á timní pə́ á luŋgɛ́.” 19Ti Yésuwə na bawútú bá mɔ bá tyə́bí ámǐn ti bá pɔ́ŋí mɔ ani á mbís. 20Mwalân nfɔ́ a bílí awə̌ a ŋ wɔ́ŋ nyambɛ̂ awə̌ makǐ má bílíní ɛ fí á nyǔ m mɔ ɛ mwalân ɛtîtɛ́. Nyambɛ̂ ani a m mə̌ bá mɔ́ á nyǔ mimbvú dyǔm na míbɛ̂. Yɔ̂ mwalân ani a nyítíní á mbís ɛ́ Yésuwə, ti a nyɔtí nlú mú libaʼ álə́ Yésuwə a fílíní. 21“Mwalân ani a bwəlí nâni á ɛ́tútú nána, a bílí ɛ kaní á nlə́m m mɔ nána, njí á púlí wɔ̂ ɛ́ nyɔtí libaʼ lí mɔ, ní á pwi.” 22Yésuwə a wɛsí nyǔ a míní mwalân ani. Ti a pɔŋí mɔ́ nána, “Mwǎn-a-mwalân ɛ si báŋ, dúbɛ lí wə lí pwísí wə.” Butya púndá ɛni mwalân ani a pwǐ. 23Yésuwə a pilí á ndáʼ ɛ́ janiya lî. Ngə a kwilíní á ndáʼ, a tání limutí álə́ lí bílí ɛ́ bwə ntɔkɔku n nə̂n, na baʼ ábə́ bá bílí ɛ́ fúŋí tɔ̌ŋ ɛ́ nyaʼ, bá kɔ́nɔ́ pə́ mikɔ́ni mí ɛ́wú. 24Yésuwə a byábí á bɔ́ nána, “Nyə́ baʼ básə́sə̌n nyí nyíta á ɛbúkatîn, á ɛ́tútú nána mwǎn a mwalân anín a nán gvúlíyǎ wɔ́, ndé ǎ nalí wúyɔ́.” Ndé bɔ́ baʼ básə́sə̌n bá wɛ́lí mɔ́. 25Ngə limuti lî lí nyítíní á ɛbúka, Yésuwə a kwílí á tfǔŋ áfə́ bá nánjíní mwǎn-a-mwalân ani. A wálí mɔ́ ɛkɛ́, ti mwǎn-a-mwalân ani áfâ áshí áshí a falú áshí. 26Ndúm ɛyə̌ ɛ nyítí ɛ kǐ á pɛsi ɛ mbú ɛni ɛsə́sə̌n.
Yésuwə a pwisí bidímtí bíbɛ̂
27Yésuwə a makú fǔm bû, ngə a bílíní ɛ kə, baʼ bábɛ̂ ábə́ mǐ má dímíní á nlú bá bílí mɔ́ ɛ pɔŋ á mbís bá búna nána, “Mwǎn mú nja n Devídə, wú sə́ likini!” 28Ngə Yésuwə a kwilíní á ndáʼ átin, baʼ bâ bábɛ̂ ábə́ mǐ má dímíní á nlú bá pílí á Yésuwə. Ti a kɔndɛ́ bɔ́ nána, “Nyí dúbɛ́ nána mi n tiŋgání nyə́ ɛ bwə nyí mín wǔm?” Ti bá púshú mɔ́ nána, “Iŋ, Sáŋgúwə́, sí dúbɛ́.” 29Ti Yésuwə a nyɔtí mǐ má bɔ, ti a byábí nána, “Nyí dúbɛ́ nána nyí mín pə́ wǔm, áfánikə̌ ɛ́ bwə́lan nyə́ ngə nyí dúbɛ́ní.” 30Ti mǐ má bɔ má púwání. Yésuwə a wálí bɔ́ matwî, á pɔŋá bɔ́ nána, “Nyí si pɔ̌ŋ mɔʼ ká nfɔ́ yǔm ɛ́yî ɛ́yə́ ɛ́ bwə́lání.” 31Ndé bá kí bá bútí ɛ byá tɛ́ŋgɛnɛ Yésuwə á pɛsi ɛ ɛkumbu ɛ́yî ɛ́sə́sə̌n ngə Yésuwə a bwəlíní manyáká.
Yésuwə a pwisí ɛbúbú
32Baʼ bábɛ̂ bâ ábə́ Yésuwə a pwisíní bá bílí ɛ nyít á fǔm bû. Ngə bá bílíní ɛ nyít, baʼ bápə́pə̂ bá pánání mɔʼ nfɔ́ á Yésuwə awə̌ a bílí ɛbúbú á ɛ́tútú nána, mudî m bî m bílí mɔ́ á nyǔ átin. 33Ngə Yésuwə a fúlíní mudî m bî mû á nyǔ ɛ́ mɔʼ ani, mɔʼ ani awə̌ a bílí ɛbúbú a butí ɛ byá. Limuti álə́ lí bílí á wə́ lí bílí manyáká, ti bá byábí nána “Ɛbú ɛ́ nsam ngə ɛ́yín ɛ́ nan bwə́láníyá wə́ á ɛ́kumbu ɛ́ Ísrɛl.” 34Ndé Bafárisî bá byábí nána, “Yésuwə ǎ fúl midî mí bî á nyǔ ɛ baʼ átin á ɛ́tútú nána kə̂ŋ ɛ midî mí bî yɔ́ ɛ bəkí mɔ́ ngínya álí bwə nâ.”
Yésuwə a wúkí baʼ likini
35Yésuwə a bílí ɛ kə̌ á mikí mísə́sə̌n, mí nə̂n na mítə́kə̂n á pɛsi ɛ ɛkumbu ɛ́yî. A bílí ɛ lɛ́fú ɛyala ɛ́ Dyǔ á mandáʼ má makáni má baʼ bá Ísrɛl, á byábá Ndúm ɛ Mbâ tɛ́ŋgɛnɛ Janiya. Yésuwə a bílí ɛ pwisí baʼ básə́sə̌n ábə́ bá wɔ́ŋí banyambɛ̂ na mikfulu nyai na nyai. 36Á púndá ɛyə̌ a míníní limuti, likini lí lwínjí mɔ́ á nlə́m. Á ɛ́tútú nána, bâ n wɔ́ŋ mutaka jǐta, bá sîn wɔ́ŋ mɔ̂ʼ awə̌ á wúnján bɔ́. Bá bílí ngə mílɔŋgi ámə́ mí sî ŋ wɔ́ŋ mɔ̂ʼ awə̌ ǎ tátí bɔ́. 37Áfánikə̌, Yésuwə á byábí á bawútú bá mɔ nána, “Ndfukú ɛ mə́ ɛ yɛ́ jǐta, byə̌m bí bwí álí pá, ndé bapálaʼ bá bwíyǎ átin. 38Áfánikə̌, nyí káni nána nwɔ́ŋa-a-ndfukú a lúm bapálaʼ.”
Attualmente Selezionati:
Mátyo 9: bwt
Evidenzia
Copia
Confronta
Condividi
Vuoi avere le tue evidenziazioni salvate su tutti i tuoi dispositivi?Iscriviti o accedi
